Sarak ngak iek dom cơ chế, sarak karei patagok ban Cần Thơ

Page ini 4/1, Mbang nyaom oh kuhria dahlau mbang ka sa, QH mbang 15 peih ngak dalam praong prang. Di mbang nyaom ini, QH ginum biai saong caga brei tapa Hukum pasiam, pabak dom paka di 8 hukum; Sarak ngak iek dom cơ chế, sarak karei patagok ban Cần Thơ; Sarak ka Jalan brei buh jien tame padang ngak Danak dak padang ngak jalan mbak cao tốc Bắc – Nam gah Timun negar vaktu 2021 -2025; dalam nan biak sangak tal Sarak pandar jien ndo, phun jien daong peih ngak Danak pabak pasiam veik saong cak rok patagok kinh tế - xa hoi. Dự thảo Sarak piah khik brei tani tanat kinh tế vĩ mô, paglong bruk ngak po, prein pacang caga, sumu bruk patagok kinh te; tok brei pandar jien meng kadung jien karja piah buh tame ngak brei cak rok patagok njauk tui bruk ba tabiak di hukum.

UBND tỉnh Bình Phước bahrau patagok tanut jit COVID-19 meng pakat 2 (mbuan si mbiah) tagok pakat 3 (mbuan si glong). Tui parabha pakat jit COVID-19 bahrau di abih, tỉnh Bình Phước hu 10 dalam 11 huyện, ban sit, ban prong daok dalam bhum katam, mbuan si hu jit pakat 3. Urak ni, yaok harei tỉnh ni hu labaih 700 urang njom bahrau COVID-19, rilo meng lac dalam bhap bini. Bình Phước dok tui iek , taong ruak ka labaih 10.300 urang njom virut SARS- CoV-2.

Urang ngak nong huyen Chợ Gạo, tỉnh Tiền Giang daok paik baoh thanh long karei bilan, min urang padeih mai blei atau blei takik, kayua dom labik caik piah thanh long pablei tapa Trung Quốc kareik pabah bang. Dahlau di nan, thanh long janih ka 1 pablei yaom meng 17.000 - 20.000 đồng sa kg; urak ini, urang tok blei yaom 4.0000 – 5.000 đồng sa kilo. Tukvak tapa, huyen Chợ Gạo padang ngak labik pala sa janih thanh long pablei tabiak negar langiu praong abih tỉnh Tiền Giang saong thanh long Chợ Gạo hu Cục Sở hữu trí tuệ brei sarak khik angan je di kapol nyaom. Yau nan min, thanh long daok pambak tame darak pasar Trung Quốc, pablei tabiak tui jalan pablei salih sit sot. Kayua yau nan ye, piah phun thanh long cak rok patagok khang kajap, brei hu jalan ngak suai lavik piah paglong kein laba di baoh thanh long, saong brei hu darak pasar tani tanat.

Mbang padeih tết Dương lịch, tỉnh Bình Thuận taduan labaih 13.500 tuai mai rivang me-in, padeih padei . Tui jalan pasiam veik du lịch min dok khik kajap siam mekre, rilo labik ngak mbang gah du lịch peih bruk pachreih nao du lịch piah dui pachreih tuai damuai. Dalam tuk vak tapa, Sở ilamu, Thể thao song Du lịch tỉnh Bình Thuận jeng hu ramik veik dom tacei pato di anak meta ka dom jalan “daok lagaih song rai duik bahrau, sami samar pasang iek siam jit COVID-19,” tui nan oh chap dut iek tuai mai meng bhum hajao, bhum katam

Dalam 3 harei padeih Tết dương lịch 2022, dalam negar rah tabiak 64 mbang bala angaok jalan mbak, ngak brei 38 urang metai, 35 urang njauk rambuac. Di Ha Noi, TP.HCM, Đà Nẵng saong dom tỉnh jaik taphia negar, oh rah tabiak gar tavak jalan saong bala angaok jalan mbak trak. Tui Jabat UB salamat jalan mbak pakat negar, kayau jit COVID-19 rah tabiak sraw kadau yau nan ye dom harei padeih Tết dương lịch thun ini rilo bhap bini oh nao ma-in dulich bo palih ruah daok veik ban piah pacang caga jit.

Trung Quốc, Nga, Anh, Mỹ song Prang njauk gauk brei pacang cakak bruk ba pandar vũ khí hạt nhân song mbuan si rah tabiak sa bruk mesruh hạt nhân. Dalam sa panuac khan biak takik mboh, 5 negar hạt nhân di dunya jeng lac 5 taneh ia dalam thường trực Hội đồng Bảo an Liên hợp quốc ndom lac “oh hu taneh ia halei mek hu ja yah dalam bruk mesruh hạt nhân” song bruk mesruh ni oh njauk rah tabiak. Panuac nan hu ba tabiak dahlau di sa nyaom biai di Liên hợp quốc ka bruk oh ba pandar vũ khí hạt nhân hu peih tabiak meng harei 4-28/1 di New York (Mỹ) min brei padeih kayua njom mbak biến thể Omicron di virus SARS-CoV-2.

Israel meda brei peih praong bruk klauk iek jru vaccine pacang COVID-19 mbang 4 meng vaccine karei di 3 mbang klauk dahlau. Janih vaccine birau hu ba tame pandar di hãng Moderna. Bruk ngak iek nan daok piah taong yaom bruk pandar sraw dom janih vaccine karei di gauk ka sa urang ruak. Mentri Y tế Israel hu brei ka tuai tame negar tuk hu klauk ginup jru saong mai meng dom taneh ia hu jit ruak biar. Ini lac bruk peih meneing pabah mbang di Israel hadei di 5 adit kareik pabah mbang piah pacang caga bruk njom mbak biến thể Omicron.

Mỹ dok rah tapa mbang tagok rilo urang njom COVID-19 samar oh ka bhian mboh. Urang dịch tễ dang akaok Mỹ Anthony Fauci ndom lac, negar ni dok dang anak tanut tagok urang njom bahrau COVID-19 “jiak yau dang tapak” kayua bruk njom mbak di biến thể Omicron. Dalam harei 31/12/ 2021, Mỹ hu labaih 460.000 urang njom bahrau, glong jang jaik 2 mbang dut song tabung jit bilan 2 thun bloh. Urang dịch tễ ni jeng hu panuac lac mbuan si rah tabiak bruk tagok rang tame sang iek ruak di Mỹ, ngak brei trak damak ka bruk y tế kayua urang ruak COVID-19 bahrau biak glong./.

Urang lang: Bhumi – Hani Pha – 04/01