Di tuk pahadar 96 thun Harei báo chí cách mạng Việt Nam (21/6/1925-21/6/2021), harei ini, ong Nguyễn Xuân Phúc – akaok negar – hu payua panuac tadhau ayuh tal taong abih dom rai urang ngak báo dalam taneh ia, saong pok meyaom dom urang ngak báo oh huac glaih glar, hu mbaok tame bruk pacang caga jit COVID-19 luac tukvak tapa. Dalam panuac tadhau ayuh, Akaok negar ndom cambaih: “Dalam luac sa thun meteh tapa, meng tuk jit praong COVID-19 tamuh tabiak, dom urang ngak báo di kol drei kham merat abih drei, oh huac kan kandah glaih glar, harei melam nao gam haong dom kapul pacang caga jit piah khik caga prein yava di bol bhap rahra. Dom urang ngak báo hu ngak brei hadah jang ilamu meng kan di báo chí cách mạng Việt Nam kayua CT Hồ Chí Minh padang tabiak saong pato pasram.

Dah page ni, Mintri Y te brei thau hu 47 urang njom COVID-19 bahrau, dalam nan hu tal 33 urang di ban raya HCM. Meng harei ni, ban raya meda peih 100 kapul pasang iek piah taong yaom bruk mbuan njom mbak saong pato tacei pacang caga jit di dom doanh nghiệp, piah caga pacang jit, khik tani tanat bruk ngak, gam pacang cakak jit di ban raya HCM. Dom kapul meda taong yaom saong ieu dom sang mac, doanh nghiệp mbuan njom mbak samar ramik ngak pasiam piah pacang cakak jit njom mbak tame.

Meng mon 12 kreh melam 21/6, 2 labik hu rilo urang ngak di Bình Dương lac ban sit Thuận An haong ban sit Tân Uyên brei dao pa-atah di gauk tui Sarak 16 di Thủ tướng Rajaei. Kuhria meng mbang jit ka 4 tal harei ini, Bình Dương hu 87 urang njom COVID-19 dalam bhap bini, rilo meng lac daok di ban sit Tân Uyên haong ban sit Thuận An. Ini lac 2 labik hu rilo sang mac, rilo urang ngak, tamuh tabiak dom urang ruak camereip lac dom urang ngak, tui nan rilo labik njauk pacang veik. Tui kuhria mboh, jit ruak daok njaom mbak samar saong srau kadau, meda daok njom mbak praong, samar.

Meng harei ni, Công an ban Đà Nẵng pambuak bruk haong dom gah, dom puk palei peih veik bruk ngak di bilai pacang caga jit Covid-19 di dom jalan tame tabiak ban. Urang peih radaih meng bhum jit tame Đà Nẵng brei hu dut iek mboh âm tính haong SARS-CoV-2 dahlau 72 maong. Mayah oh hu yau nan, oh brei radaih tame saong ieu urang peih radaih peih talauk nao veik. Jeng dalam harei ni, ban Đà Nẵng meda peih bruk dut iek ka urang lambaok baoh sang.

Tui adat pacang jit di ban raya, labik pablei salih pandap mbang menyum oh brei tapa 10 menuac dalam sa tukvak, daok dom siêu thị jeng daok brei tuai tame yau yaok harei min brei khik atah di gauk 2m tuk cang kuhria jien bayar. Piah pabak bruk pacang caga jit, dom siêu thị, labik pablei pandap mbang menyum… hu khik piah pandap rilo jang meng 30 - 40% duk haong tukvak karei, dalam nan rilo meng lac brah, mì, menyek mbang,  đồ hộp... haong dom janih njam patam, baoh kraoh, baoh kayau… Menuac blei urak ini trun takik.

Dalam tuk jit daok rahtabiak sarau kadhau, yaok piluh negar njauk padeih bruk klauk vaccine mbang 2 kayua kurang jru. Tui gah Y tế dunya, urak ni hu  30-40 taneh ia di dunya oh daok ginup piah klauk mbang klauk ka 2 vaccine caga COVID-19 ka bhap bini, abih di nyu nan lac dom taneh ia daok pagam pambak tame bruk pabak vaccine di gah A-xtra Dê-nê-ca (Astrazeneca). Piah pasiam bruk ini, rajaei Hàn Quốc harei ni brei pandar vaccine caga COVID-19 di Phai-dơ (Pfizer) piah klauk ka 760.000 urang hu klauk mbang camriep meng vaccin di A-xtra Dê-nê-ca. Dalam tuk nan hu rilo taneh ia pilih ruah dui atah tukvak di 2 mbang klauk piah khik tani tanat lac rilo urang halei jeng hu klauk abih.

Hàn Quốc meda brei pacadu dom bruk paatah di gauk saong brei adat pataom gauk hu 6 urang di ban ine Sơ-un (Seoul), meng harei 1/7. Bruk nan hu ba tabiak tuk Hàn Quốc hu klauk vaccine caga Covid-19 ka labaih 29% rahra saong daok klauk caga ka pahu 70% rahra di bilan 9 tal. Tui adat bahrau, dom nhà hàng, labik me-in sambai tuk melam, kuan café hu brei adat peih pablei tal mon 12 melam, oh daok lac mon 10 melam yau urak ini. Dom menuac njaom ruak bahrau yaok harei dalam labaih 1 adit tapa di Hàn Quốc trun daok oh ka tal 600 urang.

Salipan ranaih saong sa urang praong thun metai dalam bala radaih ginuk gauk angaok jalan cao tốc di hạt Bắt-lơ (Butler), bang A-la-ba-ma (Alabama), Mỹ di harei kabroi. Tui urang kanja di pak ni, 18 sruh radaih ginuk tame gauk di jalan cao tốc. Langiu di 8 uranaih kumei umo meng 4 tal 17 thun nao angaok sruh radaih buýt metai, sa ranaih kumei umo 9 bilan haong ame umo 29 thun di sruh radaih pajeng tuai jeng metai hadei di tuk rahtabiak bala. Bala rahtabiak tuk rabuk rahtabiak di A-la-ba-ma ngak brei hajan khang saong hangin praong./.

Urang lang: M.P – Thu Thảo