Di rilo tỉnh ban padang labik brei dok karei ka urang ruak 

Page ini 17/5, Mentri Y tế brei thau dalam 12 tuk tapa, dalam taneh ia hu veik 37 mbang urang njom Covid-19 di Bắc Giang, Bắc Ninh, Vĩnh Phúc saong Tuyên Quang. Kuhria tal page ini, Việt Nam hu abih tih 2.746 mbang urang njom Covid-19 dalam negar saong 1.466 mbang urang tame negar. Dom urang njom birau kuhria meng harei 27/4 mbiah tal ini 1.176 mbang. Pambuak tal Bruk klauk jru caga ruak Covid-19 hu 979.238 urang lac dom urang njauk brei klauk jru vaccine dahlau.

Thủ tướng Phạm Minh Chính bahrau mbaoh tangin tame harak pok mayaom ka pasak pasang iek ruak kik saong Sở Y tế ban Đà Nẵng kayua hu bruk ngak naih ghieh dalam pacang caga jit Covid-19. Đà Nẵng lac labik ba akaok nao dahlau dalam bruk peih ngak hu jak jeng bruk dut iek pataom rilo mẫu. Tui UBND ban Đà Nẵng, bruk mek mẫu pataom 5 urang hu ba mai rilo kein laba, jien dut iek trun daok 12 tỷ đồng, oh lac labaih 55 tỷ đồng mayah dut iek sa urang. Dalam mbang jit ka 4, Đà Nẵng hu paglaong tanut dut iek pataom 5 urang tagok tal 10 urang.

Mentri Y tế birau payua công điện ka UB bhap bini saong sở y tế dom tỉnh ban ka bruk pakhang bruk pacang caga jit ruak Covid-19 dahlau, dalam tukvak palaih ruah urang ka QH mbang XV saong Hội đồng bhap bini dom pakat vaktu 2021-2026. Tui nan, di dom palei daok hu urang ruak, yaok labik palih ruah brei hu labik karei piah ka urang njom ruak SARS-CoV-2 buh phieu. Bruk palih ruah brei ka urang daok karei, labik njauk pacang caga njauk brei ngak hacih anek ruak di thung phieu saong hadei buh phieu blaoh… Cử tri brei buh phieu pandar mbut klam, thước eng, njauk pandar sa mbang blaoh klak.

Mbiah tal harei 16/5 lac tukvak puac abih, anek saih dalam negar  brei ngak salah hồ sơ tut angan pakacah THPT saong tut angan palih ruah tame đại học thun 2021. Tui Mentri Pato megru, hu labaih 1 trieu anek saih tut angan pakacah; dalam nan hu anek saih piah tamat bac THPT labaih 222.500. Anek saih birau hu tamat, birau hu tuyển sinh labaih 763.000 (meblah labaih 74,7%). Urak ini, dom jalan peih pakacah THPT dalam tuk jit ruak Covid-19 jeng hu Mentri Pato megru padang ngak. Anak meta oh ka salih harei pakacah lac harei 7,8/7. 

Dalam tuk bruk mesuh gauk di I-xra-en haong gah Hamas di dải Gaza jeng daok rahtabiak khang ngak ka manuac metai tagok samar, Ai Cập hu peih pabah mbang tapen negar di Ra-pha (Rafah) pambuak haong dải Gaza saong daok caga peih ngak sa danak dak pahla piah daong y tế saong pajeng dom urang Pa-le-xtin njauk rambuac. Jabat  y tế Ai Cập brei thau hu labaih 1.200 bác sĩ tut angan tame angan dom urang halain hatain. Tui kuhria, dom mbang taong di Israel tame Gaza ngak brei 191 urang metai, labaih 1.200 urang njauk rambuac.

Thủ tướng Séc Andrej Babis brei thau, meng adot anak hộ chiếu Covid châu Âu brei klauk iek hru di Séc saong meng harei 1/6, Séc brei mã QR di EU ka dom urang hu klauk jru pacang caga ruak, hu dut iek ruak atau pacang hu Civid-19. Bruk ini daong ka bhap bini Séc meda nao rivang ma-in  negar langiu jeng yau tuai damuai dunya mai Séc. Tui Rajaei Séc, dalam mbang klauk iek jru mbang akaok meti di EU, langiu Séc daok hu 12 taneh ia karei.

Dalam melam kabroi saong dah page harei ni (17/5), ribuk Tauktae daok tagok khang, ngak khat lahk rilo di labik rah tui takai tasik gah pai di negar Ấn Độ. Tui kuhria di jabat maong mboh dahlau bruk langik tasik negar ni, ribuk Tóc-te meda khang tagok tal 155- 165 km/h tuk tuh tame mbaoh haluh di dah page harei paguh 18/5. Harei kabroi (16/5), ribuk Tauktae tuh tame labik rah tui takai tasik gah pai di Ấn Độ, ngak brei takik di nyu 4 urang metai./.

Urang lang: Ái Nghiêm- Thu Thảo -17/5