Rilo DN hu rik dong jien ka taneh ia 

Page ini, Akok negar Nguyễn Xuân Phúc hu var taom mbaok, ndem meyai nao mai saong Kapol Doanh nhân umo ranaih Viet Nam tuk pahadar harei Doanh nhan Viet Nam (13/10). Akok negar ndom lac hatung hatian di doanh nhan Viet Nam brei mboh biak praong dalam jit ruak, abih di nyu lac doanh nghiep ranaih hu rilo bruk rik daong ka Ban raya, daong iek ruak ka urang. Brei thau dom caong khin tagok Akok negar, ong Đặng Hồng Anh, Akok kapul Doanh nhân umo ranaih Việt Nam khin hu phun jien daong doanh nghiep, brei hu sarak kadun tukvak bayar sre meng 6 tal 12 bilan, gam padang dom jalan phone pandiak taom gaok samar piah lang yah, javap calei, daong chip ka doanh nghiep.

  Gah jalan pasei dah page ini (12/10) brei peih veik bruk pablei harak ve radaih pui ka dom sruh radaih pui SE8 (Sài Gòn - Hà Nội) saong SE8 (Hà Nội - Sài Gòn). Dalam nan, brei thau cambaih toa ka 2 ka tuai nao meng bhum mbuan njom glaong saong biak glaong tapa bhum karei; dom toa daok viek duh ka tuai nao meng bhum mbuan njom saong bhum siam mekre bahrau tapa bhum karei. Urak ini Công ty cổ phần pajeng ba jalan pasei Sài Gòn daok pambuak haong dom tỉnh: Quảng Trị, Tuyên Quang, Thừa Thiên Huế... ba rahra daok ngak bruk di dom tinh, ban gah maraong nao palei.

       Tui Sở Lao động - Thương binh - Xã hội Ban raya HCM, meng bilan 6 tal bilan 10 thun 2021, hu 33.000 urang ngak hu blei BHXH blaoh tabiak truh Ban raya HCM. Urak ini, jaik abih dom gah ngak pandap di Ban raya khin hu urang ngak, dalam nan, dom gah daok khin hu rilo urang ngak nan lac: pablei salih, dịch vụ logistics, gilang khik mblang caik pandap, dịch vụ, kế toán kiểm toán, labik du lịch, labik papah ka urang ndih daok, mbang menyum …Daok bruk peih jien daong mbang ka 3, tal urak ini, Ban raya HCM hu buh tabiak daong ka labaih 3,7 trieu urang, tui kuhria tal harei 15/10 meda ngak salah blaoh.

    Ia kraong Đồng Nai tuh mai danao Trị An rilo nan ye sang mac njauk tathuak ia piah khik salamat ka danao. Dah page 12/10, Công ty thủy điện Trị An brei tathuak abih tih jaik 1.000 m3/s ia trun gah hạ lưu. Dom ia tathuak tabiak meda hu takik atau ilo jang dalam tukvak anak tal. Mban tacei jalan pacang caga bala meng langik tasik saong duah manuac njauk bala tỉnh Đồng Nai ieu kakei dom huyện Vĩnh Cửu, Long Thành, Nhơn Trạch saong ban Biên Hòa hu jalan langyah ngak pasiam viek ar pacang, danao ribaong raong kaya ikan, bhum taneh thaong … piah pacang caga khat lahik.

        Page 12/10, di ralo labik klauk jru di Pasak Pasang iek ruak kik Cần Thơ saong 9 quận, huyện di ban ini hu peih bruk klauk vaccine Vero Cell pacang COVID-19 ka urang meng umo 18 thun tagok. Ban Cần Thơ taduan hu 150.000 mbang jru vaccine Vero Cell dalam abih tih 500.000 mbang jru kayua Mentri Y tế parabha brei. Dalam harei camereip brei klauk vaccine Vero Cell (11/10), Cần Thơ klauk jru mbang ka sa hu 23.000 bhap bini. Ini lac urang klauk jru dalam harei hu ralo abih kuhria meng mbang klauk jru mbiah tal ini di Ban Cần Thơ.

      Gilang pariak dunya brei thau, tanut mesray di dom taneh ia hu jien mek tame bier tagok 12%, jeng 860 tỉ USD – lac tanut glaong di abih dalam thun 2020. Gam haong nan hu panuac ieu kham marat abih gah piah daong ka dom taneh ia trun jien masaiy daok di tanut meda khik hu. Dom jalan ngak piah rami ramik veik sraiy njauk hu peih ngak samar drah kayua bruk brei dui atah tuvak bayar sraiy di kapul dom gah kinh tế praong G20 meda abih tukvak di puac thun ini. Gilang pariak dunya brei thau dom kandah kandaiy di dom taneh ia daok tavak saiy rilo meda trak damak jang tuk jien laba daok tagok.

Yaom menyek tagok glong di abih dalam rilo thun ini. Tui Hãng tin Reuters, bruk klauk jru caga ruak Covid-19 glong jang hu daong pasiam veik dom bruk ngak kinh te, ba tal yaom menyek Brent tagok dalam 5 adit tapa saong menyek tamo tagok 7 adit gam gam.  Bruk kurang khi cuh di châu Âu saong châu Á jeng daok jhul dom taneh ia salih bruk ngak tabiak điện meng khí cuh tapa menyek, bruk pandar nan tagok angaok dunya ba tal yaom menyek tamo tagok khang. Sa bruk karei ngak brei yaom menyek tagok nan lac Gah dom taneh ia pablei menyek tabiak negar langiu saong dom gah pambuak bruk langiu dom taneh ia (OPEC +) khik dom bruk kurang pabak kayua bruk takik blei pandar dalam tuk jit ruak.

Rajaei tỉnh Sơn Tây, Trung Quốc brei thau, hajan ribuk dalam dom harei tapa di pak ini ngak ka takik di nyu 15 urang metai saong 3 urang karei lahik ka oh duah mboh. Tui panuac khan di mbang họp báo dah page ini, hajan ia sua meng harei 2 tal harei 7/10 di Sơn Tây  ngak kan kandah tal jaik 1 triệu 760 rabau bhap bini, labaih 120 ribau urang njauk panduan nao labik karei. Hajan ia sua jeng ngak khut labaih  238 ribau héc-ta njam patam, 37.700 baoh sang jalieh atau khut, tayah, khat lahik labaih 780 triệu đô la Mỹ./.

Urang lang: Thu Thảo -Ái Nghiêm-12/10