Page ni (02/10), Mintri Quốc phòng pambuak haong Ban Tuyên giáo Trung ương saong Tỉnh ủy Lạng Sơn peih ginum biai khoa học pakat negar: jayah Biên giới Thu - Đông 1950- pamaong tal jalan ngak di Đảng saong kadha bac meng sajarah. Nan lac bruk ngak pahadar 70 thun jayah Biên giới Thu - Đông (1950- 2020). Ban peih bruk ginum biai hu taduan jaik 90 kadha vak pathau khan, tham luận di dom urang dang akaok, urang dahlau daih dang akaok Đảng, Quân ủy Trung ương, Mintri Quốc phòng saong dom kapul chính trị-xã hội di Trung ương, tỉnh, ban; dom urang hu mbaok di tuk sajarah, tướng lĩnh, sĩ quan, dom urang roh duah ilamo dalam saong langiu bol lin. Trung tướng Nguyễn Tân Cương, Ủy viên BCH TW Đảng, Thứ trưởng Mintri Quốc phòng, akaok Ban pato tacei mbang nyaom biai brei thau:“jayah Biên giới Thu- Đông 1950 lac dom kham marat di bol lin saong bhap bini drei dalam dom thun “mesuh metak dalam pacang cakak meng 4 gah” di khol khamang, min ala bruk par akaok biak hadah hadai di Đảng, dang akaok lac Chủ tịch Hồ Chí Minh; brei mboh meta maong atah di Đảng drei”.

         Meng hu jit  COVID-19 ngak ka gah jalan pasei gaok kan kandah, tui nan yaok ribau urang ngak njauk trun jien bilan atau brei padeih harak pambuak bruk ngak. 9 bilan thun  2020, jien mek tame di  Tổng công ty jalan pasei  Việt Nam tok hu jiak  1.308 tỷ đồng, tui kuhria khat labaih  428 tỷ đồng. Tổng công ty brei padeih peih  6 dalam 10 kapul radeih pasei  jalan  Hà Nội – ban raya  Hồ Chí Minh. Dom kapul radeih pasei di dom tỉnh ban karei jeng brei padeih meneing, tok peih di dom harei puac adit song dom jalan njauk padeih peih radeih pasei. 

         Harei ni, ndem mayai haong urang vak di rayo sap ndem Viet Nam daok di Campuchia, ong Công Vị Miên ( Kong Vimean), Phó quốc vụ khanh gam lac urang brei panuac di Mintri jalan mbak Campuchia brei thau, rajaei Campuchia daok pasang iek dom jalan ba tabiak bruk padang jalan pasei pambuak haong ban ine Phnom Penh – ban raya Hồ Chí Minh meda hu makna biak praong dalam bruk jhul khang pablei salih, cak rok patagok kinh tế di dua negar. Bruk patagok jalan pasei meda caik ka bhap bini dua negar nao mai, pablei salih pandap panda hu rilo jang saong ngak patrun dom kan kandah di jalan mbak saong jalan par ahoh. Anak tal, gah jalan ni meda jeng jalan praong pajeng tal 30% kim ngạch pablei salih, nao mai di dua gah.

         Dalam jaik 3 thun ni mai (meng thun 2017), bhap bini dom huyện bhum Đồng Tháp Mười di  Long An eng drei kuac raok mblang hamu piah ngak danao  rong ikan pra pajaih, ngan song taneh praong 3.550ha. Piah raok danao rong labaih  1ha, urang nong brei buh tabiak labaih  100 triệu đồng. Min, hadei di sa tuk vak rong oh kein laba  njauk khat lahik , urang ni ieu pablei, urang deih lam danao piah pala padai, ngak taneh lubang....Min, karja oh ka hu jalan ngak halei langyah.

          Ủy ban bhap bini huyện Cù Lao Dung (tỉnh Sóc Trăng) bahrau peih bruk brei angan xã An Thạnh 1, huyện Cù Lao Dung, mek hu chuẩn xã palei pala bahrau paglaong thun 2020. Xã An Thạnh 1 meng sa xã ngak nong, tagok meng tanut bira, min ngan saong dom sarak, kham marat saong jumpataom gauk, sa hatai saong gauk di hệ thống chính trị, thun 2014, An Thạnh 1 jeng xã camriep di tỉnh mek hu chuẩn palei pala bahrau. Tal urak ni, An Thạnh 1 ngak hu salah 5 kadha, jeng xã camriep mek hu chuẩn palei pala bahrau paglaong di tỉnh Sóc Trăng. Dalam xã daok 17/1961 sang kathaot, meblah 0,87%; 91 sang jaik kathaot, meblah 4,64%. Jien mek tame kuhria tui akaok menuac thun 2020 lac labaih 60 triệu đồng/sa urang/sa thun.

          Ấn Độ brei thau hu  3 urang lin metai song 4 urang karei njauk rambuac dalam sa mbang tong gauk  song bol lin  Pa-ki-xtan (Pakistan) di labik jalan pasang iek  (Loc) di  Ca-xmia (Kashmir) melam kabroi (01/10). Urang jakar  Ấn Độ ndom lac bruk melam bloh  di gah  Pa-ki-xtan lac ngak suan bruk padeih cuk tuk tong tame  Ấn Độ di jalan pasang iek  di labik  Crít-na Ga-ti (Krishna Ghati), dalam  quận tapen negar  Pôn-chơ (Poonch). Gah  Ấn Độ hu taong veik jip hadei di mbang tong tame ni.

Rajaei Singapore  khan lac brei klak dom pacang cakak di tapen negar ka tuai meng Việt Nam saong Australia (lingiu di bang Victoria) meng harei 8-10 anak tal. Tui nan, tuai damuai meng Việt Nam saong Australia meda likau harak adat nao mai meng ahaoh piah tame Singapore meng harei 1-10 saong harei avar abih meda hu tame negar ni lac harei 8-10.

         Kuhria tal abih bilan  9, dom urang njom Covid-19 di  Indonesia lac 13,6%, glong abih di bhum  châu Á. Taeng bilan  9 meng bloh , Indonesia hu urang njom  Covid-19 tagok samar labaih  112.000 urang, meblah 39% tong abih urang jom  Covid-19 di negar ni. Dom urang metai kayua  Covid-19 dalam bilan  9 jeng glaong di abih tagok tal 160 urang. Ban ine  Jakarta lac labik hu rilo urang jom song metai kayua Covid-19 rilo abih di Indonesia, urak ni dok peih bruk paatah di gauk tui jalan ngak prong.Tui yaok pataom angaok blah worldometers, di dunya urak ni hu jiak  34 triệu 500 ribau urang njom, song urang metai  yam tapa tanut 1 triệu urang./.

Urang lang: Thu Thảo -H.Pha  2/10/2020 - 15:36:38