Huyện Thuận Nam hu taneh ngak nong praong abih tih labaih 15.200 ha, min bruk pala drak pak ini tuk halei jeng gaok kan kandah kayua pandiak bhang, oh ginup ia pruh. Meng bruk yau nan, huyện hu ba tabiak rilo jalan ngak piah pasiam dom cuang kandah yau ye patabiak Sarak 03-NQ/HU, harei 26-7-2016 di mBan Thường vụ Huyện ủy ka patagok bruk pan akaok ba jalan peih ngak bruk salih janih phun pala ka nyu lagaih haong lingik tasik thu lagu dalam huyện meng thun 2016 tal thun 2020, tacei pato peih ngak hu kein laba. Dalam nan, pataom tame cakrok patagok dom janih phun mbang baoh hu yaom kinh tế gaong, hu urang ngak nong njauk hatai pachreih tui.

Nhị Hà lac xã nao dahlau dalam bruk ba taneh ngak padai takik kein laba tapa pala phun mbang baoh, ngan saong taneh praong abih tih labaih 24 ha. Tapa pala ngak, brei mboh kein lagaih biak praong di bruk ngak bahrau, ba jien tame tani tanat ka bhap bini. Sa-ai Đỗ Thanh Toàn, daok di palei 2, brei thau: Urak ini sang sa-ai daok pala 4 ha panat Thái Lan saong panat ralo kanyik, tapa mbang paik baoh camereip brei năng suất tani tanat. Tui sa-ai Toàn, panat lac phun pala lagaih haong langik pandiak, takik pren glang iek, yaom kinh tế glaong, pala 1 ha yaok thun laba hu 300 triệu đồng.

Ong Lê Quyết Thắng, Phó Chủ tịch UBND xã lac: Bruk pala phun mbang baoh oh lac di xã Nhị Hà saoh, bo tukvak jaik ini daok hu peih praong di dom xã Phước Dinh, Phước Minh, Phước Hà. Hu thau, xã Phước Hà hu 16 sang bharau pala iek hu jak jeng siam mekre 5,3 ha kruac bung kanduh hijao, panat.

Ong Trần Quốc Hoàn, urang pan akaok jabat ngak nong saong patagok palei pala huyện Thuận Nam, brei thau: Bruk salih janih phun pala dalam tukvak tapa hu dom siam mekre mboh di anak meta, taneh pala phun mbang baoh dak harei dak peih praong. Tal harei ini, dalam huyện hu jaik 60 ha phun mbang baoh, ngan saong rilo janih pajaih hu chất lượng yau ye: Thanh long, kruac bung kanduh hijao, kandiuk…

Tui jalan patagok phun pala hu yaom kinh tế glaong tal thun 2020, huyện Thuận Nam, tỉnh Ninh Thuận daok pasang iek, padang bhum pala praong; peih tal pato pasram ilamu kỹ thuật pala saong glang iek; gam saong bruk pablak dom phun jien ưu đãi daong ka urang ngak nong pambak praong dom mô hình pala phun phun mbang baoh di angaok taneh praong.