.Rilo kadha doh hu peih ngak dalam harei 

Pahadar 91 thun harei Mặt trận negar Việt Nam (18/11/1930 – 18/11/2021), dah page harei 14/11, Tổng Bí thư Nguyễn Phú Trọng  mai hu mbaok di Harei roya jum pataom bangsa di sang ilamo palei 5, xã Yên Sở, huyện Hoài Đức, Hà Nội. Ndem biai bui sambai haong bhap bini di harei roya jum pataom, Tổng Bí thư Nguyễn Phú Trọng ndom lac, Harei roya jum pataom piah dak padang, pakhang saong patagok quyền ngak po di bhap bini, patagok prein khang jum pataom bangsa saong paglaong labik dang di Mặt trận Negar Việt Nam dalam tukvak bahrau. Tap bruk ngak di Harei roya jum pataom, meda ba mai rilo makna, ngak kaya mada jang dom bruk ngak di cách mạng, pok mayaom prein khang di rahra, rik tame bruk jayah di dom bruk ngak chính trị, cak rok patagok kinh tế -ilamo xã hội meng yaok puk palei, tổ dân phố, labik daok di bhap bini dalam taneh ia.

Anak bruk urang  F0 tagok glong, ban  Thủ Đức, TP.HCM hu peih bruk tabiak mbaok labaih 2.278 urang jakar công chức, viên chức, gah halan hatain, piah dong bruk pacang caga  jit COVID-19 di labik song peih bruk  khik ramik an sinh dalam Rtuk vak bahrau. Jeng di harei ni, ban Thủ Đức hu peih bruk ramik khik  an sinh ka bhap bini pak di labik. Mban tacei jalan pacang caga  34 phường iek glang ka tong abih  dom urang F0 hu rai duik kan kandah brei dok karei, iek ruak di sang.

Sruh gilai pajeng 6 y bác sĩ, urang ngak gah y tế di Pasak pasang iek jit ruak tỉnh saong 16 urang jakar, chiến sĩ biên phòng hu nao tal pulao Phú Quý harei kabroi. Kapul hu ba tui 4.800 bộ test samar, 2.000 khan aw daong khik rup pabhap, pataih pacang mbaok saong dom pandap panda y tế daong samar drah ka huyện pulao pacang jit tamuh tabiak. Hadei di 2 thun oh hu jit Covid-19, 3 urang njom camriep di pulao hu mboh di harei kabroi 11/11. Dom urang ruak hadei di nan tagok rilo. Atah di ni 3 harei, huyện ngak catang bruk paatah di gauk, bhap bini peih ngak catang 5K.  Gilai pajeng tuai Phan Thiết - Phú Quý brei padieh nduac.

Harei  14/11, di xã Phước Hữu, huyện Ninh Phước, tỉnh Ninh Thuận, Trungnam Group peih pakak song ba tame pandar danak dak thương mại sang mac điện hangin ka 5. Sang mac điện hangin ka 5 Ninh Thuận ba tame pandar  yau brei mboh bruk ngak salah bloh 200 MW điện hangin song 650MW điện ia harei song pren khang abih tih  853,15 MW di Trung Nam di  Ninh Thuận. Tal tuk vak ni, Trungnam Group hu ba tame pandar  thương mại rilo danak dak  điện năng lượng pasiam veik di Ninh Thuận yau  Điện hangin Thuận Bắc; Điện ia harei Thuận Nam, Thuận Bắc. Tổng abih bih  sản lượng 2,25 tỷ kwh/sa thun. Tong abih phun jien buh ngak di Trung Nam di Ninh Thuận labaih 2 tỷ USD, rik dong ba  Ninh Thuận tal jiak   labik lac pasak  năng lượng pasiam veik di taneh ia.

Bier harei kabroi, dom labik di ceik Bà Đen (Tây Ninh) rahtabiak bruk glut jalieh taneh, rilo patau meng mangaok ciek laik trun min menuac sia oh njauk hagait, drap ar di bhap bini jeng oh khut khat hagait. Meng di tuk rahtabiak bala, UBND tỉnh Tây Ninh ieu kakei dom jabat hu pambuak tal, samar drah taong yaom dom kan kandah di bala taneh riya meda rahtabiak viek dalam tuk langik tasik jeng daok hajan khang piah tagok jalan pacang caga. Gam tui di nan, ieu kakei mBan khik ramik ciek Bà Đen njauk tui iek biak catang bruk glut jalieh taneh, samar drah rami ramik manuac ngak, pandap panda, radieh piah samar drah ngak pasiam, caga dahlau dom bruk meda rahtabiak. Labik glut jalieh oh daok dalam bruk khik ramik di dom danak dak daok padang ngak vil val ciek Bà Đen. 

Rajaei  New Zealand dok hu dom jalanj ngak khang ka bruk klauk  vắc-xin pacang  Covid-19 song dalam adit ni, hu biak rilo urang ngak di negar ni brei padeih bruk meyah lac oh klauk jru. New Zealand dok pamong tal jalan  mek hu bruk klauk jru ngan song  90% urang meng  12 thun tagok piah padeih bruk pacang veik song salih tapa bruk duik rai song  Covid-19. Hadei di tuk vak ni dom urang oh klauk jru gaok oh takik tavak tavaiy tuk khin taom gaok song dom  dịch vụ karei .

Dom taneh ia châu Âu, dalam nan hu Bỉ, Đức, Áo, Hy Lạp, Hungary, Ai-len, Hà Lan saong CH Séc harei kabroi brei ba tbaik dom jalan ngak biak catang piah pacang cacak jit ruak bahrau daok mbuan njom mbak trak damak jang. Áo jeng taneh ia di châu Âu camriep brei pacang cakak manuac ka oh klauk vắc-xin caga Covid-19. Hà Lan ba tabiak dom jalan pacang cakak manieng dalam 3 adit, dalam tuk Đức daok pachrieh ngak bruk meng atah meng adit ini. Tui pasak pasang iek ruak kik châu Âu (ECDC), ini lac dom taneh ia daok dalam angan dom taneh ia biak njauk duh hatai saong biak huac hana ka bruk mbuan njom mbak jit ruak Covid-19.

Lambaok pakat glong ka sarak đối ngoại song an ninh di Liên minh châu Âu, ong Josep Borrell harei 14/11 khan lac, Liên minh châu Âu samar pathau khan  dom bruk tong phạt bahrau mong tame karja  Belarus dalam harei ni, 15/11 kayua dom srau kadau ka urang  di cư di jalan tapen negar di Belarus song Ba Lan. Anak meta tui ong Josep Borrell, EU hu tong phạt labaih  30 urang jakar dalam karja  Belarus hu mong lac pagam tapak tal bruk  srau kadau urak ni di  jalan tapen negar Belarus-Ba Lan./.

Urang lang: Thu Thảo -Hanipha- 15/11