Peih ngak danak dak pachreih urang blei jaik 8.000 harak vé trun meteh yaom jien

Page ini 11-11, Quốc hội yar tangin brei tapa bruk ba tabiak ngak brei patagok kinh tế - xã hội thun 2021. Bruk praong hu ba tabiak dalam thun 2021 lac pataom tame ngak siam bruk pacang caga jit ruak, khik caga prein yawa ka bhap bini, gam pasiam veik jeng yau cak rok bruk ngak kinh tế - xã hội min njauk brei khik kajap tani tanat kinh tế vĩ mô, pasang iek bruk lạm phát, brei sumu dom phun jien praong…Dom chỉ tiêu praong di thun 2021 lac: Pandap panda ngak tabiak dalam negar tagok labaih 6%; jien duah tame kuhria rah tapa yaok akaok manuac labaih 3.700 USD sa urang; chỉ số yaom blei pandar iew lac GDP tagok labaih 4%; bruk rik tame di dom gah karei ngak brei tagok meng 45 -47%; prein khang manuac sia ngak bruk tagok labaih 4,8%; urang ngak hu bac megru labaih 66%, dalam urang ngak bac megru hu sarak, chứng chỉ labaih 25,5%; 91% urang hu pandar bảo hiểm y tế; baoh sang kan kathaot trun meng 1-1,5 %; labaih 90%bhap bini labik thành thị hu pandar ia hacih tapa hệ thống ia; glai pala piah pacang labaih 42%.

Tui yaok pataom di LĐTB&XH, urak ni Việt Nam dok hu 40,5 triệu urang ngak bruk dalam labik oh chính thức, oh hu harak pambuak bruk ngak. Kuhria meng akaok thun tal ni , dalam negar hu 3.349 mbang bala rah tabiak tuk ngak bruk, ngak brei 3.450 urang njauk bala. Dalam nan, yaok pataom oh ka ginup abih di labik ngak bruk oh tui harak pambuak bruk rah tabiak 104 mbang bala ngak brei 104 urang metai; urang njauk rambuac trak lac 806 urang. Meng jalan khik caga siam mekre tuk ngak bruk ka urang ngak oh chính thức, dalam nan hu rilo urang ngak lac urang bangsa takik, ong Hà Tất Thắng - Akaok Cục An toàn Lao động (mintri LĐTB&XH) brei thau, urak ni, Mintri LĐTB&XH hu panuac caong Quốc hội pasang iek brei patagok urang ngak bruk khik caga siam mekre urang ngak di palei pala, bhum ceik.

Công ty Cổ phần pajeng ba jalan pasei Sài Gòn brei thau, brei peih ngak danak dak pachreih urang blei jaik 8.000 harak vé trun meteh yaom jien. Bruk pablei 8.000 vé trun meteh yaom jien meng harei 16/11 tal abih harei 30/12. Tukvak pablei meng mong 8 tuk harei 13/11 tal abih harei 27/12 anak tal. Bruk pablei vé lap hu pandar ka urang halei blei vé 3 harei tagok dahlau tuk radaih apui peih hu raong radaih, hu gaiy daok cambaic laic. Janih giay daok êm saong laneing ndih khoang 6 hu mac la-ar. Tuai khik blei vé meda tame dom website di radaih pui Ban Gon; dom mblang radaih, labaik pablei vé, app pablei vé radaih pui saong dom kênh pablei vé karei ka gah radaih pui.

Bamboo Airways bahrau hu mintri jalan mbak pajeng ba Mỹ brei adat brei pajeng tuai damuai, pandap panda, bưu phẩm nao mai di Việt Nam song Mỹ. Tui nan, Bamboo Airways hu adat peih dom mbang par tapak meng kapan haoh rup prong Boeing 787-9 Dreamliner, di dom mblang kapan haoh prong di Việt Nam yau Hà Nội, TPHCM tal tong abih dom pabah mblang kapan haoh dunya di Mỹ, dalam nan hu dom mblang kapan haoh prong dok di dom ban yau Los Angeles atau San Francisco. Ni lac sa dalam dom bruk prong di abih piah sa hãng kapan haoh negar langui hu adat par tal Mỹ.

Page ini, TAND Cấp cao di Ban raya HCM peih mbang langyah đại gia Trầm Bê ka bruk ngak suan hukum brei jien mesre, “pagat pachot blah mek drap ar” rah tabiak di gilang pariak Phương Nam. Mbang lang yah phúc thẩm peih ngak hu kahng1 cáo di dom urang bị cáo; kháng cáo di Gilang pariak Ngak nong saong patagok palei pala; kháng nghị di Viện kiểm sát ngan saong bản sơ thẩm di Tòa án bhap bini Ban raya HCM. Yau nan min, kayua 3 dalam dom bị cáo hu harak likau oh hu mbaok kayua prein yawa yau nan ye tòa brei padeih langyah. Tui kuhria dahlau, mbang langyah meda peih veik di harei 9/12 anak tal.

Kurhia tal puac harei kabroi, Mỹ hu 134 ribau urang njom Covid-19 dalam sa harei. Yau nan, dalam sa adit, tui kuhria yaok harei Mỹ hu 120 ribau urang njom Covid-19. Urang metai yaok harei kayua Covid-19 jeng tagok 1.450 urang, mbang camereip tagok labaih 1.400 urang meng di kreih bilan 8. Urang njom Covid-19 tame sang iek ruak jeng daok tagok samar, jiak 61 ribau 500 urang dalam harei kabroi, tanut glong di abih meng di tuk rah tabiak jit prong.

Urang ngak praong di Nhật Bản daok pasang iek brei klaak bruk brei daok karei dalam dua adit piah pacang caga njom ruak Covid-19 ngan saong tuai damuai negar langiu mai mong iek Thế vận hội Tokyo. Tui hãng Kyodo, piah tame negar Nhật Bản, tuai damuai negar langiu njauk brei hu harak dut iek ruak mboh âm tính saong Covid-19 tuk tal mblang kapal haok Nhật Bản. Tui khaw tin nan, Nhật Bản meda oh brei bhap bini di dom taneh ia hu jit ruak Covid-19 rah tabiak trak tame negar.

Harei 10/11 (tui tuk Mỹ), Apple, hãng prong dalam gah công nghệ di Mỹ hu peih bruk tabiak mbaok pandap song brei thau drei chip ngak tabiak eng camereip abih brei ka komputer Mac, ký hiệu lac M1. Pak di labik ni, hãng Apple jeng yaih khan klau komputer Mac bahrau pabak chip M1, dalam nan jamriak pal tangin MacBook Air bahrau, jamriak pal tangin MacBook Pro 13 inch bahrau song jamriak caik papan Mac Mini.Urak ni, tong abih klau jamriak hu chip piah pablei tabiak song urang halei khin blei dalam akaok adit hadei yaom pablei meng 699 đô-la tal  1.299 đô-la tui janih./..

Urang lang: Ái Nghiêm – Hani Pha – 11/11 15:26:21