Jabat cảnh sát di mintri cong an hu mbaok tame pasang iek duah thau 

Pambuak tal bruk Công ty cổ phần công nghệ Việt Á ngak suan biak trak adat ka bruk ngak tabiak, đấu thầu kit dut iek Covid-19 piah mek kein laba ka drei, Thủ tướng Rajaei Phạm Minh Chính ieu Mentri Công an dang tabiak, pambuak bruk saong dom jabat, dom tỉnh ban pambuak tal jhul pasamar bruk pasang iek, duah thau, peih praong bruk pasang iek, mek veik drap ar njauk meblah mek saong khat lahik, samar ba dom urang nan tabiak langyah njauk duas, kaoh catang tui hukum karja. Mentri Y te  saong dom mentri, dom gah saong dom tỉnh, ban tacei pato dom jabat, dom gah chức năng pambuak tal, samar pasang iek, hu jalan ramik pasiam bruk đấu thầu, blei saong pandar jru, sinh phẩm, pandap, mac jam raik y te, paglong siam lagaih bruk pacang caga jit Covid-19 tui njauk bruk ba tabiak di karja.

Kayua urang njom COVID-19 dok tagok dalam dom harei tapa, Mintri  Y tế  ieu UBND dom tỉnh, ban  patui bruk peih ngak dom jalan ngak  piah patrun metai lalik kayua  COVID-19. Dalam nan, dom tỉnh ban brei pasang iek prein ngak di dom labik taduan urang tame taong ruak  COVID-19; paglong bruk iek ruak ak dom tuyến; pabak song khik ramik ginup jru tavoa  , pandap panda, khan aow pacang caga ka urang; khik caga  oxy meng cơ sở tal sang iek ruak dom tal 1, 2, 3. Parabha urang mbuan si  urang njom SARS-CoV-2 song pamong tal bruk langyah, brei dok karei, iek ruak. Peih ngak tong abih "Bruk khik caga urang mbuan si njauk ruak" piah klauk ginup vaccine. Jak ba hu mbaok di bhap bini song dom urang halan hatain, "gru jru nao gam", kapul nyaom, menuac urang ngak pahla, urang ruak  COVID-19 hu siam veik, y tế tư nhân… hu mbaok tame tacei pato jalan iek ruak, taong ruak, khik iek urang njom di sang .

Tỉnh Ninh Thuận hu tacei pato bruk brei daok karei ngan saong dom urang F1, F2 saong urang taong dhit ruak Covid-19. Dalam nan, urang F1, meyah hu klauk ginup 2 mbang jru vaccine pacang Covid-19, atau taong dhit ruak  dalam 6 bilan ye brei daok pataom sa labik atau daok karei di sang, labik daok 7 harei saong eng drei tui iek prein yawa dalam 7 harei hadei di nan. Dalam tuk daok karei brei dut iek ruak  SARS-CoV-2 dua mbang. Ngan saong F2, brei daok di sang, labik daok dalam tuk cang thau cambaih ka bruk dut iek  SARS-CoV-2 di  F1. Meyah tapa dut iek mbang 1 di urang F1 mboh dương tính saong SARS-CoV-2 ye urang F2 jeng F1 brei daok karei dreih urang F1 tui bruk ba tabiak. Bruk birau ba tabiak nan jeng hu tacei lac, taong abih dom urang F1 dalam tuk daok karei mboh patuh, pandiak, pandik tarakong, mbang huak oh daok thau bingi…ye brei ka jabat y te thau piah dut iak ruak njauk tui bruk ba tabiak.

Pambuak tal bruk jaleih tatua  Cái Đôi Vàm tuk dok padang ngak di  huyện Phú Tân, tỉnh Cà Mau dalam harei  21.12 meng bloh, Chủ tịch UBND tỉnh hu panuac ieu gah padang ngak brei padeih ngak , jang yau pandar  Sở jalan mbak pajeng ba tỉnh Cà Mau padang Kapul pasang iek , peih bruk pasang iek duah thau makna bruk jaleih nan. Meyah mboh lac njauk ngak, Kapul duah thau hu quyền pasang iek, palih ruah kapul taong yaom pafdang ngak ka nyu lagaih peih bruk  taong yaom piah duh ka bruk duah thau makna di nyu.

Tui Pasak kuhria mboh dahlau bruk langik tasik pakat negar, meng ini tal puac adit chỉ số tia cực tím (UV) praong abih di dom tỉnh, ban di Nam Bộ jeng daok di tanut glong tal biak glong. Tia cực tím biak glong meda ngak pandung kalik, handok takai atau abih preih meyah dom urang tabiak langiu langik pandiak atau pasram rup suai lavik. Piah caga bruk kanjiak jhak kayua tia cực tím saong mebuk pandiak, mikva ngak bruk langiu langik pandiak  njauk brei ngui cuh khan ao, me-om ndon tamo mot pacang pandiak…tuk halei jeng brei menyum ginup ia dalam rup. Mikva njauk brei caik hatai tal dom mbaok tanjak tabiak yau mbaok ia, cuah saong camin. Nyu meda tanjak pandiak ia harei, ngak brei pandiak mbang jeng yau ba tal ruak ung thư kalik.

Gah y tế dunya  (WHO) brei thau thun 2021 COVID-19 rah tabiak dom khat lahik prong, tuk hu labaih  3,3 triệu urang metai. Yaok adit jit  COVID-19 ngak ka labaih 50.000 urang di dunya metai. Anak bruk srau kadau di  biến thể bahrau song dom urang metai dak harei dak glong, WHO hu panuac kakei dom taneh ia brei pasang iek veik bruk peih ngak dom bruk pataom rilo menuac dalam dom lễ  anak tal, jiak di abih lac Noel song uan thun bahrau. Min, WHO ndom lac, thun  2022 meda lac thun kol drei abih jit prong  meng dom pandap pandap  bo dunya dok khik pal, dalam nan hu  vaccine.

Dalam thun 2021, hu 3.746 urang metai kayua mesruh gauk di Syria, trun jaik meteh dut saong thun dahlau. Ini lac thun manuac metai takik abih dalam luac 10 thun taong mesruh gauk di taneh Trung Đông ini. Urang metai trun takik yau brei mboh bruk mesruh metak gauk ladam trun dalam 2 thun mai ini. Meng tuk tamuh tabiak di thun 2011, mbiah tal ini bruk mesruh gauk di Syria ngak brei jaik meteh trieu urang metai saong ba tal bruk di cư kayua mesruh gauk khang abih kuhria  meng tuk hadei di kalin kan dunya mbang ka 2.

Hội đồng Bảo an Liên hợp quốc  brei tapa sarak piah dong palagaih ka bruk dong ngak pahla ka  Afghanistan. Sarak brei adat peih brei jien ka bruk daong ngak pahla, dom drap ar jien ndua atau dom gah kinh tế karei; pabak dom janih pandap panda song dịch vụ piah dong tapak atau khik ka dom bruk dong hu peih ngak njauk  tukvak ba tabiak . Tuk vak tapa, dom taneh ia di dunya  kham merat duah jalan pacang cakak bala eik lipa rah tabiak  di Afghanistan. Hadei di tuk gah Taliban mai pal karja veik meng kreih bilan  8 di taneh ia ni, Mỹ brei kreik dom drap ar  hu yaom  9,5 tỷ USD di gilang pariak  negar Afghanistan, ngak ka gah  kinh tế  dak khủng hoảng trak damak./.

Urang lang: Hanipha- Ái Nghiêm -23/12