Sang daok dalam angan sang kan kathaot, raidiuk gaok biak rilo kan kandah, bahrau ini amuk Đổng Thị Dung, palei Hoài Ni bui sambai lo tuk hu UBND xã Phước Thái, huyện Ninh Phước brei thau, sang amuk hu karja daong 16 triệu đồng meng Danak dak bruk ngak negar patrun kan kathaot khang kajap thun 2023 piah patagok bruk ngak mbang. Meng phun jien ini, amuk Dung blei lamo mai raong. Amuk Đổng Thị Dung brei thau: " Karja daong sang dahlak 16 triệu đồng, dahlak nao ngak pah hu 2 triệu tra buh tame blei 2 drei limo binai saong lamo anek abih 18 triệu đồng..."

Pasang likei palang lahik, sa drei raong 2 urang anek mbang bac nan ye raidiuk di sang amuk Lưu Thị Lý Hoàng Anh jeng gaok oh takik kan kandah. Tuk taduan hu pok jien 16 triệu đồng di Karja daong, amuk Anh jeng buh tame raong lamo: "Karja brei yau nan, drei biak thau dhar phor. Sang drei kan kathaot lo urak ini hu karja daong. Drei uan tabuan lo, oh thau ndom hagait…."

Yaom lac mek hu chuẩn palei pala bahrau meng thun 2015, min dom sang kathaot saong jaik kathaot di xã Phước Thái urak ini jeng daok 160 baoh. Rilo sang kurang phun jien, oh hu bruk ngak tani tanat, nan ye hadei di tuk taduan hu jien daong meng danak dak bruk ngak negar patrun kan kathaot khang kajap thun 2023, jaik abih dom sang kan kathaot jeng buh tame raong lamo. Ong Quảng Trong khan lac: "Karja daong yau nan biak thau dhar phor. Meng jien daong di karja, dahlak jeng hu nao ngak bruk piah hu jien tame".

Piah ka mikva raong hu siam, hu laba, UBND xã Phước Thái hu pambuak bruk haong Bilai pachreih ngak nong, pachreih ngak ikan huyện Ninh Phước peih pato bruk ngak, tacei pato ilamu raong glang. Sa-ai Đàng Quang Nữ Ngọc Thùy, Phaok akaok UBND xã Phước Thái, huyện Ninh Phước brei thau: “Xã Phước Thái daok peih ngak danak dak patrun kan kathaot khang kajap saong danak dak padang ngak palei pala bahrau…”.

Di dom xã bhum urang bangsa Cam di huyện Ninh Phước, langiu di jhul samar bruk peih phun jien Danak dak bruk ngak negar patrun kathaot khang kajap thun 2023, dom puk palei daok hu peih ngak, pambak praong dom bruk pambuak gauk pala, ngak tui chuỗi giá trị, ba mai kein laba kinh tế glaong yau: bruk pala măng tây hijao, nho, medar, ngak padai, pala tangei, njam patam... piah daong ka mikva tabiak truh kan kathaot khang kajap.

Thun ini, huyện Ninh Phước hu parabha brei 31 tỷ 560 triệu đồng meng danak dak bruk ngak negar patrun kathaot khang kajap piah daong ka bhap bini patagok bruk ngak mbang, pala drak. Bruk dom puk palei di huyện Ninh Phước daok jhul samar peih phun jien brei, oh lac ba bruk ngak mbang daong ka mikva tabiak truh kan kathaot, bo daok daong tame bruk padang ngak palei pala bahrau di palei. Ong Nguyễn Hữu Đức, Phaok akaok UBND huyện Ninh Phước, Ninh Thuận, lac: “ Piah mek hu bruk patrun kathaot, rik daong padang ngak huyện palei pala bahrau, huyện ủy, UBND huyện hu tacei pato khang, brei pataom prein tame danak dak padang ngak palei pala bahrau, danak dak patrun kan kathaot. Urak ini, kol dahlak hu parabha phun jien trun dom puk palei, ngak habar pataom tame daong mikva kan kathaot, jaik si kan kathaot, rik daong patrun kan kathaot khang kajap di dalam huyện Ninh Phước anak tal.”

Tui jalan ngak dalam thun 2023, patrun baoh sang kan kathaot daok 2,48% saong paglaong jien mek tame kuhria rah tapa tui akaok menuac tagok labaih 71 triệu đồng sa thun, taphia bruk tacei pato bhap bini jalan ngak mbang, pala drak, patagok kinh tế, huyện Ninh Phước daok pataom tame jhul khang bruk pathau khan, jak ba bhap bini patagok prein khang di drei, plaih hatai sahneng pagam pambak tame bruk daong di karja, piah yam tagok tabiak truh kan kathaot khang kajap./.