Page ini 22/4, Mban Tacei jalan pakat negar pacang caga jit Covid-19 brei thau ka 6 urang njom Covid-19. Dom urang ruak mai meng Nhật Bản, Ấn Độ tame mai Việt Nam, hu brei daok karei chip. Kuhria mbiah tal page ini, Viet Nam hu 2.812 urang njom Covid-19, dalam nan hu abih tih 1.570 njom ruak Covid-19 kayua njom ruak dalam negar. Dalam negar hu 2.490 urang taong dhit ruak. Pambuak tal bruk klauk jru vaccine Covid-19, mbiah tal ini dalam negar hu 108.897 urang hu klauk jru pacang caga ruak di 27 tỉnh, ban.

UB bhap bini tỉnh Bình Thuận bahrau hu harak payua Mintri Y tế piah tut angan blei vaccine pacang Covid-19, vaktu 2021-2022. Tui nan,  abih tih vắc xin tỉnh caong pandar ka urang umo meng 18 thun tagok dalam tỉnh lac 875.710 urang. Abih tih vắc xin UBND tỉnh tut angan blei haong Mintri Y tế lac 723.270 mbang. UB bhap bini tỉnh Bình Thuận sanya peih bruk klauk jru ginup ka dom menuac tut angan blaoh saong ngak njauk tui tacei pato di Mintri Y tế.

Anak jit ruak Covid-19 di dom taneh ia jaik taphia daok rah tabiak dalam kan kandah, tỉnh Kiên Giang daok samar jak ba  dom gah pataom tame pacang caga jit Covid-19 njom mbak dalam bhap bini. Tui UB bhap bini Ban Hà Tiên bruk brei ngak dahlau nan lac  pataom tame khik kajap jalan taphia negar gam pambuak saong bol lin biên phòng,quân sự, công an saong urang lin bhap bini ngan saong  44 chốt labik akaok negar saong 6 labik hadei di jalan tabiak. Di jalan tasik, tỉnh iew Bol lin Biên phòng, quân sự saong bol lin tasik Bhum 5 patagok  dom kapal gilai nao pasang iek gam, khik oh brei dom kapal gilai pajeng manauc tapa negar suan hukum tame tỉnh.

Mesup ini, akaok mintri Công Thương dahlau daih lac Vũ Huy Hoàng haong 9 urang karei tabiak tòa kayua ngak suan dalam bruk pablei taneh ameh di ban raya HCM ka tư nhân. Ini lac mbang ka 3 toà hu peih tabiak di TA bhap bini ban Hà Nội. Viện kiểm sát bhap bini pakat glaong di abih mboh lac, dom urang ini mek quyền pandar taneh atau dom quyền ka drap ar karei di karja piah rik phun jien, pambuak gauk, hadei di nan chuyển nhượng phun jien oh cambaih laih, ngak khat lahik ka karja labaih 2.700 tỷ đồng.

Công an ban sit Tân Uyên tỉnh Bình Dương brei thau, daok chap khik hình sự 3 urang nan lac: Nguyễn Quốc Đủ umo 19 thun, tỉnh Bạc Liêu, Cao Hồng Đệ umo 20 thun, tỉnh Kiên Giang, Lê Chí Khanh umo 17 thun, tỉnh Cà Mau piah langyah ka bruk co klaik darp ar. Dom urang nan mek angan cảnh sát hình sự, iew bhap bini brei pasang iek saong kateik kreik  blah drap ar. Công an chap khik 3 urang karei pasang iek bruk Pablei drap ar kayua urang karei co klaik hu saong Kaduak kol kanjiak jhak.

  Meng hu jaik abih dom phiếu pachreih tui, Nghị viện Liên bang Đức bahrau brei tapa 1 danak dak hukum ka pacang dom ruak njoam mbak. Tui hukum ini, rajaei Đức hu pabak brei quyền ba tabiak dom jalan pacang jit samu gauk di taong abih dom bang dalam taneh ia Đức tuk jit ruak yam tapa dom tanut hu ba tabiak. Tui kuhria, meng di tuk hukum hu ba tame pandar, 1 lệnh giới nghiêm dalam negar hu ba tabiak ngak di Đức mbang camereip di abih kuhria meng tuk jit praong Covid-19 tamuh tabiak. Dalam harei 21/4, Đức hu jaik 25 rabau urang njaom bahrau saong hu gac 331 urang metai kayua Covid-19.

Cty jru Mỹ Pfizer brei thau duah hu vaccine Covid-19 ja mek angan công ty ini di Mexico saong Ba Lan. Gam kakei bhap bini juai blei dom janih vaccine di mạng. Bilan dahlau, Gah cảnh sát hình sự dunya (Interpol) hu duah mboh saong chap hu yaok ribau vaccine ja dalam dom gilang saong labik ngak tabiak di Trung Quốc saong Nam Phi. Interpol kakei ini lac bruk duah mboh di dom bruk ngak di kol pachot pagat pambuak tal vaccine Covid-19.

Mesup ini, sa dalam 5 kapal njul ia di lin tasik Indonesia lahik liên lạc di eo tasik Bali tuk daok peih bruk pasram iek di bhum tasik ini. Tui panuac khan di Mintri Quốc phòng Indonesia, kapul pambuak bruk duah, hu duah mboh ia menyek sraiy vil val labik tabiak nao di sruh kapal. Urak ini bruk duah nan daok hu dom taneh ia daong, dalam nan hu Singapore, Australia haong India. Sruh kapal njuk ia ini pajeng tui 53 urang lin./.

Urang lang: A.Nghiem & M.Phuong - 22/4/2021  11:34:30