Tỉnh Ninh Thuận urak ini hu 113 hợp tác xã (HTX), hu 18.846 urang, taong abih phun jien tut angan lac jaik 220 tỷ đồng. Dalam nan, hu 85 HTX ngak gah ngak nong; 10 HTX tiểu thủ kong nghiep; 8 HTX pablei salih dịch vụ tổng hợp; 7 HTX ngak gah pajeng ba; 3 Kadung jien brei mesre di bhap bani.

Dom HTX ngak nong cak rok patagok biak tani tanat, dak harei dak brei mboh labik dang praong di kinh tế kapul nyaom dalam bruk ngak tabiak di palei pala tui jalan ngak mbang “caong khin nao atah ye nao haong gauk”. Dom HTX pambuak haong doanh nghiệp, ngak tabiak dom chuỗi giá trị pandap panda siam glaong, pabak hatai caong khin di darak pasar. Dom janih pandap panda kaya nong biak karei di tỉnh Ninh Thuận hu urang blei pandar dalam negar thau tal yau: Jadar nho, mang tay xanh, lasun, toi, padai hữu cơ, amriak, pabe pabo, pabui juk, menuk palao bein…

Bahrau ini, khaol dahlak mai rivang HTX Châu Rế (xã Phước Hải, huyện Ninh Phước) taom gaok dom sang urang Cam dalam HTX daok pajeng ba măng tây xanh mai teik pablei ka HTX. Sa-ai Kiều Văn Thị Tuyển pajeng 10 kg măng tây xanh mai teik ka HTX, sa-ai bui sambai khan lac, meng hu HTX  jak ba pala măng tây xanh saong blei veik pandap daong ka mikva hu rai diuk trei sil. Baoh sang sa-ai Tuyển pala 3 sào măng tây xanh, jien mek tame yaok bilan 10- 12 triệu đồng, raong 4 urang anek nao mbang bac jeng manuac jeng urang.  

Urang dang akaok HTX Châu Rế lac Châu Thị Xéo hu mikva iek prong pok ngak urang dang akaok dalam bruk pala phun “njam patao“ di Ninh Thuận, sa-ai hadah mbaok meta hu Kapul urang nong pakat negar pok brei angan Urang nong naih joi thun 2022. Sa-ai Xéo brei thau, nhiệm kỳ meng bloh, HTX jak ba hu 50 sang dalam HTX pala 10 ha phun măng tây xanh saong 20 ha taneh pala phun njam patam katut harei. HTX taduan hu 1.461 triệu đồng di tỉnh Ninh Thuận daong ka pajaih măng tây xanh, jru pacang khik phun pala, jalan ba aia pruh patak pataom. Langiu di bruk pala phun măng tây xanh ngan haong jien mek tame meng 60 - 70 triệu đồng/sào/thun, dom sang dalam HTX daok hu jien laba meng di bruk pablei salih di HTX nan lac 48 triệu đồng sa sang sa  thun; jien mek tame kuhria rah tapa di urang jakar khik iek HTX 36 triệu đồng/urang/thun.

Sa-ai Hùng Ky, Akaok HTX Tuấn Tú (xã An Hải, huyện Ninh Phước) brei thau, doanh nghiệp hu padang tagok saong tame bruk ngak meng di thun 2016 ngan haong 5 ha di 25 sang dalam HTX. Tal harei ini, HTX tagok jeng 55,6 ha măng tây xanh di 85 sang dalam HTX, dalam nan hu 35 ha pala drak tui jalan mblang hamu praong. Kuhria ta-eng thun 2022 meng bloh, dom baoh sang dalam HTX mek tame, pabak brei ka HTX labaih 51 ribau kg măng tây xanh. Jien pablei pandap di HTX mek hu labaih 3 rabau tỷ đồng. Rabung that hijao di HTX Tuấn Tú mek hu angan OCOP 3 patuk pakat tỉnh thun 2022. HTX Tuấn Tú hu UBND tỉnh Ninh Thuận pok brei Hala dok pakacah thun 2022.

HTX daok kham merat tal puac thun ini, mek hu 60 tấn rabung that hijao, kein laba dịch vụ HTX mek hu labaih  300 triệu đồng. HTX buh jien tame blei mac moc công nghệ bahrau piah ngak tabiak tea măng tây VietGAP Tuấn Tú, pablei tabiak darak pasar, paglaong chuỗi giá trị pandap pandap măng tây xanh.

Ong Lê Hoài Nam, Akaok Liên minh HTX Ninh Thuận brei thau, dalam tukvak anak tal meda pambuak bruk brei panuac ka UBND tỉnh, Liên minh HTX Việt Nam patui veik peih ngak dom sarak daong, pachreih, cak rok patagok HTX yau: daong peih ngak kết cấu hạ tầng; HTX hu mbaok tame chuỗi giá trị di Liên minh HTX Việt Nam; daong ilamu khoa học saong công nghệ; hệ sinh thái khởi nghiệp saong salih bahrau dalam tỉnh Ninh Thuận; peih tal pato pathram tacei ba bruk khik iek, peih ngak blah pablei salih điện tử di “Darak pandap panda trực tuyến” ka dom doanh nghiệp, HTX, tổ hợp tác nan lac kapol nyaom, urang di dom Liên minh HTX Việt Nam. Patui veik jak ba dom pren khang cak rok patagok bruk ngak di kinh tế kapul nyaom, paglaong chuỗi giá trị pandap panda di tỉnh, patagok jien mek tame, paglaong rai diuk dom sang dalam HTX, kham merat paglaong dom tanut xã, huyện mek hu chuẩn palei pala bahrau./.