Dom thun tapa, bruk tảo hôn hu mboh ralo pak huyện Cư M’gar (tỉnh Đắk Lắk), abih di nyu nan lac dalam bhum urang bangsa takik. Dom diuk pasang khin gauk tuk oh ka ginup umo brei tok gauk nyu ba mai ralo kan kandah dalam rai diuk.

Tuk anek bak sa bilan umo nan jeng lac tuk pasang H.T. (di xã Cư M’gar) klaak mai amaik ame daok. Makna ba tal bruk ini nan lac: oh njauk hatai haong gauk. Meng harei klaak pasang nao, meng sa urang kamei bhian ndom bhian klao, H.T. jeng sa urang takik ndom, jeng trầm cảm, oh khin taom gaok manuac urang, abih di nyu lac urang lạ. H.T thun ini bahrau 18 thun min tok pasang hu dua thun blaoh. Pasang H.T. jeng umo yau gauk, cai nai randap gauk tuk Y.D. mai ngak pak ka sang H.T. Hadei di sa tukvak duah thau saong ranam gauk, H.T. saong Y.D. hu jeng hadiuk jeng pasang; meng nan, bruk bac megru di H.T. njauk klaak meteh dhi yaom lac tok daok sa bilan tra nan lac bac tamat blaoh THCS. Urak ini, pasang klaak nao sang, rai diuk di amaik ranaih ngan haong anek kaman daok bhong kruak tok thau pambak tame amaik ame .

Atah di ini jaik sa thun, anek kumei kacua di sa-ai Y.K. (xã Ea Kuêh) nan lac H’Kh. Hu ngak lakhah haong Y.T. pak huyện Ea H’leo. Kadha njauk ndom, H’Kh. babrau tok 15 thun, H’Kh saong pasang nan lac gauk gar samuk, nan lac adei sa-ai haong gauk. Khin gauk tuk daok ranaih, dua diuk pasang ini bhian kandah gauk ngan haong dom bruk biak "ranaih". Hu mbang kayua tức pasang ralo, H’Kh mek jru hareik menyum piah metai min patuah hu samar ba nao sang iek ruak... Ndom tal makna ba tal bruk menyum jru hareik di drei, sa-ai Y.K. khan lac: “Tuk anek nyu tự tử drei oh daok pak sang bo tuk nan drei nao pasang iek ruak, tuk mai sang mahit mikva khan veik nyu pandik hatai kayua pasang di nyu peih nhạc prong…”.

Tui kuhria mboh di Pasak Dân số - KHHGĐ huyện Cư M’gar,  kuhria meng thun 2013 tal 2015, dalam huyện hu tal 298 mbang tảo hôn (kuhria yaok thun hu 99 yau tảo hôn), dalam nan hu ralo urang dalam talei pajaih. Bruk tảo hôn hu mboh di taong abih dom các xã, bal sit dalam huyện min pataom ralo pak dom xã yau: Ea H’Đing, Quảng Hiệp, Ea Tar, Cư M’gar, Cư Suê,  Ea Kuêh, Ea Đrơng… Ong Nguyễn Quang Dáp, Phaok akaok Ủy ban bhap bani xã Cư M’gar, brei thau: “Makna ba tal bruk tảo hôn dalam xã, langiu di lý do kurang kiến thức gah pren yava caih menek ba tal bruk metian langiu hatai caong khin, mek njauk khin gauk ye jeng daok pambak biak prong meng adat cambat tanarakun… khaol dahlak hu jhul pakhang bruk pathau khan, jak ba tapak baoh sang ka sarak dân số - KHHGĐ, hu baoh sang pang tui saong njauk ngak tui, yau nan min ralo baoh sang jeng daok brei ka anek kamuan khin kumei khin likei tuk oh ka ginup umo brei ngak lakhah. Tok kuhria ta-eng thun 2015 dalam xã hu mboh 20 trường hợp tảo hôn, mboh ralo pak dom pukpalei urang bangsa takik”.

Meda mboh lac, ralo dom gu diuk pasang tảo hôn thei thei jeng hu rai diuk biak kan kandah, tuk halei jeng ndam gam haong kathaot rambah. Thiệt thòi abih nan lac dom anek kaman caih tabiak oh hu ngak harak khai sinh bo jauk cang tal tuk amaik ame ginup umo ngak lakhah…./.