Harei Katê di bimon Pô Sah Inư thun ini, hu peih tabiak dalam 2 harei 27 saong 28 bilan 9 ini, ngan haong rilo adat cambat saong dom bruk  ma-in sambai karei. Dom bruk ngak adat cambat saong ma-in bui sambai hu pambuak pagam haong guak biak laik. Katê di bimon Pô Sah Inư hu dom bruk ngak yau ini: Adat peih pabah mbang bimon, adat raok khan ao Pô Sahinư, daoh tamia, meyaih khan pandap panda, nyaom pakacah tangin ngak... Kayua nan ye, taong abih bruk ngak hu kuhria caga biak tani tanat. Mban peih bruk ngak harei kate jeng bhian brei urang jakar trun mai daong ba, tacei pato piah daong ka bruk kuhria caga harei Katê hu siam jang. Sa-ai Trần Đức Dũng, Phoak Akaok mban khik iek Bimon Pô Sah Inư Bình Thuận brei thau: "Urak ini, Mban khik iek bimon Pô Sah Inư hu kuhria caga biak tani tanat ka dua harei Ka tê di puac adit ini, meng bruk puh ramik haci hacih tal khik iek an ninh trật tự saong bruk meyaih khan ka harei Katê. Ndom ka bruk ilamo daoh tamia, cơ sở vật chất piah ka mikva peih ngak dom adat cambat ye hu khaol dahlak kuhria caga ginup abih. Dalam dom harei anak tal, khaol dahlak brei padang ngak rạp saong sân khấu piah ka harei kate rah tabiak hu mbuan lagaih”

Jaik dua adit ini mai, njuak tame dom harei padeih puac adit nan lac dom urang tamia saong kapul urang ma-in alat ragam di palei Yok Yang, xã Phan Hiệp, huyện Bắc Bình daok chreih chai pathram, meng ragam ginang, dom ragam tamia ngak habar ka nyu laik haong guak piah kuhria caga ka adat raok khan ao Pô Nít, dalam harei kate di palei drei jaik mai tal. Ini lac sa bruk ngak biak hu makna ngan haong dom urang halei hu mbaok dalam adat raok khan ao di Po. Kayua yau nan ye, dom urang likei dam kumei dara di palei Cam ini thei jeng hu mboh, hu thau ka bruk ngak di drei nyu prong glaong yau halei, piah rik daong tame ngak siam harei Katê thun ini. Sa-ai Tôn Hoài Vũ, Phaok akaok UBND xã Phan Hiệp, Bắc Bình, Bình Thuận khan lac:“Dalam adit ini, khaol dahlak peih bruk nao rivang saong alin brei pandap ka dom baoh sang sarak karja, baoh sang urang taha daok sa drei, dom baoh sang kathaot, dom halau janeng piah ka taong abih mikva thei jeng hu mbang kate trei sil, haniem phol. Urak ini, dalam xã hu 3 palei, khaol dahlak jeng brei puh ramik jalan dhuan ka nyu hacih sa-at, tacei pato ka dam dara peih ma-in giải taong mbal ka 3 palei saong dom kadha ma-in bhap bani di kalan Pô nít piah ba mai bui sambai dalam harei kate. Langiu di nan, khaol dahlak jeng sangka tal bruk khik iek an ninh trật tự piah ka mikva mbang kate bui sambai.”

Piah ba bui sambai chreih chai dalam tuk mbang KaTê, saong ngak brei salih bahrau dom bruk ngak ndung bak ilamo di urang Cam, piah pachreih tuai damuai mai mong iek, roh duah. Dalam harei 1 bilan 10 anak tal, Pasak Parang iek ilamo Cam, hu peih ngak rilo bruk piah pamere ka tuai damuai mai rivang iek pak ini. Thun ini, oh lac tok hu nao rivang iek saong duah thau ka pandap panda, tuai damuai daok hu mong iek dom nghệ nhân, gam haong dom urang daoh tamia mai meng dom palei Cam dalam tỉnh pakacah guak taong ginang, yuk saranai, tamia Cam, paik ginraong ya, menyim jih dalah saong dak talam salao har neng piah iew Yang saong pakacah puac jang yau vak akhar Cam. Sa-ai Ức Viết Vòng, Phaok akaok pasak parang iek ilamo Cam Bình Thuận ndom lac. “Piah kuhria caga tani tanat ka harei Ka tê anak tal, tal tukvak ini ye pasak parang iek ilamo Cam, hu jak ba urang jakar, urang ngak puh ramik ka nyu hacih sa-at. Dalam dom bruk ngak di harei Ka tê thun ini, khaol dahlak hu daa dom anek saih di dom huyện Tuy Phong, Hàm Thuận Bắc saong Bắc Bình mai pak ini piah hu mbaok dalam bruk pakacah puac saong vak akhar Cam. Langiu di nan, khaol dahlak daok peih bruk pakacah taong ginang, yuk saranai, tamia Cam, ini lac dom bruk ngak biak hu makna piah khik ramik saong patagok dom yaom ilamo di bangsa Cam piah duh ka urang tuai mai mong iek, rivang ma-in jeng yau mikva daok jaik taphia ini.”

Melam mai nan lac danak dak daoh tamia bhap bani Cam. Pasak meda hu pambuak bruk haong Pasak ilamo - Thông tin - Thể thao huyện Bắc Bình peih danak dak daoh tamia bhap bani Cam. Ini oh lac labik pataom mbaok ma-in di bhap bani Cam Bình Thuận, bo daok lac labik mai rivang iek biak siam gheih ka tuai damuai dalam saong langiu taneh aia mai pak ini roh duah, mong iek bein ilamo biak karei di bangsa Cam. Harei Katê oh daok atah tra, mikva di dom puk palei daok kuhria caga biak tani tanat piah uan raok harei Katê, harei pataom ilamo meng kan di bhap bani Cam./.