Padang ngak palei pala bahrau meng bruk daong prein, pachreih tui di bhap bini

Xã Quê Mỹ Thạnh, huyện Tân Trụ, tỉnh Long An hu brei angan lac palei pala bahrau (NTM) di thun 2015. Ong Nguyễn Minh Hiếu, Phaok akaok UBND xã Quê Mỹ Thạnh khan lac, piah hu yau ini, lac meng hu bruk rik prein, sa hatug hatai haong gauk di Đảng bộ, karja saong bhap bani di labik ini. Min, piah mek hu dom tiêu chí piah pamaong tak xã palei pala bahrau paglaong lac hu gam bruk rik daong di dom kareih camin, dom urang ba akaok nao dahlau, abih di nyu nan lac dalam dom bruk kan kandah yau peih taneh, alin brei taneh ngak jalan, jak ba rik daong... Kapul dama dara xã jeng kham merat pathau khan,  daong ka bhap bani pambak prong dom bruk ngak mbang hu kein laba; padang cảnh quan môi trường tuk halei jeng hijao, hacih, mekre; padang baoh sang trei sil, likei kumei samu gauk, haniem phol... Meng dom bruk ngak cambaih laih di urang jakar, urang đảng, bol bhap rahra hu rik daong ka mbaok meta palei pala Quê Mỹ Thạnh dak harei dak salih bahrau.

Di xã Tân Bình, bruk alin brei taneh ngak jalan palei hu maong yau kadha hadah mekre di xã dalam bruk padang ngak palei pala bahrau. Ong Nguyễn Ngọc Thanh Phương, Bí thư Đảng ủy, gam lac akaok UBND xã Tân Bình yaih khan lac, tuk ba tabiak bruk alin brei taneh, harei ngak piah ngak jalan palei, xã tuk halei jeng taduan hu bruk pachreih tui di bhap bani. Dalam nan mbluak di abih lac sang ong Phạm Đăng Nguyên daok di  ấp 4 halar hatian alin brei 200m2 taneh piah ngak jalan Nguyễn Văn Bun. Tuk jalan hu ngak blaoh, ong Nguyên daok dang tabiak jak ba gauk gar rik daong labaih 40 triệu đồng piah ngak cổng ấp ilamo. Urak ini, hu jalan nao mai siam gheih, prong laneing, hacih sa-at, mikva thei jeng bui sambai.

Tui jalan ngak lac padang xã palei pala bahrau meng bruk ngak sit di abih, xã Tân Hòa, huyện Tân Thạnh taduan hu bruk pachreih tui di bhap bani, rik daong tame saong pambak prong rilo bruk ngak gheih, jalan ngak siam. Mbluak di abih lac bruk ngak jalan bingu kiểu mẫu hu padang ngak meng di thun 2019, atah 7km. Tui nan, hadei di tuk palei ba tabiak bruk, oh thei pandar thei, dom baoh sang daok tapen jalan ini hu pala rilo janih phun bingu anak sang piah ngak brei mekre puk palei. Ong Nguyễn Văn Nam, xã Tân Hòa khan lac: “Sang dahlak biak pachreih tui saong rik daong haong puk palei dalam bruk pala bingu tapen jalan anak sang. Dahlak bhian tabiak pasang iek phun bingu, ngak hareik, cakak dhan, pruh aia... Meng harei hu jalan bingu ini, tuk nao ngak mai sang, mboh bingu sraoh nerak, dahlak mboh bui sambai saong hatung hatai mboh chreih chrai jang”.  

Padang ngak saong cak rok bruk ngak jalan bingu kiểu mẫu di xã Tân Hòa nan lac bruk dui pachreih piah salih bahrau jalan saneng di bhap bani dalam bruk pacang caga saong khik ramik vệ sinh môi trường, rik daong paglaong  tiêu chí padang ngak palei pala bahrau.

Tuk daok diuk, Wa Hồ bhian ndom lac: “Mbuan rituh mbang oh hu rahra oh ngak hu hagait, kan pluh ribau mbang hu rahra ngak jeng blaoh”. Ngak tui panuac Wa pato, dom pakat, dom gah di huyện Tân Trụ, tỉnh Long An tuk halei jeng sangka tal labik dang di bhap bani dalam peih ngak dom bruk pakacah gauk ranam taneh aia, dalam nan hu bruk padang ngak xã palei pala bahrau. Bruk ini brei mboh lac, bhap bani lac “asar” biak prong, rik daong tame bruk dak padang taneh ia, palei negar dak harei dak siam mekre, kaya meda./.

Urang lang: Jasi – 10/08