Di mô hình pala bimao pon dalam sang di saai Ngô Minh Tấn di xã Hòa Thành, ngan saong 15 m2, hadei di jaik 20 harei saai paik hu labaih 10kg bimao sa harei. Meng sang bimao ini, hadei di labaih 3 bilan pala hu daong ka saai hu jien mek tame saong salih barau rai diuk. Saai Ngô  Minh Tấn khan lac:

 “Gah lingiu drei hu pandar jru, daok dalam sang ye hu pacang me-om nan ye oh hu côn trùng palai pajoa nan ye oh pandar jru. Bimao langiu pablei oh glaong yaom yau bimao ini”.

Tui ralo urang pala bimao, siam lagaih di bruk pala bimao dalam sang lac oh cang hu taneh ralo, abih takik pon ủ, jien buh tame biar, takik pren iek glang…. Abih di nyu nan lac, kayua pala bimao dalam sang nan ye takik hu halak saong takik jit ruak. Bimao hadei di tuk paik hu sambo patih, lamin nan ye biak hu ralo urang takre. Taphia di nan, bruk ủ pon ngak bimao jeng mbuan, pon thu hu tram saong cu tapung, hadei di nan hu caik jeng khối hu papaok dalam kadung nilon. Hadei di jaik 10 harei brei meo pajaih tame saong caik dalam sang ngan saong nhiệt độ ẩm meng 80 tal 90%, nhiệt độ meng 35 tal 40 độ C.

Jeng lac sa sang bimao tuk camereip, tal urak ini ong Tống Duy Thông, Xã Hòa Thành patagok hu 4 sang, ngan saong sản lượng yaok tấn bimao yaok thun, jien mek tame glaong. Salih barau meng jalan ngak klak, ong Thông pambuak pon saong kapah piah ủ bimao. Ngan saong jalan ngak ini, gam patak pataom pon gam brei năng suất glaong jang. Ong Tống Duy Thông lac:

 “Meng sa sang dahlak patagok hu 4 sang ye. Nyu biak lagaih hong bruk di mikva urang nông bhum taneran kraong Cửu Long, abih di nyu nan lac huyện Lai Vung labik hu pon biak ralo. Ka dua tra lac patrun hu pren ngak kayua bruk ini oh cang ralo urang ngak”.

Urak ini dalam xã Hòa Thành hu jaik 20 sang bimao hu patagok. Dalam nan xã jeng padang hu tổ pambuak bruk. Langiu siam lagaih di mô hình ini, ye phun jien buh tame tuk camereip piah ngak sang pala bimao jeng ngak ka ralo baoh sang gaok kan kandah.

Bruk pablei bimao pon urak ini biak tani tanat. Eng bimao pon hu pala dalam sang ye yaom glaong jang meng 10 tal 15 ribau đồng sa kg duk saong pala gah langiu. Ong Huỳnh Văn Tồn – phaok akaok duk ngak nông saong patagok palei pala huyện Lai Vung – Đồng Tháp brei thau:

 “Dalam tukvak tapa tui bruk khik iek karja ye kol dahlak jeng hu daong gah kỹ thuật, peih nyaom meyai… tham mưu ủy ban daong phun jien, peih bruk prang iek. Urak ini kol dahlak daok peih tal pato bruk ngak luac chu kì, piah mikva ngak bimao hu siam mekre”.

Bruk pala bimao pon dalam sang hu iek lac bruk ngak nông siam lagaih, phun jien takik di ralo urang nông urak ini. Lingiu di nan, bruk pala bimao dalam sang jeng lac sa jalan ngak lagaih dalam tuk biến đổi khí hậu, jit ruak tagok khang. Bruk ngak ini hu rik daong patagok kein laba, patrun pren ngak saong pandar phụ phẩm dalam ngak nông kayua yau nan ye jalan pala bimao ini tui kuhria meda hu patagok khang dalam tukvak tal./.