Dom thun jaik di ini, pak ralo mblang bein raong dangko di Sơn La rah tabiak bruk dangko nao mek mật mai tal sruh ye bị yếu nao saong metai rilo. Tapol dangko meyah ndam gaok bein darang pruh jru khik caga phun pala njuan ye metai  1/4, 1/5 tapol, trak ye metai meteh tapol, gaok mai metai abih. Ini lac kadha daok ngak ka urang raong dangko pak Sơn La duh hatai. Kadha vak di Thanh Thủy, urang vak di rayo sap ndom VN daok di bhum Tây Bắc.

        Dom thun dahlau diah, bilan bingu darang hu urang raong dangko pak Sơn La cang mong di abih dalam thun. Kayua ini lac tukvak bo dangka meda brei ralo mật saong siam di abih, jeng lac kadha hu ngak jeng angan je di  aia dangko Sơn La. Yau nan min, dom thun jaik di ini kayua pandar rilo jru khik caga phun pala oh njauk quy trình di urang nong daok ngak ka urang raong dangko gaok ralo kan kandah. Bruk anek dangko nao mek mật, gam jru khik caga phun pala saong metai nao daok ngak ka urang raong dangka duh hatai.

  5 thun ini mai, tal bilan bingu darang ye sa-ai Nguyễn Thị Nhàn ba anek dangko meng tỉnh Yên Bái trun huyện Sông Mã, tỉnh Sơn La piah raong mek mật. Sa-ai Nhàn brei thau, dom thun dahlau aia dangko bingu darang pak ini mek hu biak ralo, ba mai kein laba glaong. Tok labaih 100 tapol dangko, yaok mbang quay mật, sa-ai Nhàn mek hu jaik 1 tấn aia dangko chất lượng glaong. Min bilan darang thun dahlau, mật mek hu biak takik, samu meteh dut haong dom thun dahlau. Nan oh ka ndom tal, 1/3 tapol dangko metai kayua njuk gaok bingu darang hu pruh jru khik caga phun pala tuk nao njuk mật.

Oh lac ta-eng sa-ai Nhàn bo biak ralo urang raong dangko pak Sơn La daok gaok kan kandah yau ini. Ralo urang njauk kareik dangko veik meyah thau sa po bein jaik taphia pruh jru khik caga phun pala ka phun darang. Yau nan min, kayua labik dangko nyu nao biak prong, urang raong oh khik iek hu nan ye bruk anek dangko njaom jru khik caga phun pala saong metai nan lac bruk oh plaih hu. Ong Nguyễn Văn Lành, xã Chiềng Mung, huyện Mai Sơn, tỉnh Sơn La brei thau: Anek dangko nao nyuk mật ye gam jru khik caga phun pala ngak ka anek dangko nyu metai, ngak ka urang raong khat lahik biak prong.

Raong dangko daok lac bruk ba jien mek tame grap tanat ka bhap bani, kayua yau nan ye dom pakat karja njauk samar tame bruk piah pambuak pagam urang pala saong urang raong dangko, ba tabiak jalan ngak khik caga lợi ích kinh tế ka dua gah saong pren yava di bhap bani, piah ka dangko Sơn La khik hu chất lượng pahe bingi, saong angan je di drei angaok darak pasar./.