Tui Mentri Y tế, mesup ini oh hu thei birau njom ruak nCoV. Kuhria abih tih urang njom mbak dalam bhap bini labaih sa bilan tapa lac 893. Dalam 24 tuk tapa hu veik 12 urang njom mbak, dalam nan hu 11 urang mai meng negar langiu. Viet Nam peih bruk klauk jru vavcine akaok meti di harei 8/3 ka 377 urang di TPHCM, Hà Nội, Hải Dương, urak ini oh hu thei mboh karei dalam rup hadei di tuk klauk jru. Harei ini, dom labik klauk jru daok klauk vaccine Covid-19 tui bruk ba tabiak, gam haong nan peih praong bruk klauk jru caga ruak di Hà Nội saong Gia Lai.

Pasak likhah caga, balik gym, beer club… di  TPHCM hu peih pambah mbang meng harei ni (9/3), dok vũ trường, bar, karaoke jeng daok kreik pambah mbang piah pacang jit. Bruk brei peih veik dom bruk hu atau oh jeng hu nan, hu UBND TPHCM patabiak harei 8/3, dalam tuk 26 harei tapa ban raya oh hu urang halei njom dalam bhap bini. Ban raya hukakei dom labik ngak mbang, pablei salih khik caga siam mekre, cuh patiah pacang mbaok, rao tangin pametai anek ruak song peih ngak ginup dom jalan pacang caga jit tui panuac kakei di  mintri Y tế.

Tapa dua mbang rami ramik veik di harei 3/3 saong 9/3, bruk jao 2.450 urang lin birau di Hải Dương brei kadhun veik tal harei 18/3 piah khik kajap bruk pacang caga jit. Tỉnh ini hu dut iek ruak ka taong abih urang dam tagok jalan nao ngal lin. Lac pasak jit saong birau abih bruk pa-atah di gauk di harei 3/3, Hải Dương lac tỉnh puac abih jao urang lin thun ini. Cục Quân y di Mentri Quốc phòng hu tacei pato pacang caga jit Covid-19 dahlau, dalam saong hadei di tuk taduan urang lin birau. Dom urang medil lac hu taom gaok urang F1, F2 brei hu tui iek, oh hu ruak meng brei taduan tame đơn vị.

Hadei di mbang padeih jit Covid-19, labaih 2.700 anek saih di bhum tapen negar oh ka nao bac veik,  nan lac yaok pataom di Sở pato megru Đồng Tháp dalam harei cemereip anek saih dom huyện tapen negar di tỉnh hu nao bac veik (8/3). Dom anek saih nao bac hu meng 82% tal labaih  98%. Sở pato megru  Đồng Tháp brei thau, daok pataom tame pathau khan piah amaik ame sahnang hatai brei anek nao bac, kayua   tỉnh pasang iek hu siam jit ruak Covid-19. Gam haong nan, duah thau makna anek saih oh ka nao bac  piah jak ba dom adei .

Bội Chỉ huy BĐBP tỉnh Bình Thuận brei thau, rup atau ong Lê Văn Một ndih tapui thun 1975, phường Phú Trinh, TP. Phan Thiết lac urang lahik di tasik kayua gilai ikan BTh 89272 TS karam harei 15/2 birau duah mboh. Urak ini sang ong hu mai taduan tau ba nao sang dar. Yau nan, tal tukvak ini jeng daok dua urang lahik, dom gah chức năng daok pambuak bruk saong baoh sang dom urang gaok bala piah duah.

Mỹ daok jhul samar danak dak klauk jru caga Covid-19 song mek hu tanut glaong di abih, lac 2 triệu 900 ribau urang hu klauk dalam sa harei. Tui pasak pasang iek song pacang caga jit ruak Mỹ, 9,2 % rahra negar ni  hu klauk ginup 2  mbang vaccine Covid-19, dalam tuk 18% hu klauk mbang camereip. Dom menuac njom bahrau di  Mỹ trun gam gam dalam 8 adit, yaok harei trun 60 ribau urang; dom menuac metai dalam adit dahlau trun 18%, lac beir di abih kuhria meng puac bilan 11.

Melam 8/3, Thủ tướng Campuchia Hun Sen hu panuac drah samar iew taong abih dom jabat, kapol nyaom di karja saong menuac urang padeih dom bruk pataom rilo menuac piah pacang cakak jit Covid-19. Tui Thủ tướng Hun Sen, tok dalam harei 8/3 hu veik 49 urang njom ruak Covid-19.  Jit ruak Covid-19 nyom mbak tal dom urang jakar ngak bruk jabat karja, urang dalam tapon nyaom bol pan phao kraong saong dom nghệ sỹ. Campuchia jeng brei kareih pabah mbang taong abih dom sang bac saong pasak pato pakai di huyện Peam Ro, tỉnh Prey Veng.

Gah an ninh Myanmar duah chap yaok ribau dam dara trun jalan di  Yangon melam  8/3. Urang pandar Facebook song  hãng tin pak ni  MTK brei thau 20 urang njauk chap mek di  quận Sanchuang , hadei di tuk cảnh sát pasang iek dom boh sang. Di dom labik karei di Yangon, yaok ribau urang trun jalan, ieu palao dom dam dara nan, yaom lac hu bruk pakauk menuac sia nao mai di tuk melam. Tui Liên hiệp quốc, bruk srau kadau, taong paoh gauk jeng daok rah tabiak  di  Myanmar, ngak ka labaih 50 urang metai dalam dom mbang kateik geik menuac trun jalan/.

Urang lang: H.Pha - Aí Nghiêm  9/3/2021