UBND tỉnh Long An tỉnh hu peih 19 bilai pasang iek jit dalam tỉnh

Page ini 31/5, Phaok Thủ tướng Thường trực Trương Hòa Bình nao pasang iek bruk pacang caga jit Covid-19 di Ban raya HCM. Phaok Thủ tướng hu pasang iek bruk pacang jit di 3 C.ty dalam Khu chế xuất Tân Thuận (Q.7); tame pasang iek tapak dom xưởng ngak pandap, rivang tangi sua urang daok ngak bruk labik ini ka dom jalan pacang caga jit, pasang iek cantin di doanh nghiep. Hadei di nan, Phaok Thủ tướng nao tame dom labik brei daok karei di Ký túc xá Đại học Quốc gia TPHCM lac labik birau hu UB bhap bini Ban raya mek ngak labik piah padang veik dom labik caga brei daok karei.

Mesup ni (31/5), UBND tỉnh Long An brei thau, anak bruk jit ruak rah tabiak srau kadau, tỉnh hu peih 19 bilai pasang iek jit dalam tỉnh. Dalam nan, pataom tame dom jalan tame tabiak jaik ban raya HCM yau jalan roya ka 1, jalan roya 50, jalan roya N2…Langui di nan, 4 huyện dok jiak TPHCM song Tây Ninh lac Bến Lức, Đức Hòa, Đức Huệ song Cần Giuộc jeng brei padang 10 bilai pasang iek. Tal tuk vak ni, Long An hu 5 urang SARS-CoV-2 dalam bhap bini di dom huyện Cần Giuộc, Cần Đước, Tân Thạnh song ban sit Tân An.

Mong 12 kreh melam 31/5, UB bhap bini Ban Phan Thiết saong Mban tacei jalan pacang caga Covid-19 ban ini hu pasang iek bruk peih ngak 5 bilai pasang iek pacang, caga jit Covid-19 dom gah. Dom bilai pasang iek jit brei pasang iek dom radaih peih tame tabiak; pasang iek y te ngan saong urang tame ban, duah thau urang hlei jaik ruak saong peih bruk tui iek y te tui bruk ba tabiak. Dom bilai khik iek jeng brei pasang iek bruk pacang caga jit Covid-19 di dom sruh radaih pajeng tuai, piah tapa nan yaok harei pathau khan ka Pasak pasang iek ruak kik tỉnh Bình Thuận thau.

Anak bruk urang meng ban raya HCM tuh mai Bà Rịa-Vũng Tàu hadei di tuk ban raya khan lac brei paatah di gauk mon 12 kreh melam 31/5, Bà Rịa-Vũng Tàu hu batabiak jalan pacang cakak. Taeng di huyện Châu Đức, tapa pasang iek di dom kapul pasang iek bhap bini hu 235 urang meng TPHCM mai veik, dalam nan hu 148 urang meng quận Gò Vấp. Tong abih urang ni hu karja pak ni brei dok karei tui hukum. Bà Rịa-Vũng Tàu jeng brei padeih peih kapan tuai tabiak Côn Đảo song dom radaih pajeng tuai brei padeih taduan tuai dalam 24 tuk tal; jang yau brei padeih bruk memei ia di dom mblang tasik.

Sở Jalan mbak pajeng ba ban Cần Thơ brei thau meng mong 12 kreh melam 31/5, brei padeih dom sruh radaih pajeng tuai tui jalan yaok harei, radaih hợp đồng, radaih taxi, radaih dulich meng Cần Thơ nao tal 31 tỉnh ban, dalam nan hu TP.HCM, Long An, Bạc Liêu, Bình Dương, Bà Rịa-Vũng Tàu…Radaih pajeng tuai nao tal dom labik karei hu peih yau yaok harei min oh btrei pajeng rilo jang meteh gaiy di radaih jeng yau oh tapa 20 urang, kuhria gam urang peih radaih saong urang duh bruk angaok radaih.

Ủy ban Y tế pakat negar (NHC) di Trung Quốc bahrau khan lac urang bahrau njom Covid-19 dalam bhap bini tagolk di gah merong negar ni. NHC harei ni 31/5 brei thau lac hu 27 urang bahrau njom Covid-19 dalam harei 30/5, jeng daok di tỉnh Quảng Đông. Dahlau di nan harei 29/.5, urang jakar y tế Quảng Đông brei thau lac hu gac 13 urang njom Covid-19, tong abih oh hu triệu chứng. Dalam dom urang bahrau njom, hu tal 12 urang daok di Quảng Châu song hu pambuak tal biến thể njom mbak samar hu duah mboh camereip abih di Ấn Độ.

Urang ngak praong gah pacang khủng bố châu Âu brei thau ka bruk khủng bố dalam taneh ia daok patagok. Dalam tuk dom taneh ia daok pataom dom prein khang piak khik caga prein yawa ka bhap bini anak jit Covid -19, takik veik dom bruk pacang caga khủng bố ye dom kapol nyaom cực đoan pambak tame tuk jit ruak yau ini piah tagok khang. Bruk pacang veik manuac sia dalam tukvak tapa jeng ba tal bruk oh njauk hatai dui atah, ngak brei trak jang bruk oh samu gauk gah kinh te saong lahik bruk jia tame karja. Tui urang ngak praong di châu Âu, bruk pacang khủng bố, abih di nyu lac bruk khủng bố dalam negar njauk brei ba tagok dang akaok dalam dom danak nyaom biai anak tal.

Dom urang jakar Ai Cập dok ndok po kapan pajeng pandap Ever Given, bayar 550 triệu đô la Mỹ, tuk kapan ni pacang gar kênh đào Suez jiak sa adit di bilan 3, ngak srau kadau bruk pajeng ba jalan tasik dunya. Jabat khikk ramik kênh đào Suez brei thau, labaih 600 urang ngak hu ba mai dong song pasiam kapan pajeng pandap , dalam nan sa urang ngak meta. Tui sarak di Tòa án kinh tế ban Ismailia, kapan Ever Given brei dok veik Ai Cập mbiah tal tuk bayar ginup jien./.

Urang lang: Hani Pha – Aí Nghiêm – 31/05 16:17:14