Dom harei akaok thun 1980, dom chuyên gia Liên Xô dahlau daih (rilo meng lac urang Nga saong urang Azerbaijan) akaok meti mai tal ban sit Vũng Tàu, tỉnh Bà Rịa - Vũng Tàu ngak bruk dalam Xí nghiệp Liên doanh Vietsovpetro. Hu tuk, urang Nga di Vũng Tàu tagok tal 500 sang gam saong 1.200 menuac daok dalam "Khu 5 tal" brei ka urang Nga. Yaom lac oh hu sa ilamu, sa sap ndom panuac puac, min dom rai urang Nga daok di Vũng Tàu jeng iek labik ini lac palei negar ka 2 di drei. Kadha vak di Lưu Sơn, urang vak di rayo sap ndom VN daok di ban raya Hồ Chí Minh brei thau ka raidiuk di urang Ngan daok pak ini:

Sa-ai Seigey Evgenevich Krupenko, Chủ tịch Công đoàn gah Nga brei thau, biak patuah dahlau daih ame di sa-ai  lac ong Krupenko Evrenny Vladi Mirovich, lac Phó Chánh kỹ sư ngak bruk di Vietsovpetro saong sa-ai hu 2 mbang tui ame mai tal taneh ia Việt Nam. Hadei di tuk bac tamat 2 sang bac đại học gah luật saong dầu khí di Nga. Bilan 11/2009 sa-ai mai veik Việt Nam ngak bruk di Liên doanh Việt- Nga. Sa-ai lac, sa-ai pilih ruah ban sit Vũng Tàu ngak labik daok kayua ini lac bhum taneh siam mekre, langik tasik oh kan kandah jang dut saong puk palei di drei. 

Hu ngak tapa rilo bruk dalam Vietsovpetro yau: kỹ sư khai thác, ngak gah công đoàn, ngak gah tổ chức saong urak ini, lac Phó phòng Tổ chức nhân sự Vietsovpetro, sa-ai Krupenko tuk halei jeng ngak siam bruk di drei dalam langyah dom chế độ, chính sách ka urang ngak lac urang Nga di Vietsovpetro. Ngan saong sa-ai, urang Việt Nam di ban sit Vũng Tàu biak siam. Yaom lac sap ndom panuac puac karei di gauk min abih bruk dalam rai diuk saong dalam bruk ngak jeng rah tabiak dalam siam mekre kayua urang Việt biak siam hatung hatai saong tuk halei jeng daong ka urang Nga.

Sa-ai Krupenko khan lac, dom harei ini di Việt Nam dom sa-ai hu peih bruk pahadar Cách mạng Tháng Mười, hu diuk veik haong tukvak di harei roya praong. Kak kajap bruk haong dom ayut Việt Nam nan ye haniem phul lô. Vũng Tàu lac palei negar ka 2 di dom urang Nga daok ngak bruk angaok dom giếng dầu lingiu tasik... Anh Krupenko lac: “Dahlak mboh taneh ia VN biak mekre, dahlak biak takre langik tasik di Việt Nam. Dahlak mboh gah dầu khí di Việt Nam hu pambak khang tal bruk cakrok di taneh ia. Vũng Tàu lac ban sit kiểu mẫu di Việt Nam, pak ini hu oh lac hu menyek bo daok patagok hu du lịch. Gah dầu khí di Vũng Tàu pachreih hu rilo urang ngak pak ini, pachreih gam dom chuyên gia ilamu glaong di  Nga dalam gah dầu khí”.

Dalam Khu 5 tal brei ka urang Nga, daok hu 5 gu diuk pasang Nga - Việt saong Việt - Nga, urang taom gaok gauk, mboh anit ranam gauk bloh jeng diuk, jeng pasang, kak kajap raidiuk 2 anek menuac di 2 bangsa atah gauk min biak jaik gauk. Nan lac anai Marchenko Evgenia, ndih tapui thun 1986 di Moscow, lac urang ngak dalam Phòng phiên dịch Liên doanh Vietsovpetro. Thun 2007 tuk daok lac sinh viên Sang bac Đại học tổng hợp Moskva (Lomonosov) chuyên ngành kinh tế - xã hội dom negar Đông Nam Á, sa-ai hu mai tal Việt Nam dalam sa danak dak taom gaok sinh viên dunya. Hadei di mbang mai ini, anai Evgenia sahneng lac meda mai veik taneh ia Việt Nam meyah hu bruk. 

        Thun 2009 tuk bac tamat đại học di Moscow, anai tapa Việt Nam bac gah Việt Nam học di Đại học Khoa học, xã hội saong nhân văn Hà Nội. Tukvak ini, sa-ai oh padeih duah thau ka palei negar, anek menuac jeng ye ilamu bhum palei di taneh ia hình chữ S piah pabak ilamu ka bruk bac megru. Anai Evgenia khan lac, dalam tukvak bac Đại học di Việt Nam, sa-ai hu nộp đơn tame Liên doanh Việt – Nga saong hu taduan tame ngak bruk di Phòng phiên dịch. Tapa tukvak ngak bruk di liên doanh Việt – Nga, Evgenia hu taom gaok rilo urang Việt, dalam nan hu kỹ sư Châu Nhật Bằng, ndih tapui thun 1985, palei daok di Bến Tre, bloh anai kumei urang Nga saong urang likei dam asal miền Tây mboh anit ranam gauk. Ndam likhah di 2 urang hu rah tabiak di Bến Tre hadei di 1 thun duah thau gauk. Yau nan Việt Nam hu jeng palei negar ka 2 di Evgenia saong urang Việt Nam dalam meta maong di sa-ai biak siam, biak rap ar tuai damuai. Anai Evgenia lac:  “Urang Việt Nam biak rap ar tuai, dom bangsa karei dahlak hu taom gaok oh mboh bangsa halei rap ar tuai yau nan. Urang Việt Nam biak hu trách nhiệm, biak iek praong talei rohim, ngak bruk biak tari taring, kan duah hu yau nan”.

          Oh lac anai Evgenia, sa-ai Krupenko, bo daok hu biak rilo urang Nga daok di Vũng Tàu jeng mboh bruk anit ranam di urang Việt brei ka drei, anit ranam drei yau adei sa-ai dalam sang. Yaom lac daok atah palei negar, min urang halei jeng mboh haniem phul, kayua lac daok di taneh ia atah bayah, di kreh ban sit tasik menyek ini, hu sa palei Nga bak hatai anit ranam saong kak kajap talei rohim Việt./.