Pathau mikva saong taong abih gauk! Diuk pasang ong Tư Quang (lac Nguyễn Văn Quang) , thun ini ong umo 70 tuổi daok di ban Cần Thơ hu 6 urang anek jeng njauk jru mek klik kruoc. Kham merat yam tapa kan kandah, diuk pasang ong hu raong pato dom anek jeng menuac jeng urang. Kadha vak di Lệ Hoa, urang vak di rayo sap ndom VN daok di bhum taneran kraong Cửu Long brei thau ka kreih camin ini:

Mikva daok di labik Trường Hòa, phường Trường Lạc, quận Ô Môn, ban  Cần Thơ thei jeng thau saong iek praong dua diuk pasang ong Tư Quang. Kayua lac baoh sang ngak nông kan kathaot bo hu 6 anek ye bruk raong pato dom urang anek lac kan, ndom hagait tal bruk njom jru mek klik kruoc dioxin. Urak ini baoh sang ong hu kapul urang njauk jru mek klik kruoc dioxin ban Cần Thơ palih ruah lac sa dalam 2 baoh sang hội viên hadah krah njauk pok meyaom pakat negar.

Dom bhap bini daok meng livik mai di phường Trường Lạc, quận Ô Môn khan lac, saman mesruh metak, labik ini lac sa dalam dom labik pandiak di jalan vòng cung bhian njauk kol khamang taong tame, chap kreik, pateok bhap bini nao atah piah ngak jeng vùng trắng, ngak tayah cơ sở cách mạng. Dua diuk pasang ong Tư Quang nao tal bhum taneh Lộc Ninh (tỉnh Bình Phước harei ini) ngak  công nhân kuah katak bloh njauk njom jru mek klik kruoc bo oh thau. Jaik pluh thun hadei di harei taneh ia hu yasa, Trường Lạc meng mboh veik sambo hijao, bhap bini nduac klaak palei dahlau daih mai daok veik, ong Tư Quang saong diuk anek jeng mai daok veik palei.

Tuk camereip, diuk pasang ong Tư kan kathaot min biak bui sambai. Dom urang anek mekre patui gauk tabiak rai, nyu pachreih diuk pasang ong Tư Quang kham merat ngak mbang jang. Bloh diuk pasang ong Tư Quang laik tame suy sụp tuk 2 bloh 3, bloh 6 anek di ong umo jaik 5 thun ye ruak kik gam gam, tangin takai dak harei dak sit nao, kavong, ka-iu. Ong Tư Quang khan lac: “Tuk sit anek halei jeng biak mekre, siam binai siam likei lo. Tal umo jaik 5 thun ye kol nyu labuh ruak. Meyah thau dahlau lac yau nan, ye ndih tapui sa urang min oh  thau kế hoạch hagait, saneng lac hu rilo ye anek ini njauk ruak ye drei hu anek karei, min anek halei jeng yau nan. Meng nan, drei kan kathaot lo, kuhria ngak mbang oh ginup ka anek nao bac”.

Hadei di dom mbang tuyệt vọng, ong saneng anit ka anek, ong Tư Quang lac saong diuk njauk kham merat jang piah hu jien raong anek tuk ruak kik pandik pandoa. Ong jeng pato dom anek nhẫn nại, kham merat ngak bruk saong pachreih dom anek kham merat yam tapa thar vak.

Thun 2007, hu  bruk daong di quỹ hỗ trợ urang njauk jru mek klik kruoc dioxin ban Cần Thơ, ong Tư Quang pachreih anek likei ka 5 bac bruk pasiam phon pan tangin, bloh brei anek kamei ka 6 bac tui. Sa anek hu ong patak pataom, nyim mesraiy peih tiệm pablei tạp hóa, sa anek pablei pandap nhựa, pandap nhôm gia dụng, sa anek peih tiệm blei ve chai, sa anek gheih tangin ye nao bac jhik bloh peih tiệm… Urak ini, 6 urang anek jeng hu diuk hu pasang, ong Tư Quang jeng kei nội, kei ngoại min bruk pandik harao klik kruoc jeng daok miat dalam rup pabhap di dom taco.

Abih tih sang ong hu tal 8 urang njom jru mek klik kruoc nan lac 6 anek saong 2 taco nội, ngoại. Umo taha 70, maong veik dom kham merat di drei brei ka dom anek, dom taco, ong Tư Quang saneng lac brei ngak kreih camin saong lac labik pambak tame khang kajap ka anek taco. Amuk Trần Thị Liên Kiều – akaok kapul urang njauk jru mek klik kruoc dioxin ban Cần Thơ brei thau: “dalam Cần Thơ urak ini hu labaih 4.400 urang njauk jru mek klik kruoc daok dalam 550 baoh sang kan kathaot saong biak kan kandah. Dalam nan, sang ong Tư Quang lac sa dalam dom sang njauk jru mek di taneh ia trak di abih saong jeng lac urang hội hadah krah kham yam tapa kan kandah, iek glang siam ka dom urang njauk jru mek. Nan lac sa kreih camin  kham merat yam tapa biak njauk pok meyaom”.

Meda lac abih menuac sia hu lương tri di dunya tuk taom gaok dom sang hu urang njauk jru mek klik kruoc đi ô xin di Việt Nam jeng mboh pandik harao saong ndom lac : nan dom urang rambah rambup abih dalam taong abih dom urang gaok rambah rambup kayua mesruh metak. Kayua yau nan ye, bruk kham merat yam tapa thar vak piah yam tame raidiuk di baoh sang ong Tư Quang biak njauk pok meyaom./.