Dalam 6 bilan akaok thun 2021, dalam negar hu rilo bruk ngak suan pambuak tal bruk tham nhũng, kinh te, chức vụ

Page harei 5/8, di Jabat Trung ương Đảng, Mban Tacei jalan pakat negar ka bruk pacang caga tham nhũng peih mbang nyaom ka 20 ala tacei ba di Tổng Bí thư Nguyễn Phú Trọng, Akok Mban Tacei jalan. Di mbang nyaom, Mban Tacei jalan hu ginum biai, brei panuac tacei pato ka bruk ngak dalam 6 bilan akok thun, bruk ngak ka 6 bilan puac thun 2021; dom bruk, dom vụ án di Mban Tacei jalan tui iek tacei jalan ngak hadei di Mbang nyaom ka 19 mbiah tal ini; Danak dak pasiam veik, chức năng, bruk ngak, quyền hạn di Mban Tacei jalan pakat negar ka bruk pacang caga tham nhũng. Dalam 6 bilan akaok thun 2021, dom jabat tố tụng dalam negar birau ba tabiak kaoh tui hukum 1.850 bruk ngak suan ngan saong 3.294 urang gam tal bruk tham nhũng, kinh te, chức vụ dalam nan hu 144 vụ án ngan saong 384 urang gam tal bruk tham nhũng.

Thủ tướng Phạm Minh Chính hu mbaoh tangin brei tabiak Harak Công điện 1068/CĐ-TTg harei 5/8/2021 ieu dom mintri, dom gah, dom tỉnh, ban patagok bruk peih ngak dom jalan pacang caga jit COVID-19. Harak nan vak lac: Dalam tukvak tapa, bruk pacang caga COVID-19 hu labik, hu tuk jeng daok ngak ka oh catang, nan ye oh siam lagaih. Jit ruak jeng daok rah tabiak khang saong meda dui atah, jhak tal prein yava di bol bhap rahra, jhak praong tal bruk cakrok patagok kinh tế - xã hội. Thủ tướng ieu Akaok UB bhap bini dom tỉnh, ban di Trung ương, dom Mintri, dom gah patagok bruk ngak saong pasang iek catang bruk peih ngak dom jalan pacang caga jit tui tacei pato di Rajaei, di Thủ tướng Rajaei, saong pataom tame tacei pato, peih ngak khang jang, siam lagaih jang piah pacang cakak bruk njaom mbak, patrun patakik di abih dom menuac metai, jhul samar bruk klauk vaccine…

Tui Mban khik iek Kadung jien blei vaccine caga COVID-19, kuhria tal 17h00 harei 5/8, Kadung jien taduan hu 8.458 tỷ đồng kuhria gam jien đola. Jien buh tame Kadung nan kayua 504.050 kapol nyaom, urang rik tame. Akok Mentri Jien padai Hồ Đức Phớc caong khin lac, Kadung jien meda ieu pataom prein khang di taong abih bhap bini piah ngak jeng bruk siam gheih rilo birau dalam bruk pacang caga jit ruak. Dalam bruk mesruh saong Covid-19, Đảng saong Karja ba tabiak bruk samar brei klauk vaccine oh abih jien ka taong abih bhap bini piah pacang caga ruak ka rahra. Yau nan min, jien blei vaccine biak praong, meyah tok pambak tame kadung jien karja meda kan pabak sumu bruk kham merat pacang caga jit.

Melam blaoh (5/8), UBND tỉnh Khánh Hòa hu Harak Công điện brei thau lac, daok brei dui atah tukvak pa-atah di gauk tui Sarak 16 dalam 14 harei, meng kreh melam 6/8. Ini lac mbang ka 3 tỉnh ini peih bruk brei pa-atah di gauk dalam bol bhap rahra, mbang ini, bruk pa-ath di gauk hu peih tabiak di abih labik dalam tỉnh. Akaok UBND tỉnh Khánh Hòa ieu dom puk palei, dom gah chức năng ngak catang jang bruk di dom bilai pasang iek dom labik jaik taphia haong tỉnh karei piah pasang iek menuac haong radaih tame atau nao tapa tỉnh Khánh Hòa, abih di nyu lac meng dom tỉnh, ban hu jit; bhian pasang iek, thau cambaih angan menuac Khánh Hòa eng drei meng ban raya Hồ Chí Minh haong dom tỉnh gah meraong mai veik palei piah tui iek, pasang iek catang gah y tế.

Piah khik hu bruk pandar siam lagaih saong asar siam di vaccine hu Mentri Y tế parabha brei, Sở Y tế TP.HCM birau hu sarak iew dom đơn vị samar peih bruk brei klauk jru vaccine di Pfizer saong Moderna hu parabha blaoh. Bruk klauk jru brei ngak salah dahlau harei 8/8. Ngak tui bruk ba tabiak di Mentri Y tế dalam bruk parabha vaccine Pfizer saong vaccine Moderna ye dua janih ini brei khik piah di nhiệt độ meng 2 – 8 độ C, brei pandar abih dalam tukvak suai abih lac dalam 31 harei. Sở Y tế jao Pasak pasang iek ruak kik TPHCM samar dua thau chip bruk peih brei klauk 2 janih jru vaccine nan di dom đơn vị, piah samar parabha ka dom đơn vị karei, brei klauk hu abih vaccine hu parabha blaoh nan.

Di Indonesia, dom menuac metai tagok biak samar dalam dom adit jaik di ini. Jaik abih dom menuac metai nan, lac kayua suai hu taong ruak, kayua dom labik iek ruak tok taduan dom menuac ruak trak, daok veik dom urang ruak karei brei daok di sang atau daok dalam dom labik daok karei pataom gauk di gah langiu sang iek ruak. Dalam tuk nan,, Malaysia hu menuac ruak saong menuac metai yaok harei kayua Covid-19 lac glaong abih kuhria meng dahlau mai. Dalam harei 4/8, taneh ia ini hu veik 19.819 urang ruak bahrau saong 257 urang metai kayua Covid-19. Dalam 6 harei tapa, dom menuac metai kayua Covid-19 di Malaysia jeng lac labaih 130 urang yaok harei .

Dalam harei 5/8, mbang akaok meti Nhật Bản hu urang birau njom ruak dalam harei labaih 15.000, dalam nan ban ine Tokyo hu urang birau njom ruak glong abih lac 5.042 mbang. Hu 6 urang birau njom Covid-19 meng bruk hu mbaok tame Olympic. Urak ini, biến thể Delta daok meblah jaik tal 90% urang birau njom mbak di ban ine Tokyo, labaih 89% di dom tỉnh jaik taphia.

Kapul khik caga takai tasik Mỹ khan lac cap mek hu cocain haong cần sa yaom jaik 1 tỉ 400 triệu USD dalam dom mbang peih bruk mesruh pacang ma túy jru phiel jaik di ini. Ini lac dom ma túy praong abih njauk cap mek kuhria meng dahlau mai dalam bruk ngak di gah khik caga takai tasik Mỹ. Dom ma túy njauk cap mek nan, hu jaik 27 tấn cocain saong 650 kg cần sa. Bruk mesruh pacang ma túy nan hu rilo kapul di gah khik iek takai tasik Mỹ peih ngak, hu bruk daong angaok tasik di lin tasik Canada saong bruk daong meng angaok langik di gah khik iek bhum tapen negar Mỹ./.

Urang lang: M. Phương – Ái Nghiêm – 06/08 10:17:16