Di tuk pahadar 67 thun harei peih paha ban ine Hà Nội (10/10/1954 - 10/10/2021), harei  8/10/2021, Muyim Mỹ thuật Việt Nam hu peih pabah mbang parang iek online song angan lac “Ký ức Hà Nội” di labik https://www.facebook.com/baotangmythuat song angaok  website di muyim (vnfam.vn). Parang iek hu  25 bah rup cih, đồ họa meng rilo janih  yau: sơn mài, sơn dầu, tanyak, sambo màu, sambo ia, chì, sarak kayau…hu palih ruah dalam bộ sưu tập di muyim. Hu mbaok tame mbang parang iek ni, rahra hu mong iek dom plah thaot  gheih mekre karei di gauk, dom urang cih yau hu ba menuac urang duik veik song dom harei bilan dak rai, dom harei akaok camereip mesruh Hà Nội kiên cường, anh dũng, pacang takai kol khamang, ngak patrun pren khang di kol khamang, khik hu siam mekre salamat abih gah  kuhria caga ka bruk mesruh pacang suai lavik.

Ong Nguyễn Văn Hiếu – Yam ndok Sở Pato Megru  TP.HCM brei thau, dom anek saih bac online di pakat tiểu hoc saong THCS biak glaong, labaih 97%, pakat THPT lac 99%. Tapa tukvak pato saong bac online, gah pato megru ban raya mboh lac, bruk bac jeng daok rilo kan kandah, kayua labaih 1,3 triệu anek saih tame internet hoang gauk sa mbang blaoh nan ye nyu ba tal quá tải. Urak ini hu labaih 1.500 labik bac da-a hu mek ngak labik brei daok karei taong ruak COVID-19, dalam nan bahrau hu jaik 150 sang bac bahrau bayar veik. Tal jaik bilan 11/2021, dom labik ini meng hu bayar veik saong abih 1 bilan piah pruh jru pametai anek ruak, ramik pasiam veik. Tui kuhria, akaok bilan 1/2022, dom sang bac di TP.HCM meda hu peih pabah mbang brei ka anek saih tame bac veik.

Tỉnh Lâm Đồng tui kuhria raok tuai  langui tỉnh meng bilan 11/2021. Dalam nan, labik raok tuai tok hu peih tabiak ka dom labik  padeih padei, labik du lịch song dom jabat ngak  dịch vụ di ban Đà Lạt, Bảo Lộc song huyện Lạc Dương, Đức Trọng, Di Linh, Đạ Huoai. Tuai brei tut angan hu mbaok tame danak dak  du lịch ginup abih di doanh nghiệp lữ hành song hu harak pambruk bruk bảo hiểm y tế, bảo hiểm du lịch tui hukum; brei klauk ginup vaccine pacang COVID-19 song hu harak chứng nhận klauk jru dok pandar atau hu harak  xác nhận abih ruak COVID-19 tuk vak oh tapa sa thun; hu dut iek SARS-CoV-2 meng jalan RT-PCR/RT-LAMP dalam 72 tuk dahlau di tuk tal Lâm Đồng song hu jabat hu thẩm quyền dut iek  brei harak lac âm tính.

UBND quận 7, TP.HCM hu panuac likau ngak iek bruk peih pabah mbang dom labik pablei pandap mbang menyum pak di labik meng harei 10/10 mbiah tal tuk TP.HCM brei adat peih veik bruk mbang menyum pak di labik tui dom jalan ngak cambaih laih.  Tapa 15 harei ngak iek dalam quận, hu 434 doanh nghiệp haong sang pablei salih (langiu labik chế xuất), gam haong jaik 4.000 menuac ngak hu ngak bruk veik. Tapa taong yaom, bhap bini haong doanh nghiệp chreh chrai haong bruk peih pabah mbang veik saong dom labik nan jeng ngak njauk tui dom bruk pacang caga jit COVID-19.

Urak ni, dom palei pala bingu pablei ka drak pasa Tết Nguyên đán di tỉnh Bà Rịa-Vũng Tàu daok trun pajaih  rilo janih bingu cúc hu tukvak tamuh lavik harei. Min, kayua jit COVID-19, urang pala dok huac oh ka khin trun pajaih ngak ka mblang taneh dom palei bingu trun rilo. Tui yaok pataom meng gah ngak nong, bilan bingu  Tết thun ni, urang nong di pak ni trun pajaih hu labaih 100 ha, trun 20 ha dut song bilan bingu Tết thun blaoh.

Nhà văn Abdulrazak Gurnah, urang Tanzania daok di negar Anh, mek hu giải Nobel văn chương 2021. Viện Hàn lâm Thụy Điển brei thau di tuk peih bruk jao giải Nobel văn chương harei 7/10 lac: “Ông Abdulrazak Gurnah hu pok angan di Nobel thun ini “kayua bruk lih tame oh huac hagait saong hatai anit di ong ngan saong dom bruk mai meng chủ nghĩa thực dân saong thar vak di dom urang tị nạn dalam lubang dalam pacang cakak dom nền ilamu haong lục địa". Giải Nobel văn chương 2021 hu rilo menuac maong akaok, kayua ini lac giải thưởng hu angan je dang dhi 1, dhi 2 di dunya, bo daok kayua panuac sanya "đa dạng hóa" giải thưởng ini di Viện Hàn lâm Thụy Điển.

Bruk mesruh pacang Covid-19 di  Ấn Độ jeng oh ka abih. Dok hu rilo puk palei di negar ni  hu menuac dương tính glong, yaom lac bruk klauk jru hu peih prong. Min, Ấn Độ urak ni hu ginup pren pacang cakak haong mbang jit bahrau tagok tal  500.000 mbang urang sa harei.  Ni lac panuac ndom di ong Lav Agarwal, sa urang jakar di mintri Y tế Ấn Độ. Piah caga ka bruk jhak di abih, Ấn Độ hu caga  labaih 836.000 papan iek ruak ka urang ruak Covid-19 song jaik 1 triệu papan ndih di dom labik brei dok karei pataom gauk.

Negar Anh khan lac meng harei 11/10 tal meda brei klaak bruk ieu paatah gauk piah caga jit COVID-19 ngan haong tuai mai meng 47 taneh ia saong bhum taneh urak ini daok dalam angan bhong meriah, dalam nan hu Nam Phi haong Thái Lan, saong brei pacadu dom bruk ngan saong dom taneh ia. Angan bhong meriah di rajaei Anh urak ini hu menuac njauk COVID-19 glaong, dalam nan hu Colombia, Ecuador, Panama haong Venezuela. Tui nan, dom menuac mai meng dom taneh ia ini brei daok karei 10 harei di hotel kayua rajaei tacei, brei dut iek PCR saong dom dut iek karei. Jien ka bruk ini glaong jang jien ka 1 mbang par./.

Urang lang: H.Pha & M.Phuong – 09/10/2021