Meng tuk padang tabiak mbiah tal harei ini, Kadung jien daong urang ngak nong tỉnh Bà Rịa –Vũng Tàu hu abih tih labaih 51 tỷ đồng, daong ka labaih 1.500 mbang baoh sang urang nong mesre tui 99 danak dak nyaom baoh sang pambuak gauk ngak nong, ngak ikan, ngak sara saong dịch vụ…Kapul urang nong tỉnh jeng hu peih dom tal pato bruk ngak nong pambuak saong brei mesraiy phun jien meng Kadung jien daong urang nong.

Meng hu bruk daong di Kapul urang nong phường, sang ong Trần Quốc Kính daok di  khu phố 2, phường 10, ban Vũng Tàu, meng labik lac sang kan kandah kham merat yam tagok jeng baoh sang urang nong ngak mbang pablei salih naih joi pakat ban Bà Rịa -Vũng Tàu dalam 5 thun gam. Dahlau diah, sang ong Kính lac sang kan kathaot, oh hu taneh pala drak. Piah duah hu jien, diuk pasang ong padang var ro raong pabui di taneh sang drei. Hu Kapul urang nong phường 10 dang angan brei mesre 30 triệu đồng,  sang ong Kính buh tame peih praong bruk raong pabui. Urak ini, var raong pabui di sang ong  tuk halei jeng hu labaih 50 drei, yaok thun laba hu labaih 180 triệu đồng meng bruk raong pabui.

Ngan saong taneh pala drak 7.500 met vuong, dahlau diah sang sa-ai Bùi Thị Thơm daok di palei Bình Mỹ, xã Bình Ba, huyện Châu Đức, pala phun mbang baoh saong amraik kalu. Min, kayua oh thau ilamu pala drak nan ye labaih 80% got amriak kalu di sang sa-ai metai abih, bein phun mbang baoh jeng oh hu rilo baoh. Hu Kapul urang nong tacei pato ilamu pala drak, raong glang saong hu Kadung jien urang nong brei mesre 30 triệu đồng, sa-ai Thơm blei pajaih amriak kalu siam, khak drak, raong pabui saong manuk…Sa-ai daok hu pala jaik 100 phun durieng, dauh jien tame jaik 100 triệu đồng yaok mbang paik baoh. Tui jalan ngak mek katut raong atah, sa-ai Thơm raong 1.000 drei manuk saong labaih 30 drei pabui rilo. Urak ini, yaok thun sa-ai Thơm mek jien tame hu labaih 400 triệu đồng. Oh lac cak rok patagok kinh tế baoh sang bo sa-ai tuk halei jeng abih hatai daong ka urang kan kathaot, kurang phun jien ngak mbang yam tapa truh kan kathaot. Sang sa-ai hu Kapul urang nong dom pakat pok meyaom lac baoh sang  ngak mbang apblei salih naih joi rilo thun gam./.