Bruk pajeng ba nao mai dalam tuk Tết thun sak kubao hu khik siam

Mesup ini (17/2), lac sa mesup tra dalam negar oh hu urang halei njom Covid-19. Dalam labaih 20 harei kuhria meng tuk jit tamuh tabiak di Hải Dương, Quảng Ninh hadei di nan pambak tabiak 13 tỉnh, ban, oh hu rilo mesup yau nan. Tal urak ini, abih tih urang njom ruak lac 2.311, dalam nan hu 719 urang njom mbak dalam taneh ia kuhria meng harei 27/1. Dalam 2 harei tapa, rilo jalan ngak khang hu ba tabiak piah pacang jit, abih di nyu lac di dom labik pandiak lac Hải Dương haong Hà Nội. Tui Mintri Y tế, lô vắc-xin camereip abih meda mai tal Việt Nam di jhung bilan 2, hu gam vắcxin kayua Việt Nam blei haong hu daong brei. 

Pasak pasang iek ruak kik ban raya HCM (HCDC) brei pasang iek urang meng bhum jit Covid-19 dalam negar mai ban raya hadei di tuk padeih Tết Nguyên đán. Dom urang meng dom bhum jit dalam negar mai ban raya HCM dalam 14 harei jeng brei pathau khan y tế tapak ka jabat chức năng. Di Bình Thuận, UBND tỉnh hu panuac ieu tong abih urang jakar, công chức, viên chức, urang ngak song chuyên gia ngak bruk di tỉnh, dalam 14 harei meng di harei 2/2 hu nao tal 13 tỉnh, ban hu jit ruak Covid-19, tuk mai veik brei pathau khan y tế song dut iek. Tuk mboh âm tính meng hu nao ngak bruk veik.

Tui UB salamat jalan mbak negar, bruk pajeng ba nao mai dalam tuk Tết thun sak kubao hu khik siam, bala angaok jalan trun daok takik. Min jeng hu dom tỉnh, ban dom hu dom menuac metai tagok glaong kayua bala angaok jalan mbak nao mai, nan lac Quảng Bình, Gia Lai, Quảng Ngãi haong Khánh Hòa. Tapa pasang iek, dom bala nan rilo meng lac kayua urang peih radaih menyum alak mbia, lih tapa jalan, nao tapa jalan oh sangka tui iek, nduac samar, kayau urang nao takai tapa jalan oh njauk.

Sang iek ruak Chợ Rẫy - TPHCM brei thau dalam tuk Tết hu cấp cứu rilo urang gaok bala pandik harao kayua phao patuh. Dalam melam palao thun klak, raok thun bahrau, sa urang umo 21 thun, daok di tỉnh Bình Phước tame sang iek ruak njauk tabram abih plak tangin kayua main pháo. Sa urang likei umo 25 thun, dok di Lâm Đồng njauk pháo patuh ngak tabram abih plak tangin hanuat. Sa urang gaok bala karei di Bình Thuận njauk phao patuh tame rup, tame sang iek ruak tuk tangin hanuat tabram abih, meta ieu njauk pacah abih asar meta, njauk mek klaak asar meta.

Dalam dom harei tết, yaom aring tasik di ĐBSCL tagok biak glaong oh ka bhian mboh, hu tuk tagok tal 1 triệu đồng/kg. Di Cà Mau, yaom aring tagok glaong meng harei 1 bingun tal harei 3 bingun Tết. Hu thau, aring praong meng meteh kg tagok, yaom 1 triệu đồng/kg, janih 2 (ala meteh kg sa drei, yaom 800.000 đồng/kg; aring janih 1 yaom 420.000 đồng/kg. Tal harei 5 bingun Tết, yaom aring trun veik, tok glaong jang janih 100.000 đồng/kg duk saong tuk dahlau tết. Thun ini, rilo sang raong ring mek hu takik. Dalam tuk nan, ring hu menuac urang blei mbang rilo tuk tết nan ye oh ginup piah pablei.

Urang njom SARS-CoV-2 di Mỹ trun 23% dalam tuk urang tame sang iek ruak trun 19% dalam adit dahlau. Ni lac adit ka 5 gam gam Mỹ hu trun takik urang njom bahrau song tame sang iek ruak. Dom urang metai hu trun 1,8%, dok jiak 21.800. Min, dom chuyên gia y tế brei thau ka rilo biến thể bahrau di SARS-CoV-2, hu panuac kakei bhap bini pandar patiah pacang mbaok song paatah di gauk. Karja Tổng thống Joe Biden hu tagok vắc-xin parabha ka dom bang meng 11 triệu tagok 13,6 triệu mbang meng adit ni.  

Gah Y tế dunya (WHO) brei pandar chip 2 janih vaccine di hãng jru AstraZeneca, brei adat parabha dom vaccine ini tal dom taneh ia kan kathaot abih di dunya. Di Brazil, Rajaei negar ini brei thau lac meda brei adat pandar chip ka 1 janih jru taong ruak Covid-19 lac janih xịt dhung kayua Israel roh duah, ngak tabiak, mboh hu siam jaik 100% tuk 29 dalam 30 urang ruak Covid-19 ruak khang jaik metai hu siam veik.

Reuters brei thau, Gah pablei salih dunya (WTO) đhu palih ruah urang dahla udeih ngak akaok mintri jien ndua Nigeria, Tiến sĩ Ngozi Okonjo-Iweala, pal akaok gah pablei salih dunya meng harei 1/3/2021 tal 31/8/2025. Brei panuac hadei di tuk tagok ngak, muk Okonjo-Iweala cong khin hu pambuak bruk song dom negar dalam WTO piah pasang iek song peih ngak sarak ba gah kinh tế dunya patagok gilac veik, ngak ka gah pablei salih dunya khang kajap, samar jang song siam lagaih song bruk urak ni./.

Urang lang: M. Phương – Hani Pha – 17/02 10:25:19