Dom mintri dom gah dok caga jit ruak rah tabiak 

Dahlau di abih lac dom khaw tin ndem tal jit Covid-19:

Page harei ini 6/8, Mentri Y tế  brei thau hu 4 urang njom ruak Covid-19, dalam nan hu 3 urang daok di Quảng Nam saong 1 urang daok di Hà Nội, hu pambuak tal Đà Nẵng. Urak ini, 3 urang ruak nan hu brei daok karei, iek ruak di Sang iek ruak Đa khoa Trung ương Quảng Nam. Yau nan, kuhria tal harei ini, Viet Nam hu abih tih 717 urang nyom  Covid-19, dalam nan hu 8 urang metai.

Hadei di 4 harei ngak samar drah, sang iek ruak dã chiến Đà Nẵng hu ngak salah saong jaik ba tame pandar. Sang iek ruak hu ramik ngak di mblang bien Tiên Sơn daok di phường Hòa Cường, quận Hải Châu. Urak ni sang iek ruak praong 100 duk pilik, samu yau 200 manieng. Tuk kurang meda tagok jeng 1.000 manieng. Nan lac sang iek ruak dã chiến taong ruak dom urang njom Covid-19 siam abih di Đà Nẵng urak ni.

Triều Tiên iew taong abih bhap bini mesruh piah pacang jit Covid -19 hu siam lagaih jang. Urak ini, Triều Tiên oh ka hu urang halei njom ruak min bruk pacang caga jit njauk ngak catang. Puac bilan 7 meng blaoh, Triều Tiên pacang cakak abih ban tapen negar Kê-xâng hadei tuk hu 1 urang nduac dauk mai meng Hàn Quốc medil njom Covid-19. Triều Tiên daok pasang iek catang dom labik taphia negar, padang rilo labik dut iek jit, takik brei tame tabiak di ban ine Bình Nhưỡng piah pacang caga jit njom mbak. 

Patui di ini lac dom khau tin karei njauk caik hatai:

Maong 2 45 minit dah page ni, di mangaok jalan raya 20, labik tapa đèo Chuối, huyện Đạ Huoai, tỉnh Lâm Đồng rahtabiak sa bala jalan mbak biak trak. Di vaktu nan, radaih tải 51C - 384.03 kayua Võ Ngọc Sơn, 21 thun, daok di tỉnh An Giang peih tui jalan meng Đà Lạt mai ban raya HCM. Tuk tal đèo Chuối ye ginuh tapak tame radaih tải 51D - 465.83 daok nduac gah dieh jalan, ngak ka saai Ninh Quang Hiếu, 20 thun, daok di huyện Lâm Hà, tỉnh Lâm Đồng daok di radaih tải 51D-465.83 metai chip, 2 urang karei di mangaok 2 sruh radaih njauk rambuac trak.  

Meng harei ini, gah jalan pasei brei sa gu (dua sruh) radaih pui SE9/SE10 jalan Ban raya HCM - Hà Nội padeih nduac kayua takik tuai tuk jit Covid-19 tamuh tabiak. Dahlau di nan, dua sruh radaih peih jalan nan lac SE11/SE12 saong dom sruh peih dom tỉnh, ban jeng brei padeih. Piah caga jit ruak, tuai damuai brei dut iek pandiak dalam rup tuk tagok radaih pui, khan y tế, rao tangin meng ia sát khuẩn saong  takik nao mai meng rong ini tapa rong diah meyah oh hu bruk njauk nao mai.

Dalam 5 thun tapa, tỉnh Sóc Trăng hu padang ngak 63 danak dak “khik kajap an ninh trật tự”, dalam nan hu rilo danak dak ba mai kein laba glaong dalam bruk pacang caga, duah mboh, tacei tabiak kol tội phạm yau ye: Camera an ninh, truac hadah jalan palei,pacang caga tệ nạn ma túy saong taong paoh gauk di sang bac, sap loa an  ninh... Dom danak dak ni dak harei dak hu ngak pasiam saong cak rok patagok, pabah siam ka bruk pacang caga tội phạm, ba tabiak danak dak daong khik an ninh negar di dom puk palei.

Kuhria tal harei ini, dom urang metai dalam mbang patuh jru hóa chất di pabah lamnge Beirut, Lebanon tagok tal 135 urang, labaih 80 urang daok halik saong labaih 5.000 urang njauk rambuac. Urang metai daok hu rilo jang kayua rilo urang njauk rambuac trak oh ka hu iek ruak atau daok tavak dalam pambuk patau kayau pateik. Tui kuhria mboh dahlau, khat lahik meng 10 tal 15 tỷ USD. Bruk ba tal patuh nan tui duah thau tuk camereip lac kayua khik iek oh tani tanat pandap panda di pabah lamge Beirut. Hy Lạp hu brei dom urang daong tal Labanon piah daong duah urang gaok bala.

Taong abih 187 negar dalam kapul urang ngak bruk dunya (ILO) hu brei tapa sarak Công ước Lao động trẻ em. Sarak ni hu brei tapa jeng hu makna lac yaok ranaih hu daong khik njauk adat saong pacang gilac dom jalan ba ranaih ngak bruk kajhak jhak abih; gam tui di nan brei mboh bruk sanya di dunya ka bruk pandar ranaih dalam bruk ngak, rampeik rapai, taong paoh atau dom bruk kan kandah karei njauk langyah catang. Tui yaok pataom, dalam dunya urak ni daok 152 triệu uranaih ngak bruk, jaik mateh dalam dom uraniah nan ngak dom bruk kajhak jhak di abih./.

Urang lang: Ái Nghiêm -Thu Thảo -6/8