Urang bangsa takik di Điện Biện duik rai jum pataom gauk 

Lac sa urang lin hu mbaok tame peih paha  Ðiện Biên, mong mboh rilo salih bahrau angaok bhum taneh sajarah, ong Bùi Văn Ninh (umo 90 thun), daok di phường Thanh Bình, ban Ðiện Biên Phủ khan lac: Chiến dịch Ðiện Biên Phủ tamat hadei di 56 harei melam, bol lin song bhap bini drei  khang hatai mesruh song mek hu jayah di harei 7/5/1954. Hadei di harei peih paha, taeng bruk rami ramik  mblang mesruh abih tal jiak 2 thun . Jalan Tuần Giáo - Ðiện Biên harei ni, atah labaih 80km , min oh thau hadom pren yava adei saai dam dara halan hatain mai meng dom tỉnh bhum taneran Bắc Bộ hu mbaok tame padang ngak, pambuak Ðiện Biên song ban ine  Hà Nội, rik dong prong tame bruk patagok kinh tế tui sarak “bhum ceik tui samu bhum  taneran” di  Ðảng, karja. Hadei di peih paha, Nông trường quốc doanh lac janih  kinh tế praong, dang akaok di bruk ngak tabiak pandap panda tui jalan xã hội chủ nghĩa. Hulin biak uan tabuan tuk bhum taneh pandik harao harei halei urak ni jeng ban prong hu patagok siam mekre, salih bahrau!

Piah hu Ðiện Biên siam mekre yau harei ni, gam song bruk sangka dong ba di  Trung ương lac bruk njauk hatai, jum pataom di urang jakar, urang lin song bhap bini  dom bangsa dalam tỉnh. 66 thun hadei di peih paha, Ðiện Biên mek hu rilo jak jeng  patagok  kinh tế - xã hội, rilo thun gam  khik hu bruk patagok kinh tế, tagok bruk ngak mbang dịch vụ, du lịch, pablei salih, dak padang; boh sang kan kathaot urak ni dok 30,67%.

Piah ba drei tame song patagok gam hong dom tỉnh bhum ceik gah brak, ngak jeng angan je labik rivang me-in, rilo thun tapa tỉnh hu khik bruk peih ngak  harei pataom bingu Ban di  bilan 3 yaok thun. Abih di nyu nan lac, thun  2014 Rajaei ba tabiak dự án Du lịch prong pakat  negar  Ðiện Biên Phủ - Pá Khoang piah patagok  du lịch pambuak haong sajarah labik Sở chỉ huy Chiến dịch Ðiện Biên Phủ di  Mường Phăng. Meng kein lagaih gah du lịch sajarah, ilamu, gah ngak  công “oh hu sauk” ni duah hu jiak  1.500 tỷ đồng tuk vak  2016 - 2020. Ðiện Biên harei ni hu jalan điện pakat negar truac hadah yaok palei, dom jalan bahrau peih nao tal dom bhum palei atah bayah; y tế hu tagok samu gauk;  pato pakai hu salih bahrau, paglong ; quốc phòng an ninh hu khik kajap.

Ðiện Biên dom harei bilan 4 bak prein khang 45 thun yasa taneh ia  (30/4/1975 - 30/4/2020), dom urang anek angaok bhum taneh  Ðiện Biên Phủ anh hùng dok kham merat pakacah gauk pamong tal harei pahadar 66 thun jayah  Ðiện Biên Phủ (7/5/1954 - 7/5/2020) dalam chreih chrai, bak hatai jia. Rah tui pasak  tỉnh lỵ lac  dom jalan hu angan lac:Tô Vĩnh Diện, Phan Ðình Giót, Thanh Bình, Tân Thanh, Him Lam...dom angan taneh, angan menuac di 1 saman mesruh metak urak ni jeng angan palei, angan jalan. Jalan roya Võ Nguyên Giáp - angan urang pan akaok chiến dịch dahlau deih nao nao tapa dom palei, dom jalan dalam ban Ðiện Biên Phủ sajarah.

Thun  2020 lac thun puac peih bruk patagok  kinh tế - xã hội tukvak  2016 - 2020, peih tabiak jalan ka tuk vak patagok patui di nan. Ðảng bộ, karja song bhap bini dom bangsa di Ðiện Biên kham merat abih drei, patagok bhum taneh sajarah gah Pai taneh ia./.

Urang lang: Hanipha- 7/5