Urang nong di bhum atah bayar hu blei pandap yaom tani tanat dalam tuk Tết 

Kapul urang ngak nong VN pakat negar brei thau, meng hu bruk sangka di Karja, jaik 5.500 xã bhum bangsa takik (samu 49% dom xã dalam negar) hu buh jien tame padang ngak gah kinh tế - xã hội; labaih 97% dom palei hu pandar điện negar, jaik gần 90% dom palei hu jalan radaih nao tal pasak xã… Tapa nan hu daong palagaih ka urang ngak nong dom bangsa takik patagok hu prein khang di drei,salih bruk ngak mbang, patagok bruk ngak nong tui jalan ngak tabiak pandap piah pablei, tui nan baoh sang kathaot saong jaik kathaot trun daok 35,5%.

Paih pabak bruk blei pandar di bhap bini, tỉnh Ninh Thuận hu buh tabiak 18 tỷ đồng piah daong ka dom doanh nghiệp peih ngak danak dak tani tanat yaom kaom dalam tukvak tết thun sak kubao 2021.Pandap panda hu padang tabiak tui danak dak tani tanat yaom kaom lac dom janih pandap pandar yaok harei yau ye: brak,brak ndeuk,ralaow pabui,limo,baoh manuk ada,manyek mbang, saradang… pandap hu mbaok di danak dak brei khik hu siam mekre, hu asal cambaih laih, pabak bruk blei pandar di bhap bini, kuhria gam tuk darak pasa rahtabiak sarau kadhau.

Harei 16/12,Viện KSND tỉnh Bà Rịa - Vũng Tàu brei thau, hu ba harak gar ka bruk“Pagam pambak tame quyền saong bruk ngak dalam tuk ngak bruk” rah tabiak di sang iek ruak Bà Rịa (tukvak 2011-2014) ka TAND tỉnh. 3 urang njauk ba tabiak piah kaoh tui hukum lac: Đặng Hồ Vân Thảo, Lê Thị Thu Hiền saong Phạm Thị Ái Nhân (jeng daok dalam TP Bà Rịa) jeng lac urang kế toán  di sang iek ruak. Hu thau, meng bilan 1-2011 tal bilan 11-2014, dom urang nan suak mek harak thu tạm ứng jien iek ruak dalam hồ sơ atau eng drei ngak rilo jang harak biên nhận tạm ứng jien iek ruak, mek angan urang ruak atau gauk gar di urang ruak piah mek jien iek ruak mbang 2, mbang 3, meblah mek labaih 932 triệu đồng. Bruk nan hu mboh hu thau meng 6 thun dahlau,min mbiah tal urak ini meng ngak salah cáo trạng.

Dua urang guk biak jhak nduac tabiak truh labik krteik di sang guk Cây Cầy (huyện Tân Biên, Tây Ninh) di harei 14/12 njauk dom urang jaka Công an tỉnh Tây Ninh cap khik dah page ni. Dalam nan, Lâm Viết Phú Lộc daok njauk guk luac rai ka duas pametai manuac;Bùi Nguyễn Thiên Thuận njauk guk 27 thun ka duas "pachot mek drap ar, pametai manuac" meng thun 2008.Dua urang ni njauk cap mek tuk daok nduac dauk di pambah mbang gah likuk di ceik Bà Đen – labik jaik taphia xã Phan,huyện Dương Minh Châu saong phường Ninh Thạnh, ban sit Tây Ninh, tỉnh Tây Ninh.

UBND phường Tân Định (ban sit Bến Cát, Bình Dương) brei thau, jaik 1 adit ini di dalam phường hu mboh sa tapon kra 3 drei (2 drei praong, 1 drei sit). Tuk mboh anek saih pan pandap mbang, tapon kra chat trun mek. Hu 7 adei anek saih pakat 1 saong 1 anek saih mẫu giáo njauk kra ngak brei saluah tangin. Dom adei hu amaik ame ba nao klauk jru pacang caga ruak. Kayua tapon kra oh daok sa labik, tuk mboh tuk oh nan ye oh ka thau cambaih labik daok di tapon kra ini. UBND phường jeng hu harak payua tal Chi cục Kiểm lâm tỉnh Bình Dương ieu daong jalan langyah, saong khan brei mikva dalam phường thau piah caga,dom sang bac brei hu jalan khik siam mekre salamat ka anek saih.

Hadei di tuk ba tabiak bruk klauk jru vắc-xin pacang caga Covid-19 di gah Pfizer/BioNTech, tui kuhria dalam harei paguk, Ủy ban vắc-xin di jabat khik ramik pandap saong jru tavao Mỹ meda ginum biai piah ba tabiak bruk lac njauk brei pandar samar chip vắc-xin ka 2 pacang caga Covid-19 di gah Moderna halei oh. Ni hu maong lac bruk kham marat jhul samar drak di dom urang jakar Mỹ dalam bruk mesuk pacang jit praong Covid-19  daok rahtabiak trak damak di negar ni.Vắc-xin Moderna hu taong yaom lac hu siam lagaih pacang caga Covid-19 tagok tal 94%. Dom menuac umo mangaok 65 thun tagok, tanut siam lagaih di vắc-xin lac 86%.

Jabat khik ramik y tế Braxin (Anvisa) bahrau hu panuac lac Trung Quốc oh cambaih laih dalam bruk brei adat pandar chip vắcxin caga Covid-19, mboh lac urak ini oh ka hu panuac khan halei ka dom tanut bo Trung Quốc pambak tame piah ba tabiak bruk ngak di drei. Jeng tui jabat khik ramik y tế Braxin, taneh ia ini, lac taneh ia ba akaok nao dahlau dalam bruk taong yaom vắc-xin CoronaVac di hãng jru Trung Quốc Sinovac Biotech.Vắc-xin caga Covid-19 CoronaVac daok dalam tukvak ngak iek mbang 3 di Braxin,dom siam lagaih di vắc-xin hu khan brei thau di harei 23/12.

Ấn Độ bahrau peih bruk padang ngak mblang bien năng lượng ngak pasiam veik praong abih kuhria meng dahlau mai,hu prein khang abih tih lac 30.000 megawatt. Danak dak hu padang ngak  praong 72.600 héc-ta, hu gam dom blah pin ia harei, pandap khik piah năng lượng ia harei …Thủ tướng Ấn Độ Narendra Modi brei thau danak dak mblang bien năng lượng ngak pasiam lac sa jalan tagok bahrau di Ấn Độ piah ngak tabiak hu 175.000 megawatt năng lượng tái tạo di thun 2022 saong 450.000 megawatt dalam thun 2030./.

Urang lang: Thu Thảo - Mousaphuong -16/12 - 19:00