Rilo anek saih caga pakacah dalam tuk jit ruak rah tabiak 

Page  ini 4/8, Mentri y tế brei thau, hu gac 10 urang njom Covid 19, dalam nan hu 7 urang di ban Đà Nẵng, daok veik lac di tỉnh Quảng Nam. Taong abih jeng pambuak tal Sang iek ruak Đà Nẵng. Yau nan, mbiah tal urak ini, dalam negar hu 652 urang njom ruak Covid-19 di 9 tỉnh, ban. Sang iek ruak Đà Nẵng lac sruh jit ruak njom mbak. Labik ini, 8 urang y tế njom virus SARS-CoV-2.

Langiu di bruk pacang cacak rilo labik piah padam jit, Đà Nẵng daok samar drah padang ngak sang iek ruak dã chiến Đà Nẵng di mblang bien Tiên Sơn. Sang iek ruak praong 700 manieng saong meda patagok tal 1.000 manieng tuk mboh njauk ngak, lac labik taong ruak dom urang ruak njuan. Sang iek ruak hu jalan tame, jalan tabiak karei, hu dom labik yau ye: taong ruak, mek mẫu, dut iek. Tui kuhria, sang iek ruak dã chiến Đà Nẵng meda ngak salah di harei paguh (5/8).

Dalam tuk jit ruak pambak praong, bhap bini dalam negar hu rilo jalan ngak piah daong dom urang di labik pacang jit. Nan lac dom paok lisei bingi hu ba tal sang iek ruak atau dom blah thaot binguk, dom kadha daoh hu paneh tabiak piah pachreih ba dom bác sĩ iek ruak.  Urang pandar mạng xã hội daok kham merat hu mbaok tame sa bruk biak hu makna, hu ngan ieu lac “Iek daong bac sĩ 24 tuk”kayua Rayo sap ndem VN saong nhãn pandap VitaDairy peih ngak. Urang hu mbaok tame bruk ini, ba thaot binguk dom  bác sĩ tagok Facebook di drei, mbat huroh “baovebacsi24h”. Yaok kadha hu rik daong 10.000 đồng tame kadung jien “Iek daong bac sĩ 24 tuk”piah blei khan ao pacang caga rup saong pandap mbang pabak payua tal dom y bac sĩ daok ngak bruk di dom labik pandiak ka jit Ciovid-19 dalam negar.

Langiu di bruk pacang cacak rilo labik piah padam jit, Đà Nẵng daok samar drah padang ngak sang iek ruak dã chiến Đà Nẵng di mblang bien Tiên Sơn. Sang iek ruak praong 700 manieng saong meda patagok tal 1.000 manieng tuk mboh njauk ngak, lac labik taong ruak dom urang ruak njuan. Sang iek ruak hu jalan tame, jalan tabiak karei, hu dom labik yau ye: taong ruak, mek mẫu, dut iek. Tui kuhria, sang iek ruak dã chiến Đà Nẵng meda ngak salah di harei paguh (5/8).

Pathau mikva saong grauk ayut, Nyaom roya Liên Chi hội Nhà báo Rayo sap ndem VN, vaktu 2020 -2025 daok rah tabiak di Hà Nội. Kuhria tal bilan 7 thun 2020, Liên Chi hội nhà báo VOV hu 940 urang, ngak bruk di 24 chi hội di jabat lambaok. Dalam tuk cak rok patagok di harak mbao, dom thun tapa, VOV daok patagok tui jalan pathau khan rilo gah papar sap, papar binguk, harak mbao cih…hu rilo kadha cih vak hu yaom glaong, pathau khan tame makna dalam, njauk tui tacei pato di Đảng, sarak di Karja. Dom danak dak brei mboh taong abih gah, njauk dom bruk praong di taneh ia. meng thun 2015 -2020, Rayo sap ndem VN jeng yau Liên Chi hội mek hu 125 giải thưởng báo chí, dalam nan hu 30 gải Báo chí  pakat negar.

Meng harei ni, rajaei Philippines brei pacang cakak catang viek di ban ine Manila saong dom labik taphia nan. Philippines daok glaih glar piah pacang bruk njom mbak di jit Covid-19 tuk dom urang njom tagok tal tanut 100 ribau. Dahlau di nan, 80 kapul hu panuac ieu rajaei ngak catang jang dom bruk pacang cakak jit, gam tui di nan jeng hu panuac brei thau dahlau ka bruk mbuan pajalieh di y tế kayua dom urang njom ruak daok tagok glaong.

Jalan raya Orchard- lac labik blei pandap pandar hu rilo menuac tame tabiak di abih pak Singapore daok laik tame joa lange kayua jit Ciovid-19. Gah langiu dom labik pablei khan ao oh daok bruk tuai damuai dak gauk tame, rilo pasak pablei salih takik hu menuac nao mai. Adat pacang cakak dui atah 2 bilan tapa ba tal bruk ngak mbang pablei salih di Singapo gaok kan kandah di abih kuhria meng dahlau mai . Dom jalan pacang caga takik nao mai di dunya ba tal gah dulich Singapore lahik labaih 20 tỷ UDS. Dalam tuk nan, darak pasar dalam negar biak takik urang blei piah pabak jien khat lahik.

Takik di nyu 24 urang metai, 43 urang njauk rambuac saong yaok ribau urang guk nduac tabiak truh sang guk tuk gah IS taong tame sa sang guk di tỉnh Nangarhar, Afghanistan di harei kabroi. Camriep di abih bruk taong nan meng bom radaih di pabah mbang sang guk, hadei nan, labaih 30 kol IS pan phao cuh tame gah an ninh. Sang guk ni daok kreik labaih 2.000 urang guk. Labaih 1.000 urang guk njauk mek gilac, cảnh sát daok duah mek dom urang guk daok dauk.

Urang lang: Thu Thảo -Ái Nghiêm- 4/8 10:26:12