Vacxine hu parabha ka rilo tỉnh ban piah klauk ka bhap bini 

Page 10/11, javap calei di var tangi sua di QH, Akok Mentri Y tế Nguyễn Thanh Long brei thau, tukvak tapa, dalam negar hu peih bruk klauk jru vaccine biak siam, mbiah tal ini hu klauk ka 94 trieu urang. Urak ini, tapa dom jalan karei di gauk, Việt Nam hu pambuak bruk blei jaik 200 trieu mbang jru vaccine. Akok Mentri Y Tế Nguyễn Thanh Long kakei lac, urak ini, dom palei mboh lac jit COVID-19 daok tagok gilac, bruk nan biak huac. Dom bhum palei brei klauk jru vaccine dak samar dak siam piah takik njom ruak saong takik plang lahik kayua Covid-19.

MBan khik ramik jalan pasei đô thị TP.HCM brei thau, dom kapul nyaom daok peih bruk padang ngak jalan pasei labik jalan lubang puac abih di jalan metro ka 1 (Bến Thành - Suối Tiên) meng ga Nhà hát ban raya nao ga Bến Thành. Labik jalan lubang puac abih atah 660m. Tal urak ini, dom bruk ngak di danak dak metro ka 1 hu jaik 88%. Jalan metro ka 1 atah 19,7km dahlau di nan hu caong lac ngak salah di puac thun 2021. Min jit ruak COVID-19 ngak kan kandah tal bruk padang ngak. UB bhap bini ban raya HCM brei thau, tapa taong yaom oh ka ginup abih, mboh lac bruk ngak salah saong ba tame pandar di thun 2022 lac bruk oh ngak hu.

Bình Thuận urak ini hu 2.207 urang njom Covid-19 daok taong ruak di labik y tế saong mbiah tal jala pandiak 9/11 hu 279 urang njom ruak, dalam nan hu 153 urang ruak dalam bhap bini, . UB bhap bini tỉnh Bình Dương saong Covid-19 hu pajeng ba tal Bình Thuận 1.000 gaiy laneing ndih saong  hu pagam 1.000 kadik điện , pabak tame dom labik iek taong ruak Covid-19 dalam tỉnh. Kuhria tal 9/11, dalam tỉnh Bình Thuận hu 7.054 urang njom ruak Covid-19 saong 68 urang metai

Sở Y tế tỉnh Bà Rịa - Vũng Tàu bahrau tabiak jalan peih bruk klauk vaccine caga COVID-19 ka 118.913 uranaih umo meng 12-17 thun daok dalam tỉnh, tui jalan ngak lac klauk dahlau ka umo meng 16 tal 17 thun, hadei di nan, klauk ka umo sit jang. Daok uranaih nao bac (huyện Côn Đảo daok brei bac tapak di sang bac), klauk di sang bac atau labik klauk hu gah pato megru pilih ruah, khik kajap salamat bruk klauk jru saong pacang caga jit COVID-19. Tui kuhria, tukvak klauk mbang klauk ka  1 di sang bac meng harei 12 tal harei 15/11; klauk di puk palei meng harei 16 tal harei 18/11.

Pambuak tal bruk pajeng ba 6 pa-op Heroin saong jaik 1 kilo matuy patau meng Campuchia mai Việt Nam, hadei di rilo harei langyah sơ thẩm, Tòa án bhap bini tỉnh An Giang  taong phạt dua urang lac Trần Văn Giang (daok ieu lac Trương Văn Giang), daok di tỉnh Tiền Giang saong Hồ Minh Nhật, daok di Ban raya HCM daok guk abih rai kayua duis “ Pajeng ba suan hukum matuy”. Hu thau, melam 4/7/2020, dua urang nan njauk chap mek tuk pajeng matuy biak ralo tame negar suan hukum.  Giang saong Nhật taduan lac pajeng apah ka urang dom matuy nan meng negar Campuchia mai Ban raya TP.HCM.

Quốc hội negar Japon harei ini (10/11) peih mbang nyaom biak karei, tui nan, meda lac urang dang akaok Đảng Dân chủ Tự do, lac ong Ki-shi-đa Phư-mi-ô (Kishida Fumio) meda hu pok ngak veik Thủ tướng hadei di tuk đảng di ong hu rilo menuac hu pilih ruah dalam mbang bầu cử Hạ viện di harei 31/1. Hadei di mbang nyaom nan, Đảng LDP meda ieu peih mbang nyaom Quốc hội bất thường piah brei tapa kadung jien karja pabak ka thun jien padai 2021, tui kuhria yaom 266 tỷ USD, dalam nan hu dom jalan ngak pachreih kinh tế, patrun kan kandah di jit praong COVID-19.

        Hãng tin Reuters harei ini (10/11) brei thau, Hãng jru Pfizer di Mỹ hu payua harak tagok  Mentri Y tế Nhật Bản brei harak adat pandar vaccine Covid-19 ka uranaih umo meng 5 tal 11 thun. Mbiah tal ini, Nhật Bản hu brei adat pandar vaccine pacang Covid-19 di Pfizer/BioNTech, AstraZeneca saong Moderna. Dalam nan hu vaccine Comirnaty di Pfizer  klauk ka urang umo 12 thun tagok. Meyah hu Mentri Y tế  Nhật Bản njauk hatai, ini lac vaccine akok meti  hu pandar kla uranaih umo ala 11 thun di taneh ia ini.

       Jabat athur  saong Thú y Singapore brei thau, 4 drei rasing (sư tử) châu Á di bein athur Night Safari tapa dut iek mboh lac dương tính haong SARS-CoV-2 hadei di tuk taom gaok dom menuac ngak  njaom COVID-19, dom athur nan nyu patuk, dhung phal saong var drei jan. Sa drei rasing châu Phi jeng mboh lac njaom mbak ruak. Urak ini, taong abih 9 drei rasing châu Á, 5 drei rasing châu Phi haong dom drei athur njauk COVID-19 nan daok hu brei daok karei. Dom bruk parang iek rasing châu Á di bein athur ini jeng daok brei kreik pabah mbang./.

Urang lang: Mousaphuong-Ái Nghiêm -10/11