Tổng Bí thư meyaom dom urang y tế, bol lin... samar tame ngak bruk brei kham merat pacang caga jit ruak

Page ini, Tổng Bí thư Nguyễn Phú Trọng dang akok var ngak bruk saong dom urang ngak praong ka bruk pacang caga jit Covid-19. Tổng Bí thư meyaom dom urang y tế, bol lin, urang cong an, dom mentri, dom palei samar tame ngak bruk brei kham merat pacang caga jit ruak. Tui nan, ong tacei tabiak cambaic dom bruk oh ka siam, having havang, oh caik hatai dalam bruk pacang caga jit ruak. Tổng Bí thư Nguyễn Phú Trọng khin Rajaei, dom Mentri dom gah di palei pala patui veik bruk kuhria duk iek dahlau, peih ngak sumu gauk, pataom tame brei ngak sa jalan, parabha bruk cambaic laic, pasang iek jit ruak ka siam dalam  tukvak anak tal.

Jala pandiak harei ini, di mbang nyaom ka 2 HĐ bhap bini Ban raya HCM mbang X vaktu 2021-2026, ong Phan Văn Mãi, Phó Bí thư thường trực Thành uỷ pok ngak Akok UB bhap bini Ban raya HCM. Dahlau di nan, brei thau ka danak dak bruk ngak di drei, ong Phan Văn Mãi lac meda brei pataom tame bruk tacei ba ngak cati catang dom jalan pacang caga jit Covid-19 piah pacang caga hu jit ruak, sang ka siam jang ka raidiuk bhap bini; gam roh duah piah ba tabiak dom bruk ngak, jalan ngak jak ba hu ralo abih preih khang, ba Ban raya dak harei dak cak rok patagok.

Page harei 24/8, Pasak Pasang iek ruak kik Đồng Nai brei thau: mbang ka 1 chien dich brei dut iek ruak peih praong di tỉnh hu mboh labaih 1.700 njom ruak COVID-19. Tui Pasak Pasang iek ruak kik Đồng Nai, dom palei kurang manuac ngak bruk mek mau dut iek ruak, mbuan kurang veik urang njom ruak kayua hu dom urang oh brei dut iek ruak. Urak ini, dom bhum palei dalam tỉnh daok patui veik bruk brei mek mau dut iek ruak pambak praong mbang 2. Mbiah tal ini, Đồng Nai hu 19.308 mbang urang COVID-19, 140 urang metai vong.

UBND tỉnh Bình Thuận birau batabiak sarak brei daong urang ngak gaok kan kandah kayua jit COVID-19 tui Sarak 68 di Rajaei. Dom urang pablei pandap jrao, urang pablei salih di dom darak meng kan; urang pablei ve so jrao; urang padang ngak, peih radaih kuan  di Ban Phan Thiết saong ban sit La Gi njauk padeih ngak kayua daok ngak tui patah gauk, gaok kan kandah. Langiu di nan, daok  hu dom gru pato, urang khik anek naih, urang ngak bruk di dom sang bac, labik pato bac, urang ngak bruk di dom baoh sang pablei pandap mbang menyum, ba tuai rivang main, duh gah dulich…Yaok urang brei daong sa mbang ngan saong 1 trieu 500 ribau ndong.

Nyaom kapol urang y sỹ, bác sỹ halan hatian di tỉnh Ninh Thuận page ini tagok jalan tame Ban raya HCM. Dalam 20 urang jakar y tế palih ruah mbang hu 4 bác sĩ, 12 điều dưỡng saong 4 kỹ thuật viên dut iek ruak. Dom urang halan hatian nan hu klauk blaoh dua mbang vaccine pacang Covid-19, hu pasram patia pakhang prein cấp cứu, sangka iek ruak ka urang Covid-19.  Sở Y tế Ninh Thuận brei thau, dom y bác sĩ nan brei ngak bruk pacang caga jit di Sang iek ruak Q4.

Jabat Khik iek pandap mbang menyum saong jru tavao Mỹ (FDA) birau brei ginup harak gar ka vaccine COVID-19 di Pfizer/BioNTech piah klauk ka urang umo 16 thun tagok. Bruk ba tabiak nan meda ba tal  rilo bruk salih karei di liên mbang saong tiểu mbang, gam ba tabiak bruk brei klauk vaccine. Dahlau di nan, rilo bhap bini Mỹ ndem oh saong vaccine kayua lac Jabat Khik iek pandap mbang menyum saong jru tavao Mỹ oh ka brei harak adat ginup saong huac dom phản ứng karei yaom lac biak takik rah tabiak.

Pak biến thể karei chủng Delta birau hu duah mboh dalam dom mau ruak payua mai meng rilo labik di negar Thái Lan. Mbiah tal ini, dom urang ilamu duah mboh hu labaih 60 đột biến meda dreih patoa veik di chủng Delta. 22 dalam dom đột biến nan hu thau lac ba tal dom biến thể phụ birau. Dalam tuk nan, Thái Lan  daok patui veik bruk brei peih veik pabah mbang negar di puac thun ini tuk jit ruak Covid-19 di taneh ia ini mboh yau kadun.

Sa adit hadei mbang megei baoh taneh khang 7,2 độ richter ngak khut tayak bhum taneh Tây Nam negar ngak jaik 2.200 urang metai, yaok ribau urang njauk rambuac, Haiti dang anak bruk samar chip kayua kurang jien daong. Bhap bini di dom ban sit bhum gah meraong negar taneh ia ini daok kuac tagok, duah atau urang lam ala huluk patau. Yaok pluh baoh sang glut jaleih ba tal rilo raidiuk urang njauk ndih langiu ala langik./.

Urang lang: Ái Nghiêm – 24/08 16:37:54