Kadha vak: “Ngin bahrau meng palei pala bahrau kiểu mẫu” di mangaok báo Sài Gòn giải phóng.

Xã Đại Thành, ban sit Ngã Bảy, hu rilo labik thau tal tuk jeng labik camereip abih di bhum ĐBSCL mek hu chuẩn xã palei pala bahrau di puac thun 2013, saong lac xã nao tal palei pala bahrau paglaong camereip abih di tỉnh Hậu Giang di kreih thun 2019. Saong bahrau ini, Đại Thành mek hu chuẩn xã palei pala bahrau kiểu mẫu camereip abih di tỉnh Hậu Giang.

Xã Đại Thành hu jaik 2.000ha ngak nong gam haong jaik 2.000 sang bhap bini. Ngak nong hu maong lac prein khang saong hu ngak praong di xã; meng nan, xã pataom tame patagok ngak nong tui jalan pandar ilamu - công nghệ, padang bruk pala ngak tuần hoàn piah paglaong yaom pandap. Dalam nan, sangka salih taneh pala takik kein laba tapa pala phun hu yaom kinh tế glaong, patagok dom janih phun pala praong. Langiu di nan, bruk pala sak mao (chôm chôm) pambuak haong raong dar ko mek ia hani hu maong lac bruk hadah pambuak gauk tui jalan kinh tế tuần hoàn saong pandar công nghệ glaong…

Rilo rahra daok di palei Sơn Phú 1, xã Đại Thành, ban sit Ngã Bảy biak takre bruk pala ngak naih joi di sang sa-ai Nguyễn Kim Toàn. Langiu di pala sak mao saong kruac aik oh hu asar ba mai kein laba glaong, sang sa-ai Toàn daok ba akaok nao dahlau dalam bruk ngak tabiak pandap bahrau di mangaok mblang bein praong 1,6ha di sang drei, nan lac bruk raong dar ko mek ia hani.

Sa-ai Toàn peih bruk raong dar ko mek ia hani meng puac thun 2022, haong 10 thùng dar ko tuk camereip piah gam raong gam bac megru ilamu. Tal urak ini, dom thùng dar ko di bein sak mao, kruac aik oh hu asar di sa-ai tagok tal 18 thùng.

Tui panuac khan di sa-ai Toàn, bruk raong dar ko dalam bein phun mbang baoh oh kan rilo. Tuk mek dar ko pajaih mai, brei pilih ruah labik lagaih dalam bein piah caik thùng dar ko. Dar ko eng drei par nao duah mbang saong njuk ia hani di bein phun mbang baoh di sang saong dom sang jaik taphia, hadei di nan, nyu mai tame veik thùng dar ko piah ngak jeng ia hani. Bilan phun mbang baoh raak bingu rilo, dalam 7-10 harei sa-ai Toàn mek ia hani sa mbang; bilan bingu raak takik, tukvak mek ia hani lac 15 harei sa mbang.

Tui kuhria, sa thùng dar ko meda mek hu 4 lít ia hani sa mbang; yaom pablei urak ini, lac 400.000-500.000 đồng sa lít. Tapa nan, daong ka sang sa-ai Toàn hu jien mek tame biak rilo yaok bilan, daok jien mek tame meng phun mbang baoh lac labaih 100 triệu đồng sa thun. Sa-ai Toàn brei thau: “palei drei hu rilo bein phun mbang baoh tabiak bingu luac thun nan ye dahlak sahneng lac meda ngak tabiak pandap bahrau piah hu jien mek tame rilo jang. Hadei di sa tukvak duah thau, dahlak mboh bruk raong dar ko mek ia hani di urang daok di huyện Long Mỹ (Hậu Giang) hu kein laba glaong nan ye bac megru tui, ba mai ngak di bein phun mbang baoh di sang drei”.

Meng rilo bruk ngak nong hu kein laba, urak ini, jien mek tame kuhria rah tapa di rahra Đại Thành hu labaih 70 triệu đồng sa urang sa thun. Xã daok kham merat jak ba, daong palagaih ka bhap bini salih phun pala, janih raong tui prein khang di palei. Gam haong nan, oh padeih pambak praong dom bruk ngak kinh tế hu kein laba glaong piah ka bhap bini ba gauk ngak yau ye bruk pala durian, panat, sak mao (chôm chôm)…

Urak ini Đại Thành hu 15ha panat hu brei harak chứng nhận mek hu chuẩn VietGAP saong labaih 10ha sak mao hu urang nong ngak tui jalan thau hu asal di nyu. Saong xã daok peih bruk brei ka bhap bini tut angan 6 mã số bhum pala di phun panat, haong taneh praong labaih 103ha dalam abih tih jaik 480ha panat di xã…

Ong Lê Hùng Chiến, Bí thư Đảng ủy xã Đại Thành, brei thau: Thau lac bruk padang ngak palei pala bahrau tok hu labik peih tabiak, oh hu labik padeih nan ye meng hadei di tuk mek hu angan xã palei pala bahrau, blaoh palei pala bahrau paglaong, xã oh bak hatai bo daok bhian ngak ka nyu khang jang, paglaong siam mekre dom tiêu chí palei pala bahrau, palei pala bahrau paglaong piah hu pok brei angan veik yaok thun saong khik ka thun hadei glaong jang thun dahlau tui yaok tukvak. Langiu di nan, bruk pakhang, paglaong siam mekre dom tiêu chí palei pala bahrau daok hu rik daong praong dalam bruk oh padeih paglaong raidiuk, mbang ngui, daok dang ka bhap bini yau asal praong di danak dak padang ngak palei pala bahrau daok pamaong tal./.