Rilo siêu thị hu padang tagok dong ka urang kan kathaot 

Page harei 2/7, Metri Y tế brei thau hu 151 urang dương tính nCoV, hu 147 urang dalam negar saong 4 urang tame mai meng negar langiu hu ba daok labik karei. Dalam nan, 118 urang njom ruak di Ban raya HCM, daok veik di Phú Yên, Đồng Nai, An Giang, Long An, Nghệ An, Đồng Tháp, Hà Tĩnh, Khánh Hòa saong Bình Phước. 122 urang dalam dom urang nan hu duah mboh di labik daok karei atau labik pacang caga. Taong abih  dom urang njom ruak dalam bhap bini kuhria meng harei 27/4 mbiah tal ini lac 14.335, di 51 tỉnh, ban.

Tổng công ty jalan pasei Việt Nam brei thau lac meda pandar bruk bayar harak  vé radaih pasei  tapa  tin nhắn phone tangin ka tuai njauk brei dok karei atau daok dalam labik paatah di gauk. Tuk vak bayar harak vé hu pandar dahlau di tuk radaih peih, hu peih ngak angaok labik pablei harak vé điện tử. Tuai damuai meda khik veik jien harak vé song pandar piah nao di tuk vak karei meng jalan pasei dalam thun ni, hu bayar veik jien meyahoh pandar abih   

Sở Pato megru Ban raya HCM brei dut ruak samar Covid-19 ka taong abih anek saih saong urang jakar, gru pato, urang ngak bruk hu mbaok di mbang pakacah tamat THPT mbang 1 thun 2021, rah tabiak dalam 3 harei lac 6,7 saong 8/7. Tui nan, taong abih urang jakar, gru pato, urang ngak bruk pakacah saong labaih 89.000 anek saih hu mek mau dut iek Covid -19  di harei 3/7, tui jalan mek rilo mẫu sa mbang. Kuhria taong abih urang hu mbaok tame mbang pakacah lac labaih 17.000 urang jakar, gru pato, urang ngak bruk saong 89.275 anek saih.

Mesup 2/7, hadei di tuk taduan hu panuac khan  ka 2 urang mboh yau njom  Covid-19, karja  huyện Châu Đức, tỉnh Bà Rịa-Vũng Tàu brei pacang veik 1 tổ dân cư, drak pasa xã Sơn Bình Tổ 9, palei Tân Bình, xã Sơn Bình hu  50 boh sang song labaih  200 urang. 2 urang mboh yau njom lac duik pasang  hu pagam tal sruh jit  di pasa  Bình Điền, TP.HCM. Gah  chức năng peih bruk pruh jru pametai anek ruak di  tổ dân cư nan song dom labik bo 2 urang ni hu nao tal. Urak ni duah hu yaok pluh urang  F1 song ba brei dok di labik karei.

Tui Pasak kuhria duah mboh dahlau bruk langik tasik negar, harei saong melam ini 2/7, rilo labik dalam negar harei pandiak, hu labik pandiak biak khang, nhiệt độ tagok tal labaih 39 độ C. Piah khik caga prein yawa, dom bac si  kakei mikva brei takik tabiak langiu langik pandiak meng mong 10 mesup tal mon 4 biar harei. Dom urang daok dalam duk bilik la-ar juai tabiak gah langiu chip, brei tagok nhiệt độ pandiak dalam bilik atau daok padeihdi labik  halui dahlau di tuk tabiak gah langiu.

Gah Y tế dunya hu panuac brei thau Giải chaoh blong  prong di châu Âu gam song rilo menuac urang di rilo negar nao mai rilo jang dalam bilan hè dok pambak virus Delta di grauk châu Âu, ngak ka urang njom di bhum taneh ini tagok veik mbang camereip hadei di labaih 10 adit trun daok takik. Hu thau, harei  1/7, urang njom Covid-19 di châu Âu tagok labaih  10% dalam 1 sa adit tapa.  Rajaei rilo negar  châu Âu urak ni dok hu panuac oh njauk hatai bruk  y tế di Liên đoàn chaoh blong  châu Âu – UEFA.

Karja Tổng thống Mỹ Joe Biden  brei thau lac meda padang dom kapol nyaom caga Covid-19 dalam negar piah pacang caga bruk njom mbak ruak di biến chủng Delta. Dom nyaom ini brei pambuak bruk saong dom bhum mbuan tamuh jit ruak , pataoam tame jhuk pakhang bruk klauk jru caga ruak  Covid-19, duah dom urang hu taom gaok manuac ruak saong taong ruah ka dom urang njom ruak. Pasak pasang iek saong Pacang caga jit ruak Mỹ brei thau, urak ini hu 1.000 labik gah Meraong saong Trung Tây negar Mỹ hu urang klauk jru caga ruak ala 30%, mbuan njom mbak biến chủng Delta glaong abih. 

Hadei di 2 harei ginum biai di  Kapul pambuak bruk song patagok  kinh tế, 130 negar di dunya  njauk gauk ka bruk kak je takik di abih  15% ngan saong  100 kapul rilo negar prong abih di dunya. Hu jhul tagok meng nyaom biai pakat glong  G7 di  negar Anh meng akaok bilan 6/2021, bruk ni hu mong lac jalan piah mesruh pacang dom kapul nyaom prong bhian duah jalan dauk kak je. Tui kuhria bruk ni hu ba tame pandar  meng thun 2023 song meda ba mai ka dom taneh ia labaih  150 tỷ đô-la yaok thun./.

Urang lang: Ái Nghiêm -Hanipha -2/7