Dalam dom thun jiak di ni, urang Chăm di Ninh Thuận song Bình Thuận tame ngak bruk ka dom Công ty negar langiu daok di VN dak harei dak rilo., dalam nan rilo di abih lac tame ngak di công ty Chang Shin Việt Nam. Urang dok pataom gauk di dom sang trọ palei 1, palei 2 saong palei 5 xã Thạnh Phú, huyện Vĩnh Cửu, tỉnh Đồng Nai. Tết nguyên đán anek sak kara 2016 ni, rilo sang cong nhan Chăm oh nao palei mbang tết bo mbang tết di sang trọ di drei. Ngan song dom janih pandap mbang bình dị dân giả gam song dom pok pandap meng gah công đoàn cơ sở hu ba bui sambai ka dom sang cong nhan chăm atah palei.

Labik sang trọ dok dalam hẻm di palei 5 xã  Thạnh Phú, labik hu jiak 20 boh sang urang Chăm daok song ngak bruk di Công ty Chang Shin Việt Nam. Duik pasang saai Báo Công Tin song saai Thập Thị Kim Luyến brei thau: dahlau deih saai ngak bruk ka sang mac saradang Phan Rang tỉnh Ninh Thuận, duik saai daok di sang jhik khan ao, min kayua jien duah hu oh ginup cai, yau nan ye duik pasang saai khang hatai klaak palei piah tame đồng Nai duah bruk ngak mbang.  Hu ayhut tacei, duik pasang saai  mai ni ngak bruk ka Công ty Chang Shin Việt Nam. Saai ngak gah điện, duik saai ngak gah jhik. Urak ni jien bilan duah hu labaih 10 triệu đồng di 2 haduik pasang, patak pataom pandar cai jeng ginup ka 2 duik pasang song 3 urang anek. Yaok thun duik pasang saai tok mai palei dalam tuk rija, roya di urang Chăm. Tết nguyên đán anek sak kara 2016 ni sang saai dok veik Đồng Nai raok tết.

Jiak sang saai Tín lac labik sang trọ di jiak 20 boh sang cong nhan Chăm. Dom uranaih dok jo main langiu mblang bein sang trọ, dok dom urang amaik  pataom gauk 5 – 6 urang dok main bài. Ala dhar phun đào, gah lukuh sang trọ, dom urang ame dok bui sambai menyum alak. Tok hu caluk ia bai tarong, dom boh paya jeih rilaow song jam  boh kayau, yau nan bo dom cavan alak hu ye meng urang ni tal urang deih song dom boh panuac tadhau yhut akaok thun bahrau ndung bak hatung hatai di urang atah palei. Song oh meda kurang hu mbaik capi. Saai Tạ Văn Hùng, urang Chăm dok di Bình Thuận dok ngak bruk ka công ty Chang Shin Việt Nam di Đồng Nai jiak 10 thun ni mai brei thau, rai duik urang ngak yaom lac kan kandah min bui  sambai. Oh cong khin hagait, meda likau ka drei pren yava khang kajap piah ngak bruk.

Tui saai Đặng Tuấn Tú – Chủ tịch Công đoàn Công ty Chang Shin Việt Nam di Đồng Nai, urak ni công ty hu labaih 25.300 urang ngak, dalam nan urang ngak dalam t ỉnh hu jiak 72%, dok veik lac urang ngak langiu tỉnh. Piah urang ngak raok tết trei si, bui sambai, gah công đoàn di công ty jeng hu caga pandap Tet ka urang ngak ngan song rilo bruk ngak hu makna: Gah Mban giám đốc song gah công đoàn hu brei pandap ka adei saai urang ngak dalam tuk tết, yaok pok pandp  yaom 5 rituh ribau đồng. Gam saong nan, lac thưởng tết ka urang ngak. Hu dom adei saai dok atah jeng hu nao palei mbang tết, dok adei saai dok veik ye công đoàn hu peih melam giao thừa ka urang ngak song peih bruk nao rivang dom labik sang trọ piah pachreih ba jang yau klah rabha dom drut droi tuk atah palei 

Bruk uan raok tết, sambai xuân di labik sang trọ di sang saai Báo Công Tin song saai  Tạ Văn Hùng jeng lac bruk di rilo rilo urang ngak atah palei. Thei jeng thau harei tết hu daok jaik amaik ame, adei sa-ai, hu taom gaok gauk gar nan lac biak haniem phol. Min piah hu mai sang, urang njauk kham merat ngak bruk, patak pataom jien padai rilo jang.

Yam tapa sa thun bahrau, yaok urang ngak lac urang Chăm di labik ni cong hu haniem phol, hu siam mekre dalam bruk ngak. Thei jeng cong harei hadei hu raidiuk siam mekre di bhum taneh bahrau ni. Saai Thân Thị Thanh Nghị, duik di saai  Tạ Văn Hùng khan lac “ palei saai di Bình thuận,  lac ngak nong, haduik pasang saai nao ngak mbang pah bo daok kurang anak kurang likuk, ndom hagait tal bruk brei ka anek nao bac. Rai di drei glaih glar rambah rambeip paje, urak ini kham merat kuhria ka anek hu bac da-a, hu bruk ngak tani tanat jang.

Yaom lac dok hu  rilo kan kandah, mik dom boh sang cong nhan Cham labik ni jeng bui sambai anit ranam ka raidiuk. Urang jia tame sa harei hadei siam mekre jang, ginup meda jang./.