Kuhria meng mon 6 melam 4/7 tal mon 6 dah page harei ni 5/7, hu 328 urang njom bahrau dalam negar drei. Dalam nan, di ban raya Hồ Chí Minh hu 175 urang, tỉnh Đồng Tháp mbang camriep hu menuac njom rilo di abih lac 100 urang. Yau nan, kuhria tal mon 6 dah page ni, Việt Nam hu abih tih 18.403 urang njom dalam negar. Dom urang njom bahrau dalam negar kuhria meng harei 27/4 tal urak ni lac 16.833 urang, dalam nan hu 5.045 urang thit ruak.

Sở pato magru ban raya HCM hu pathau khan ka bruk anek saih pakacah mbang pakacah tamat THPT thun 2021 di labik pakacah TP.HCM meda tut angan salih labik pakacah piah khik salamat dalam tukvak jit ruak Covid-19. Bruk tut angan salih labik pakacah brei ka dom anek saih njauk kan kandah kayua jit Covid-19 oh hu mbaok tame pakacah di dom harei 7 saong 8/7 saong hu caong mai pakacah di labik bo urang pakacah daok. Amaik ame anek saih pakacah hu hatai caong salih labik pakacah meda ngak harak gar payua Sở pato magru TP.HCM dahlau maong 2 bier harei 5/7/2021 saong pathau khan tal Sở pato magru di labik anek saih khin tut angan pakacah piah hu taduan brei tame pakacah.

Meng bier harei 4/7, di mangaok mạng xã hội hu mboh biak rilo tal having akaok khau tin hu asal kadha lac: “Brei pacang veik ban raya Hồ Chí Minh dalam 10-15 harei. Mban tacei jalan pacang caga jit Covid-19 ban raya Hồ Chí Minh brei thau, ni lac khau tin ja, bhap bini dalam ban raya jhui suh sah, bo brei duah thau khau tin ka jit ruak meng dom jalan pathau khan di Trung ương saong ban raya, jhui pang tui dom khau tin ba tagok mạng ba tal duh hatai, ngak kan kandah tal bruk pacang caga jit.

UBND ban Đồng Xoài, tỉnh Bình Phước brei thau hu langyah catang bruk pataom rilo manuac di nhà hàng Hương Phù Sa di khu phố Phú Cường, phường Tân Phú. Dahlau di nan tuk page harei 4/7, kapul chức năng ban Đồng Xoài pasng iek saong mboh di labik nhà hàng Hương Phù Sa daok peih bruk hu mbaok labaih 100 urang, meng rilo tinh, bal yau ye ban raya HCM, Bình Dương, Tây Ninh, Đồng Nai saong dom labik karei dalam tỉnh Bình Phước. Di tukvak pasang iek, bruk ngak ni daok rah tabiak dalam bui sambai, manuac urang daok jaik taphia gauk oh ngak tui adat pacang caga jit Covid-19. Kapul pasang iek hu ngak biên bản, taong phat 23 urang, yaok urang njauk phat 2 triệu đồng ka bruk oh ngak tui adat pacang caga jit ruak Covid-19, phạt cảnh cáo 4 urang ala 18 thun. Daok haong po pablei salih tanut phat tal 10 triệu đồng ngan haong bruk oh ngak tui adat brei patakik manuac piah pacang caga jit Covid-19.

Jalan DT 701 labik meng ban Phan Rang - Tháp Chàm tal xã Cà Ná (huyện Thuận Nam, tỉnh Ninh Thuận) atah labaih 50km lac sa dalam dom jalan  tapen tasik mekre abih di Việt Nam. Min urak ni, hu rilo labik padang ngak rah tui jalan ini daok khut tayah, hareik tamuh bak, nerak sarau tuh ban glai ban klo, bruk lih mek takai jalan, raong palao athur di jalan bo biak jhak saong mbuan ba tal bala angaok jalan. Anak bruk ni, dom jabat chức năng di tỉnh Ninh Thuận njauk samar drah saong hu jalan langyah piah pasiam, buh jien tame ngak pasiam veik piah khik siam mekre, salamat ka bhap bini tuk ndik radaih di jalan ni, rik tame bruk cak rok patagok kinh tế - xã hội di bhum palei.

Dalam sa mbang họp báo, urang daong akaok Gah Y tế dunya (WHO) lac ong Tedros Adhanom Ghebreyesus hu panuac lac dunya daok dalam vaktu biak kan kandah dalam jit praong COVID-19 kayua biến thể Delta di virus SARS-CoV-2. Urang dang akaok WHO ndom lac biến thể Delta urak ini hu mbaok di 98 taneh ia. Ong Ghebreyesus brei thau, virus ini biak jhak, daok salih karei saong daok njom mbak khang di rilo taneh ia, kol drei daok dalam vaktu biak kan kandah di jit praong ini.

Urang ngak praong gah y tế di Canada brei thau dalam adit tapa hu 719 urang metai di tỉnh Bristish Columbia, gah ia harei trun di negar ni, dalam tukvak langik pandiak 44 - 49oC dui atah. Rilo urang metai lac dom urang praong thun daok sa drei di sang. Gah duah ilamo Canada mboh biak tatuak drei tuk langik pandiak mbang ni rahtabiak dalam bilan 6, oh lac puac bilan 7 atau bilan 8 yau yaok thun. Dalam tuk nan, urang jakar Mỹ daok duah thau bruk 100 urang metai di bang Oregon, lac labik hu langik pandiak 47oC dalam adit tapa.

Dalam panuac khan tuk biar harei kabroi pambuak tal bruk laik kapal haok  quân sự C-130 di gah meraong negar Philippines, Akaok Mintri Quốc phòng taneh ia ini brei thau lac gah daong duah menuac njauk bala hu duah mboh 17 urang metai saong 40 urang daok diuk. Kapal haok C-130 di không quân Philippines daok pajeng lin meng ban Cagayan de Oro angaok pulao Mindanao tal pulao Jolo di tỉnh Sulu ye laik trun di harei 4-7. Bruk nan rah tabiak tuk kapal haok blait tabiak truh jalan tuk par trun. Tui akaok mintri Quốc phòng, kapal haok ini pajeng 92 urang, kuhria gam 3 urang peih kapal haok saong 5 urang duh bruk angaok sruh kapal haok. Dom urang daong duah menuac njauk bala hu mbaok pak di labik nan saong daok kham merat duah menuac, caong lac daok hu menuac daok diuk./.

Urang lang: H.Pha & Thu Thảo - 5/7/2021