Bein phun amariak kalu 

Urak ini, mblang taneh pala pa-aik blait di tỉnh Bình Phước jaik 175.000 ha, meblah labaih 50% taong abih mblang taneh pa-aok blait dalam negar. Phun pa-aok blait nan lac sa dalam dom phun pala rilo, ba mai kein laba glaong, hu pala biak rilo di dom huyện dalam tỉnh, hu jeng phun patruh eik patrun kathaot, ngak meda ka urang nong. Mai meng bruk bal thei thei pala, nan ye phun pa-aok blait cak rok patagok oh tani tanat, oh hu quy hoạch, đầu tư siam mekre.

Thun 2019, yaom asal pa-aok blait that blei tame di bein hu yaom 28.500-30.000 đồng/kg, trun jaik 50% dut haong tuk vak ini thun 2018. Sản lượng pa-aok blait di tỉnh Bình Phước mùa vụ thun 2018 mek hu jaik 148.000 tấn, tok pabak hatai caong khin jaik 25% pa-aok blait tamo ka dom doanh nghiệp saong labik ngak tabiak sit sot dalam tỉnh.

Kan kandah dalam bruk cakrok patagok ngành pa-aok blait di tỉnh Bình Phước nan lac urang nong pala pa-aok blait oh ka dak padang hu chuỗi liên kết giá trị. Mboh rilo bhap bani daok hu akaok saneng pala pa-aok blait piah khik taneh, kayua nan ye bruk mong iek bein pa-aok blait oh ka hu caik hatai sangka, bruk đầu tư jeng biak takik, pala blaoh caik nan piah ka phun nyu cak rok patagok. Langiu di nan, langik tasik, halak halin jeng ngak kanjah jhak tal năng suất phun pa-aok blait, ngak ka yaom kaom tuk trun tuk tagok. Ong Bùi Văn Thắng, urang daok di bal sit  Tân Phú, huyện Đồng Phú lac: “Phun pa-aok blait mboh rilo lac pambak tame langik tasik biak rilo tuk tabiak bingu, ndam baoh. Năng suất pa-aok blait meyah thun njuak mùa ye sa phun meda paik hu jaik yaok tạ, daok bhian di nyu mek hu jaik 50 kg”.

   Ngan haong doanh nghiệp gah pa-aok blait Bình Phước, kan kandah dalam bruk ngak tabiak pablei salih nan lac daok sit sot, phun jien takik, manuac urang ngak gam yếu gilac gam kurang. Bruk ini ba tal chất lượng pandap panda pa-aok blait hu tapa chế biến oh ka rilo, oh ginup pren khang piah hu mbaok angaok darak pasar kan tính. Amuk Nguyễn Thị Mỵ, akaok Hội đồng quản trị Công ty cổ phần Hà Mỵ, doanh nghiệp gah pa-aok blait dang takai angaok tỉnh Bình Phước caong khin: jabat khik iek Karja njuak hu jalan ngak, sarak daong ka doanh nghiệp taom gaok phun jien ưu đãi, peih prong darak pasar, dak padang labik pala ka nyu tani tanat: “Dahlak caong urang pal akaok sangka, mong iek tal doanh nghiệp jang. Mbluak di abih di Bình Phước nan lac ngak yau habar brei ka bhap bani mong mboh hu yaom glaong di pandap panda hu chỉ dẫn địa lý”.

Meda hu mboh, urang nong pala pa-aok blait saong doanh nghiệp tỉnh Bình Phước thei jeng hu kan kandah karei di gauk. Langyah hu kadha pambuak pagam di dua chủ thể ini nan lac gai peih piah ka gah pa-aok blait Bình Phước cak rok patagok khang kajap. Tui ong Nguyễn Anh Hoàng, Akaok Sở Công Thương tỉnh Bình Phước: “Kan kandah di abih nan lac bruk njauk hatai, bruk hu mbaok tame, hatai saneng di dom doanh nghiệp. Bruk ngak di jabat khik iek karja nan lac daong ba yaom lac caik angan Bình Phước min bản chất ini lac pandap panda pablei salih di dom doanh nghiệp”.

Tui gah Sở Ngak nong saong Patagok palei pala tỉnh Bình Phước, amuk Lê Thị Ánh Tuyết, Phaok Akaok sở khang panuac lac tuk halei jeng palaghaih siam di abih ka gah pa-aok blait cak rok patagok tui gah pataom tane, panduan salih quy mô meng bruk ngak sit sot tapa gah pambuak pagam urang nong  – doanh nghiệp ngan haong quy mô prong piah dak padang mblang taneh pala pa-aok blait hacih, mek hu chất lượng siam, năng suất glaong: Khaol dahlak patagok bruk panduan jao ilamukhoa học kỹ thuật tapa dom tal pathram, nyaom biai akaok ar piah jak ba bhap bani salih bahrau akaok saneng, mong iek bein pa-aok blait di drei paih patagok năng suất” .

      Piah ka gah pa-aok blait cak rok patagok khang kajap, biak caong khin hu bruk sangka di dom jabat chức năng tỉnh Bình Phước piah palaghaih, daong ka urang nong saong doanh nghiệp. Yau nan min, yaok urang nong saong doanh nghiệp gah ini njuak brei hu salih bahrau akaok saneng, ba tabiak hu jalan nao atah saong hu danak dak pambuak gauk, daong ba gauk, piah jalan ngak puac abih nan lac dak padang sa angan je khang, ginup pren khang meriak gauk angaok darak pasar./.

Urang lang: Jasi - 31/10