Hu tal labaih 20 ribau phun pajaih Hồng nhung, saai Lý Thị Thanh Xuân, daok di puk Phước Thuận, xã Phú Tân, huyện Châu Thành khan lac, sang saai kak kajap haong janih phun ini hu labaih 5 thun ini mai, tuk hu karja palei daong palagaih piah hu masaiy jien piah ngak mbang, pablei salih. Tuk camriep, saai tok blei baoh tame, pilih ruah dom janih baoh hu asal piah pabam pajaih. Hadei di sa tukvak ngak, pajaih phun Hồng nhung dak harei dak cak rok patagok, peih praong bruk pala tagok tal yaok piluh ribau phun pajaih. Urak ini, saai Xuân pablei salih sỉ saong lẻ. Tui kuhria, yaok thun, saai mek hu labaih 70 triệu đồng jien laba meng bruk pablei salih janih phun ini.

 “Labik ngak di dahlak urak ini hu pablei asar pajaih, pablei phun praong sit tui hatai caong di urang blei, gam dom phun daok tabiak baoh. Phun praong ye pablei tui hatai caong, phun sit ye yaom lap jang. Urang hu mbaok tame pabam pajaih, blaoh pablei ka kapul pambuak gauk ngak. Yaok phun yau nan, dahlak blei mai yaom 10.000 đồng. Tui yaok phun praong sit, jhak atau gheih”

Meng siam lagaih di bruk ngak, hu bruk daong di karja palei, saai Xuân padang kapul pambuak bruk Pabam pajaih phun Hồng Nhung xã Phú Tân, dui pachreih hu 10 urang hu mbaok tame. Meng nan ba bruk ngak, jien mek tame ka mikva tuk lahaiy. Tal urak ini, raidiuk di dom urang dalam kapul jeng hu tani tanat.

Châu Thành lac sa dalam dom palei hu rilo mikva Khmer daok di tỉnh Sóc Trăng. Tukvak tapa, dom pakat ủy đảng, kanja kham marat peih ngak siam dom sarak di Ndang saong Kanja ngan haong mikva bangsa Khmer, yau daong padang ngak sang daok, daong phun jien ngak mbang, salih bruk ngak, pato bruk ngak, yaih khan bruk ngak, daong ilamo pala ngak.

Daok khik iek sang bahrau di urang anek daok ngak bruk di tỉnh Bình Dương, ong Liên Phol, lac sang kan kandah di xã Phú Tân, brei thau lac, sang kan kathaot, nan ye dom anek di ong klaak palei nao ngak mbang atah. Baoh sang ini bahrau hu karja palei daong tui danak dak bruk ngak negar, ong biak chreih chrai, uan tabuan, kayua dom anek hu baoh sang khang kadang piah daok tuk mai rivang palei:

“Kanja daong ka anek dahlak, dahlak biak uan tabuan, uan ka anek dahlak hu sang daok khang kajap, dahlak oh hu hagait piah daong ka anek, urak ini hu kanja daong dahlak biak thau dhar phol”.

Bruk pato tacei peih ngak siam Danak dak bruk ngak negar ka palei pala bahrau, patrun kan kathaot saong cak rok patagok kinh tế, xã hội bhum bangsa takik di palei hu daong ka phum sóc oh padeih salih bahrau mbaok mata. Ong Trương Quốc Điền, Akaok UBND huyện Châu Thành brei thau, peih ngak danak dak bruk ngak negar ka cak rok patagok kinh tế xã hội bhum bangsa takik, vaktu 2021-2025, huyện hu peih ngak rilo danak dak, danak dak sit, samar drah daong tal tangin mikva bangsa takik samar hu jalan patagok bruk ngak mbang, parilo jalan ngak, daong taneh daok, sang daok. Tal urak ini, bruk brei masaiy jien ka dom danak dak ini mek hu abih tih jalan ba tabiak, daong ka dom baoh sang kan kathaot lac urang bangsa takik trun khang. Huyện kham marat tal puac thun ini, dom baoh sang kan kathaot trun daok mala 4%. Urak ini, dalam huyen hu taong abih 7 xã mek hu tanut chuan palei pala bahrau, dalam nan, 1 xa mek hu tanut chuan palei pala bahrau paglaong saong rilo meng lac ngak salah dom asal kadha huyen palei pala bahrau.

“Piah ngak hu dom bruk ba tabiak lac trun aoh sang kan kathaot daok mala 4%, huyện ba tangin tame padang ngak rilo bruk, ba tabiak rilo harak pato tacei pataom prein tame peih ngak, abih di nyu nan lac peih ngak siam danak dak bruk ngak negar cak rok patagok kinh tế-xã hội bhum bangsa takik. Ini lac sa dalam dom prein khang biak praong daong ka mikva bangsa takik, jang yau buh jien tame ngak kết cấu hạ tầng di bhum palei pala”.

Danak dak bruk ngak negar, sarak bangsa daok peih tabiak raidiuk trei sil, ginup meda ka mikva bangsa Khmer tỉnh Sóc Trăng saong abih di nyu nan lac di huyện Châu Thành, puk palei jeng meng nan hu salih bahrau mbaok mata tapa yaok harei./.