Hu veik 22.654 urang brei klauk jru vaccine caga Covid-19  harei 18/7. Yau nan, mbiah tal ini dalam negar hu klauk abih bih 4.283.906 mbang vaccine, dalam nan hu 3.977.431 urang hu klauk sa mbang. Hu 306.475 urang hu klauk ginup 2 mbang. Mentri Y te brei thau: Bhap bini umo meng 18 thun tagok meda tut angan klauk jru vaccine Covid-19 ka drei tapa blah web tiem chung Covid-19.

Kuhria tal harei 18/7, hadei di 4 harei ba tame ngak bruk, sang iek ruak Hồi sức Covid-19 (ban Thủ Đức, ban raya HCM) hu taduan 160 urang ruak trak saong biak trak, dalam nan hu sa urang njauk suak yava meng ECMO. Di pak ni, yaom lac pandap panda ka oh hu ginup, min dom y bác sĩ daok kham marat piah taong ruak ka dom urang ruak Covid-19 trak. Urak ni dom bác sĩ daok kham marat abih drei piah taong ruak ka urang ruak. Sang iek ruak meda daong suak yava ka 1.000 urang ruak, hu 100 papan ndih daong prein ka urang ruak biak trak, 900 papan ndih ka urang ruak trak. Tui jalan ba tabiak, sang iek ruak meda patagok parilo dom jamriak hồi sức cấp cứu ECMO, jamraik halang darah, jamraik suak yava pakat glaong saong manuac ngak ginup ka 1.000 papan ndih iek ruak.

Ban raya HCM hu labaih 2.000 labik pacang veik piah pacang caga jit Covid-19, rilo quận, huyện hu yaok rituh labik ngan saong yaok ribau baoh sang bhap bini. Bruk sangka daong ka bhap bini labik pacang veik jeng daok ngak tui hatai, tui prein di yaok labik,  nan ye rah tabiak bruk labik kurang, labik labaih, labik oh hu, labik hu ye daok hu veik. Bhap bini di dom labik pacang veik caong khin hu bruk klak rabha  piah oh hu thei njauk caik veik gah likuh dalam tuk jit ruak ini.

Dom harei tapa, anak bruk njom mbak sarau kadhau di jit Covid-19, rilo menuac di ban raya HCM nao duah blei jamraik ngak tabiak oxy, bình oxy piah caga dahlau. Mintri Y tế saong ban raya HCM sanya lac oh kurang jamraik suak yava ka urang ruak, nan ye bhap bini jhui huac. Bhap bini jhui  blei, caga jamraik suak yava kayua, ngak yau nan nyu palai pajoa jien padai kayua eng drei oh pandar hu, bo daok ba tal kurang pandap, ngak brei dom labik y tế, sang iek ruak meda oh blei hu jamriak ka manuac ruak daok caong meyah jit ruak  rah tabiak khang jang.

Dalam dom harei tapa, njam patam, baoh karaoh ba tame Ban raya hu tuk gaok kan kandah. Piah patagok parilo pandap mbang ka Ban raya HCM, meng harei ini meda hu 40 tấn njam patam baoh kraoh hu ba meng tỉnh Tiền Giang, Bến Tre tame TP.HCM meng kapal cao tốc. Dom njam patam baoh kraoh  nan hu 2 kapal capal cao tốc di hãng Greenlines DP daong pajeng ba. Xăng menyek kayua Petrolimex 2 daong abih. Hãng kapal  Greenlines DP  caga blaoh 5 kapal cao tốc meda pajeng hu 100 tấn yaok harei meng dom tỉnh gah Pei meraong negar lac labik hu rilo njam patam baoh karaoh saong hu rilo pabah lamnge brei kapal pataok tame mai Ban raya.

Dom urang njom COVID-19 di negar Anh daok tagok veik dalam dom adit jaik di ni, ngak ka negar ni daok dang anak bruk mbuan tamuh jit ruak bahrau, min rajaei di Thủ tướng Anh Bô-rít Giôn-xơn jeng daok brei klaak dom jalan pacang caga jit, klaak bruk paatah di gauk saong oh pacap cuk pataih pacang mbaok di labik hu rilo manuac meng harei ni 19/7. Bahrau 3 harei dahlau, negar Anh hu 51.870 urang ruak dalam 24 maong tapa, lac glaong di abih kuhria tui harei meng di kreih bilan 1.

Yaok ribau urang pataom gauk trun jalan jaik sang glaong rilo tal di rajaei pak ban ine Băng-cốc di Thái Lan biar harei 18/7 piah cagar veik rajaei di Thủ tướng Pra-dút Chan-ô-cha.  Hu bruk taong gauk khang rah tabiak tuk cảnh sát kham pacang manuac tame dom labik praong di karja. Bruk jak gauk trun jalan rah tabiak oh huac jit di Thái Lan daok tamuh tabiak khang tuk dom  urang njom Covid-19 birau yaok harei tagok tal 11 ribau urang.

  Bol bala Cô-lôm-bi-a harei kabroi hu pacang sa sruh glai pajeng jru phin ma tuy di labik langiu tasik negar ni, cap khik abih tih 1 tấn mateh cocaine. Hu takik di nyu 5 urang di glai daok njauk cap khik. Yaom lac hu tapa rilo pluh thun jhul khang dom kham marat dalam bruk mesuh pacang caga ma tuy jru phin, min Cô-lôm-bi-a urak ni jeng daok lac sa dalam dom negar ngak tabiak cô-ca-in dang akaok di dunya./.

Urang lang: Thu Thao & Ai Nghiem - 19/7/2021