Mbang pandap mbang samar drah hu rilo menyek ngak ka rilo urang njauk ruak ung thư tung taha

Ung thư labik puac tung taha meda oh hu dom hagait brei thau lac ruak. Meyah hu dom hagait pambuak tal ruak ye meda hu dom bruk yau: salih karei kadha bhian randap nao ruak tian (aih aia, kan aih,, aih hu darah…); pandik tian; lavang lavaih saong glaih glar; trun kilo. Langiu di nan, tuk ung thư di vaktu lavik ye urang ruak meda rapeik mboh khối u di ala kalik tian, kalik kanjik katam, tian barah prong… Abih di nyu lac, di vaktu bahrau ruak, ung thư labik jhung tung taha mbuan meluk haong dom janih ruak karei yau srau kadau jalan tuang pruac, viêm tung taha, trĩ, táo bón... Tuk nao ruak tian mboh tabiak darah, njauk duah thau ka nyu cambaih nan lac kayua trĩ thường meyah darah that, daok ung thư tung taha bhian mboh hu darah gam haong labar.

TS-BS Ung Văn Việt, Phaok akaok khoa Ngoại tiêu hóa Sang iek ruak Đại học Y Dược TPHCM brei thau, dom chuyên gia y tế hu panuac brei thau: jalan diuk rai takik pasram rup pabhap daok dang nao mai, mbang pandap mbang samar drah hu rilo menyek, menyum rilo mbia alak saong pakao hala… ngak ka rilo urang njauk ruak ung thư tung taha. Urang dahlau diah hu ruak polyp tuyến, polyp răng cưa oh hu cuống, viêm jalan tung pruac, hu manuac urang dalam baoh sang njauk ruak ung thư tung taha, đa polyp gia đình atau polyp tuyến cak rok nan lac dom urang mbuan njauk ruak. Langiu di nan, urang ruak me-ik saradang atau ung thư tathau jeng hu mong lac dom urang mbuan njauk ruak ung thư tung taha jang dom urang karei.

Tui bác sĩ Ngô Thị Thanh Quýt, Akaok khoa Nội tiêu hóa Sang iek ruak Thống Nhất TPHCM, tầm soát nan lac jalan duah thau ka ruak ung thư atau dahlau di ruak  ung thư di dom urang oh mboh hagait brei thau lac ruak. Bruk tầm soát định kỳ meda daong ka urang samar duah mboh ung thư tung taha, daong iek abih ruak. Lingiu di nan, tầm soát daok daong pacang caga hu ung thư tung taha tuk cakak klaak dom polyp atau khối u dahlau di tuk nyu tamuh jeng ung thư. Urak ini, jalan  nội soi taong abih tung taha lac jalan tầm soát ung thư tung taha siam di abih. Bác sĩ Thanh Quýt hu panuac kakei lac “Njauk tầm soát 6 bilan sa mbang di labik y tế hu angan je piah samar duah mboh ruak. Meyah dalam sang hu urang njauk ung thư tung taha ye urang sa darah haong gauk  njauk nội soi tung taha tầm soát avar jang labaih 10 thun dut haong umo di urang tuk njauk ruak ung thư tung taha, tuk oh ka hu mboh hagait lac ruak”.

Ung thư tung taha meda pacang caga hu tapa bruk mbang menyum ka nyu laghaih, bhian ma-in padhih. Bruk iek ruak ung thư tung taha lac iek ruak đa mô thức dalam nan hu gam blac riah, hóa trị, xạ trị... Min blac riah jeng daok lac jalan iek ruak mboh rilo di abih saong ngak brei abih ruak tuk ruak bahrau tamuh. Taphia di bruk tầm soát saong iek ruak tuk bahrau ruak, vaktu pasang iek hadei di tuk iek ruak jeng biak praong, kayua lac ruak meda cakrok atau tamuh gilac tuk halei jeng hu./.

Urang lang: Jasi – 25/03