Sa-ai Nguyễn Văn Sơn, daok di xã Minh Tân, huyện Dầu Tiếng, tỉnh Bình Dương dahlau daih lac cử nhân sang bac Đại học Kinh tế TP.HCM. Thun 2013, hadei di tuk bac tamat, sa-ai peih trang trại Nam An di angaok taneh praong labaih 30.000m2 di huyện Dầu Tiếng (t.Bình Dương) piah pala njam hacih.

 Njam khut saong labaih, sa-ai Sơn blei pabui glai “lai” mai raong. Mboh pabui glai lai ba mai kein laba glaong nan ye sa-ai salih tapa raong pabui saong eng drei pabak hu labaih 80% pandap mbang ka pabui. Meng var raong sit sot, saai  Sơn buh jien tame ngak tui jalan automatic di dom công đoạn nan ye trun hu urang ngak saong mbuan tui iek tapon pabui. Urak ini, yaok thun, trang trại Nam An mek jien tame hu 60-70 tỷ đồng, laba hu meng 20-25%.

Sa-ai Sơn brei thau, jien buh tame ngak trang trại abih rilo min laba oh tani tanat nan ye saai peih xưởng ngak dom pandap meng ralow pabui, pablei tabiak darak pasar: “Darak pasar di Việt Nam oh tani tanat saong oh ka hu sarak khik caga urang nong. Urak ini karja hu rilo sarak daong min jeng oh ka ba mai bruk tani tanat ka urang nong. Nan ye Cty hu ngak tabiak dom kaya pandap akaok - iku piah paglaong yaom kaya nong tagok, daong tani tanat yaom kaom kaya pandap drei ngak tabiak”

Meng hatai sahneng lac “caong nao samar ye nao sa drei, khin nao atah ye nao haong gauk”, dom thun tapa, HTX ngak nong kong nghe glaong Kim Long daok di huyện Phú Giáo (t.Bình Dương) hu 73 urang hu mbaok tame pala dưa lưới angaok taneh praong 20ha. Dom urang dalam HTX langiu di bruk daong gauk duah labik pablei, daok tacei brei gauk thau ilamu pala - ngak, pandar kong nghe. Urak ini, dom urang dalam kapul thau pala dưa lưới dalam sang tui kong nghe Israel, pandar jalan pruh ia, buh khak automatic saong meteh automatic…

Ong Nguyễn Hồng Quyết, Yam ndok HTX Ngak nong kong nghe glaong Kim Long khan lac, pandar ilamu kong nghe glaong tame ngak, sản lượng tagok hu jaik 30%, phun jien trun hu 20%, nan ye urang dalam kapul khang hatai buh jien tame ngak yaom lac phun jien buh tabiak tuk camereip biak rilo. Ong Quyết daok ndem lac: “Kol dahlak daok salih số tui jalan ngak di Karja. HTX Kim Long kak je jeng pandar điện tử. Thun 2022, HTX ngak nong jeng pandar “nhật ký” mblang hamu điện tử meng phần mềm di Nhật Bản daong brei, meng nan tuai blei pandap meda duah thau hu asal di phun pala mbuan lagaih, cambaih laih”

Urak ini Bình Dương hu jaik 5.763ha taneh ngak nong pandar kong nghe glaong. Dalam tỉnh hu 80 labik hu brei harak lac ngak tui jalan VietGAP dalam gah pala drak. Piah ka bruk ngak nong kong nghe glaong cakrok khang kajap, Bình Dương hu rami ramik 4 labik ngak nong kong nghe glaong di dom puk palei haong taneh praong labaih 979ha.

Gah raong glang, dalam tỉnh hu 974 trang trại praong abih tih labaih 3.800ha. Langiu di dom sang raong sit sot, Bình Dương hu 3 danak dak raong praong pandar kong nghe glaong. Piah ka bruk raong glang hu kein laba, tỉnh Bình Dương hu caik hatai sangka daong palagaih ka dom trang trại.

Ong Nguyễn Thanh Trung, Taong Yam ndok Cty cổ phần Anova Agri Bình Dương, bhian raong lamo ia tasau brei thau: “UBND tỉnh, jeng yau dom gah, dom pakat, cambaih laih lac gah thú y saong Sở Ngak nong saong patagok palei pala hu daong kol dahlak padang ngak danak dak. Kol dahlak hu daong brei biak rilo yau ye daong gah kak je, daong palagaih piah blei jamriak mac moc mai ngak, oh gaok kan kandah hagait". 

Bình Dương pamaong tal bruk lac tal thun 2025 meda ba yaom kaya nong, kaya glai, kaya ikan tagok 2,5 - 3% sa thun, patagok yaom kaya pandap ngak nong pandar kong nghe glaong meblah labaih 30%; taneh pala kaya nong hu brei harak lac mek hu tanut chuẩn GAP meblah 20%.

Piah ngak hu yau nan, Bình Dương jeng hu tabiak Sarak pachreih patagok ngak nong tui jalan ngak nong đô thị, ngak nong pandar kong nghe glaong. Tui nan, urang nong hu mesraiy phun jien yaom laba lap piah ngak mbang haong tukvak mesraiy lac dalam 8 thun. Langiu di nan, Kapul urang ngak nong tỉnh jeng hu pachreih bruk ngak nong pandar kong nghe glaong, ngak nong khang kajap pambuak haong khik caga alam môi trường.

Piah daong ka urang ngak nong salih bruk ngak tapa pandar kong nghe glaong, Bình Dương hu pambuak bruk khang kajap, siam lagaih di 2 gah ilamu – kong nghe saong ngak nong. Tỉnh kham merat peih ngak samu gauk dom jalan ngak, dom sarak daong patagok ilamu – kong nghe dalam gah ngak nong, brei tabiak mbaok rilo bruk ngak gheih, jalan ngak bahrau ba mai kein laba glaong./.