Dahlau di ini labaih 1 bilan, baoh sang amuk Nguyễn Thanh Thùy daok di xã Hàm Liêm, huyện Hàm Thuận Bắc haduh hatai brei tak klak yaok pluh tấn baoh thanh long kayua oh pablei hu. Hadei di nan, sang muk Thùy daok pala veik saong caong lac yaom thanh long tagok glaong piah hu jien bayar sre bo sang muk buh tame pala mbang dahlau.

Maong tame bein thanh long truac gom brei tabiak baoh karei bilan jaik tal tuk paik baoh, muk Thùy duh hatai lac: “Yaom thanh long urak ini tagok jaik 20.000 đồng sa kilo, min oh thau dom harei anak tal nyu yau habar. Pala thanh long tui jalan klak yau khol dahlak, yaom kaom pambak tame darak pasar, laba atau khat oh thau dahlau hagait.”

 Dalam tuk nan, ong Nguyễn An Ninh daok di xã Hàm Mỹ, huyện Hàm Thuận, Nam, tỉnh Bình Thuận jeng mbang ndih oh bingi tuk yaom thanh tagok glaong min bein thanh long di ong oh ka tal tuk paik baoh. Dom  bein thanh long karei di Binh Thuan jeng khan lac, bruk pala tui jalan klak ye “ban thei thei ngak”, takik caik hatai tal bruk hacih sa-at pandap mbang, dok ngak ka bruk pala thanh long ini dak harei oh tani tanat.

 Tui ong Phạm Hữu Thủ, Chánh Văn phòng Sở NN-PTNT tỉnh Bình Thuận, urak ini labaih 80% baoh thanh long di tỉnh ini ralo meng pablei tapa Trung Quốc tui jalan tiểu ngạch. Urak ini, darak pasar negar ini oh ka caik hatai rilo ka dom quy chuẩn pandap hacih saat yau nan ye rilo mikva daok pala tui jalan klak, takik sangka tal bruk pala thanh long hacih sa-at bo tok ngak brei ka baoh praong, siam piah mbuan pablei.

Langyah ka bruk ini, Hiệp hội Thanh long Bình Thuận mboh lac, meng dahlau mai, bruk thanh long laik yaom jeng lac baoh thanh long pala tui jalan klak, daok thanh long hacih saat tui tanut chuan VietGAP, GlobalGAP tuk halei jeng pablei hu yaom glaong. Meng mbang trun laik yaom biak khang birau blaoh, dalam tuk rilo bein thanh long  pala tui jalan klak di Binh Thuan oh pablei hu, ye dom cong ty, doanh nghiep,  HTX pambuak bruk saong urang nong pala tui jaln hacih sa-at pablei hu yaom glaong, oh ginup baoh thanh long piah pablei.

      Ong Võ Huy Hoàng, Akok Công ty njam patam baoh karaoh Bình Thuận khan lac: “ meng hu bruk pambuak gauk haong dom baoh sang urang nong dalam tỉnh pala thanh long tui jalan hacih sa-at, tukvak tapa khol dahlak blei hu baoh thanh long tani tanat ngan saong yaom glaong ka mikva, oh lac rai diuk mikva hu tagok  bo thanh long Bình Thuận jeng hu mbaok di dom darak pasar praong kan tame. Tui ong Hoàng, urak ini yaok thun công ty pablei hu 9.000 tấn baoh thanh long hacih saat di 7 darak pasar praong kan tame hu.

 Piah ka thanh long pala tui jalan klak hu tani tanat, bruk anak meta urak ni lac njauk hu jalan cak rok patagok khang kajap, pambuak bruk pala thâm canh, brei rilo baoh praong, siam haong bruk hacih sa-at piah pablei hu dalm saong langiu negar. Gam tui nan, kham merat jak ba urang pala thanh long tame dom kapul pambuak gauk pala, atau HTX thanh long tui chuỗi saong iek ini lac bruk praong daong pablei hu baoh thanh long tani tanat. Langiu di nan, njauk kakei mikva pala tui bilan atah di gauk, plaik njaik bruk labaih baoh thanh long; abih di nyu nan lac bruk pablei tabiak negar langiu tui jalan chính ngạch njauk sangka iek praong./.