Urak ini, Mỹ Xuyên lac bhum palei ba akaok nao dahlau dalam danak dak padang ngak palei pala bahrau di Sóc Trăng. Kadha vak di urang vak Thạch Hồng hu ndem ka dom salih bahrau di Mỹ Xuyên kayua tui danak dak palei pala bahrau.

Kapul urang nong pambuak gauk di Đại Ân, xã Đại Tâm, huyện Mỹ Xuyên hu 32 urang ngan haong mblang taneh ngak praong 103 ha; dalam nan, 100 ha pala padai saong 3 ha pala njam patam. Ngan haong mblang taneh pala padai di dom urang nong dalam kapul pambuak gauk hu pilih ruah pala drak pajaih padai angan je ST24, ST25 pambuak gam haong bruk duah jalan pablei tabiak pandap panda.

Ong Hứa Thành Nghĩa, Akaok Kapul urang ngak nong pambuak gauk di Đại Ân brei thau lac, kayua dom pakat, dom gah tuk halei jeng sangka peih ngak dom danak dak, bruk ngak, salih ilamo ngak barau saong buh jien tame padang ngak jalan mbak di palei pala, ba kein laba ka urang ngak nong daong paglaong ilamo ngak mbang, pala drak saong pablei salih pandap panda hu lagaih, rik tame patagok yaom glaong di pandap panda saong tagok jien mek tame ka urang nong. Dalam thun bahrau blaoh, kein laba tui kuhria meng bruk ngak padai di Kapul urang nong pambuak gauk mek hu meng 40-50 triệu đồng/ha, bhum pala njam patam brei kein laba tui kuhria meng 60-80 triệu đồng/ha. Urak ini abih tih dom urang dalam kapul jeng hu jien mek tame tani tanat, sang danaok hu khang kadang adah hadai.  

“Dom baoh sang bo hu mbaok tame pala drak pajaih ST ye raidiuk hu tani tanat, blaoh anek mbik hu nao bac tal labik tal dhua, sang danaok khang kadang jang, mikva biak chreih chrai bui sambai. Năng suất di padai ST urak ini mek hu samu saong glaong jang pajaih OM nan ye kein di ST 1ha laba meng 20-25 triệu đồng".

Ong Liêu Bunh Thuơnh, Bí thư Đảng uỷ xã Đại Tâm brei thau lac, xa hu 1.670 ha pala drak 2 vu padai, 298ha pala njam patam, raong limo mek ia tasau, limo mek ralaow… piah peih ngak kein lagaih ini, xa hu caga rilo phun jien piah buh tame padang ngak hạ tầng puk palei, dalam nan hu dom danak dak kraong ribaong piah tani tanat bruk pruh ia. Urak ini, xa padang ngak hu HTX, kapul pambuak gauk, padang ngak hu dom mblang hamu praong pala padai angan je ST24, ST25 praong 656ha…. Kayua peih ngak siam danak dak ngak veik gah ngak nong tui jalan patagok yaom glaong, jhul khang bruk pandar ilamo kỹ thuật dalam bruk ngak, pala drak daong ba mai kein lagaih kinh te glaong…

“Xã Đại Tâm lac xã ngak nong pataom tame rilo abih lac ngak padai saong pala njam patam, kol dahlak hulin hu pato tacei padang ngak dom kapul pambuak gauk, HTX, khol drei caong cak rok patagok ngak nong, caong patagok jien mek tame tui jalan pataom rilo manuac, ye ngak habar ba jien mek rame, hu jalan pablei tabiak pandap panda ka rahra sanang hatai ngak mbang, pala drak. Tal tukvak urak ini ye jien mek tame di Đại Tâm lac labaih 65-67 triệu đồng sa urang sa thun”.

Thau cambaih lac bruk padang ngak palei pala bahrau meng lac jalan ngak suai labik, tukvak tapa, dom pakat ủy đảng, kanja dom xã di huyện Mỹ Xuyên hu peih ngak rilo jalan ngak piah paglaong chất lượng dom asal kadha palei pala bahrau, pamaong tal bruk peih ngak jak jeng padang ngak palei pala bahrau glaong saong palei pala bahrau kiểu mẫu. Rilo gah hu jak ba piah buh jien tame, paglaong dom prein khang di cơ sở hạ tầng palei pala, padang ngak dom bruk ngak hu kein lagaih ba laba glaong. Ong Đặng Văn Phương, Bí thư Huyện uỷ, akaok UBND huyện Mỹ xuyên brei thau veik:  “Yaom pala drak di labaih 1 ha taneh pala saong raong glang kaya ika di huyện urak ini mek hu 207 triệu đồng, jien mek tame tui kuhria yaok akaok manuac tal urak ini mek hu 54 triệu đồng, dom baoh sang kan kanthaot daok labaih 1,1%, jalan meng pasak xã tal huyện hu tuh nhựa, tani tanat radaih ô tô nao mai hu lagaih luac thun”.

Meng danak dak ini, Mỹ Xuyên hu mboh salih biak samar mbaok mata puk palei, cơ sở hạ tầng jalan mbak, raidiuk di mikva oh padeih hu paglaong. Ngan haong jalan ba tabiak puac abih lac patagok jien mek, patagok raidiuk di rahra, huyện Mỹ Xuyên hu brei thau cambaih laih lac patui veik patagok hatai halain hatain, caga dahlau, jak ba dom taong abih hệ thống chính trị rik prein hu mbaok tame, sa hatung hatai rik prein padang ngak palei negar. abih di nyu nan lac padang ngak, paglaong dom asal kadha, mek bruk cak rok patagok, paralo jien mek tame ka rahra lac jalan ba tabiak ngak piah kham marat./.