Ban raya HCM patabiak harak tacei pato ngak iek bruk brei urang F1 daok karei di sang dalam ban raya

Page ini 9/7, 600.000 mbang vaccine  di hãng jru AstraZeneca meng Nhật Bản hu pajeng meng kapal haok  mai tal mblang kapal haok Tân Sơn Nhất. Ini lac lo jru mbang ka 2 dalam 1 trieu mbang jru vaccine pacang Covid-19 ka 2 kayua Rajaei Nhật Bản alin brei ka Viet Nam. Yau nan tal harei ini, Rajaei Nhật Bản hu daong ka Viet Nam 2 trieu mbang vaccine pacang Covid-19.

Tui panuac khan meng Mintri Y tế harei ini brei thau: Akaok mintri Y tế Nguyễn Thanh Long hu mbaoh tangin tame Sarak 3355/QĐ-BYT  patabiak bruk klauk vaccine COVID-19 thun 2021-2022. Bruk ini hu peih ngak, iek tui bruk jit ruak saong bruk pabak vaccine. Ini lac jalan piah ka dom tỉnh ban ba tabiak bruk klauk vaccine pacang COVID-19. Dalam sarak hu ndom lac: Vaccine pacang COVID-19 lac jalan njauk ngak saong hu yaom praong piah pacang caga jit ruak saong cakrok KT-XH. Tal urak ini, hu jaik 105 triệu mbang vaccine meng dom labik karei di gauk hu sanya ba brei ka Việt Nam. Việt Nam daok kham merat tal puac thun 2021, atau akaok thun 2022 meda mek hu bruk oh njom mbak dalam bhap bini, tui nan, hu 70% menuac sia Việt Nam brei hu klauk vaccine COVID-19.
UB bhap bini Ban raya HCM patabiak harak tacei pato ngak iek bruk brei urang F1 daok karei di sang dalam ban raya. Tui nan, F1 brei daok karei di sang lac dom urang hu taom gaok jaik haong menuac njom Covid-19, hu cuk pataih pacang pabah tuk taom gaok menuac ruak, dut iek samar mboh am tinh haong SARS-CoV-2, dalam tuk daok cang dut iek PCR, saong lac sa dalam dom nyaom urang taom gaok jaik menuac njom Covid-19 min oh bhian gaok, urang ngak bruk dalam sa labik haong menuac ruak di dom labik atah di gauk labaih 2 met, urang taom gaok jaik lac urang taha umo labaih 60 thun, uranaih, urang kumei metian, urang jaoh jo…brei hu manuac daong iek glang. Dom urang taom gaok jaik  hu brei daok karei ginup 14 harei saong dut iek ruak di harei ka 14 mboh am tinh saong SARS-CoV-2 hu brei nao sang. Bruk mek mau iek ruak dalam tukvak daok karei di sang takik di nyu 5 mbang  di harei camereip, harei ka 7, 14, 20 saong harei ka 28 kuhria meng tuk brei daok karei atau takik di nyu 2 mbang di harei ka 20 sang 28 kuhria meng tuk brei daok karei ngan saong dom urang hu brei daok labik karei ginup 14 harei.

Ndom ka bruk pabak pandap ka darak pasar TP HCM dalam dom harei tal, ong Nguyễn Nguyên Phương, Phaok Yam ndok Sở Công Thương TP HCM brei thau, hu tacei pato dom doanh nghiệp khik tani tanat pandap panda pabak ka dom labik pablei, patagok bruk khik caga saong pablei pandap tagok meng 120.000 - 150.000 tấn sa bilan, daong palagaih ka urang pablei salih di 3 darak praong đầu mối, tagok bruk taduan mek pandap di dom chành, vựa meng 4.500-5.000 tấn njam patam, baoh kraoh, pandap mbang that yaok harei melam, rilo jang dua mbang dom pandap harei 8/7.

Ban Thường trực Hội đồng XSKT gah Meraong negar njauk gauk brei dom c.ty pambuak bruk, công ty xổ số điện toán Việt Nam brei thau ka  bruk ngak saong likau pakat angok brei padeih bruk pablei salih xổ số di taong abih gah Meraong negar dalam 15 harei, meng mon 12 kreh melam 9/7. Hadei di tuk harak ini hu ba tabiak, UBND dom tỉnh dalam bhum gah meraong negar pachreih tui brei padeih bruk xổ số dalam 15 harei tui  bruk ba tabiak ngaok nan. Bruk brei padeih xổ số meda rik daong ka bhap bini Ban raya HCM saong dom tỉnh, ban dalam bhum gah meraong negar jhul kadun likuh jit ruak Covd-19. Gam haong nan, ngak jeng bruk yau gauk dalam ngak mbang xổ số di bhum, khik caga prein yawa ka urang jakar, urang ngak bruk , dom labik pablei jeng yau urang nao pablei ve so dalam dom tỉnh gah meraong negar.

Thủ tướng Hàn Quốc Kim Boo-kyum harei ini brei thau, taneh ia ini brei tagok bruk pa-atah di gauk tal tanut glaong abih di ban ine Seoul haong dom labik jaik taphia nan meng harei 12/7 tal. Bruk nan hu ba tabiak dalam tuk harei kabroi, Hàn Quốc hu dom menuac njaom Covid-19 bahrau dalam harei tagok glaong abih kuhria meng tuk tamuh jit praong tal ini, gam haong nan, Mintri Y tế Hàn Quốc jeng hu panuac brei thau lac, dom menuac njom bahrau meda tagok rilo jang jaik 2 mbang di puac bilan 7 ini.

Dalam harak brei thau harei ini, Thủ hiến bang New South Wales di Australia khan lac, bang ini birau hu 44 urang njom Covid-19 dalam nan hu 29 urang nao gah langiu tuk dalam rup hu virus. Kayua yau nan ye dalam dom harei tal, urang njom ruak Covid-19 di bang ini meda tagok rilo. Lingiu di nan, urang F1 tagok dua mbang dalam melam kabroi, abih tih urang ruak tagok tal 14 ribau. Anak bruk yau nan, langiu di adat pacang veik saong dom jalan brei ngak tui luac 2 adit tapa, harei ini, urang dang akaok bang New South Wales birau brei pabak veik dom paka ka bruk pacang jit ruak birau,  yau ye, sa baoh sang  tok brei sa urang nao darak, oh taduan raok tuai tame sang, tok brei pasram rup pabhap tui kapul oh tapa 2 urang saong pasram di labik atah sang oh ka tal 10km.

Harei 8/7, cảnh sát Thụy Điển brei thau, taong abih 9 urang hu mbaok angaok sruh kapal haoh laik di gah langiu ban Orebro di negar Thụy Điển jeng metai abih. Tui panuac khan di cảnh sát, sruh kapal haoh DHC-2 Turbo Beaver pajeng 8 vận động viên chat payong haong 1 urang peih kapal haoh laik trun jaik jalan par trun tagok di mblang kapal haoh Orebro hadei di tuk par tagok saong khuah tuk laik trun. Makna di bruk nan daok hu pasang iek, duah thau./.   

Urang lang: Ái Nghiêm – M. Phương – 09/07 16:17:36