UBND tỉnh Đồng Nai bahrau peih bruk padang ngak jalan lubang nao tapa tatua Hóa An (ban .Biên Hòa) pambuak song jalan tapen krong Đồng Nai

Mesup ini (19/2), Mintri Y tế brei thau oh hu urang bharau halei dương tính nCoV. Dalam 24 mon tapa, Hải Dương hu gac 18 urang njom Covid-19, tui nan dom urang njom di tỉnh ini lac 575 urang. Dom urang pan akaok Mintri Y tế ndom lac, mbang jit di Hải Dương biak srau kadau, trak jang dom mbang jit dahlau. Anek virus nyu njom mbak samar, drah jang duk saong dahlau daih. Kayua yau nan ye, njauk jhul samar jang bruk dut iek.

Pasak pasang iek ruak kik TPHCM brei thau, tong abih dom urang mai veik meng Hải Dương meng harei 3/2 hu brei dok patah di labik ppraong, brei dut iek menuac urang song abih urang dalam sang, dom urang tal TPHCM meng harei 15/1-2/2 eng drei tui iek pren yava. TPHCM jeng brei dok karei dom urang meng dom labik dalam tỉnh Quảng Ninh tal ban raya meng 3/2. Gam haong nan, peih bruk dut iek meneing urang mai ban raya meng dom radeih pajeng tuai.

UBND tỉnh Bình Phước hu tacei pato Sở Y tế pambuak bruk haong Bộ chỉ huy quân sự tỉnh Bình Phước peih bruk dut iek Covid-19 brei ka taong abih 1.200 dam dara caga tagok jalan nao ngak lin, ngak salah blaoh dahlau di harei 1/3 piah samu tuk jao, taduan lin. Tui pasak pasang iek ruak kik tỉnh Bình Phước, meng harei 21/1 tal ini, tỉnh hu 6 urang mai meng Hải Dương, jeng hu brei daok karei piah tui iek prein yava saong taong abih jeng mboh âm tính mbang 1 ngan haong SARS-CoV-2.

UBND tỉnh Đồng Nai bahrau peih bruk padang ngak jalan lubang nao tapa tatua Hóa An (ban .Biên Hòa) pambuak song jalan tapen krong Đồng Nai ngan song phun jien 310 tỷ đồng. Danak dak atah 620m, phun jien buh tabiak padang ngak labaih 310 tỷ đồng, tui kuhria hu peih ngak di bilan 4/2021 song ngak salah bloh dalam thun 2024. Tui UBND tỉnh Đồng Nai, jalan lubang ni hu dong jhul pakhang patagok kinh tế di pak ni tuk pambuak pagam labik akaok jalan roya 1K song ban raya HCM hong tỉnh Bình Dương.

Tal urak ini, dom tỉnh ĐBSCL yuak hu labaih 350.000 ha padai đông xuân, tui kuhria tal abih bilan 2 yuak hu 550.000 ha. Urak ini urang mai blei yaom 6.800 – 7.000 đồng/kg padai siam, meng 7.000 – 7.500 đồng/kg padai pahe; meng 7.500 – 8.000 đồng/kg padai ndiuk… tui yaom ini, urang ngak hamu laba hu labaih 30 triệu đồng/ha. Tui kuhria mboh dahlau, puac bilan 2 haong bilan 3/2021, dom bhum tapen tasik bhum ĐBSCL meda gaok kan kandah ka ia taba pabak ka bruk pala drak saong piah pandar, kan kandah tal 37.800 ha padai đông xuân saong yaok pluh rabau ha phun mbang baoh.

Labaih 3 triệu uranaih di Mỹ tapa dut iek mboh dương tính song virus SARS-CoV-2 meng di tuk jit prong rah tabiak. Tui pathau khan bahrau di abih di Học viện Uranaih song Hiệp hội sang iek ruak uranaih di Mỹ, uranaih meblah 13% tong abih dom urang njauk njom Covid-19. Dom urang jakar y tế ndom lac, njauk duah thau jang bruk suai lavik di jit prong ngan song uranaih, dalam nan hu pren yava rup pabhap jang yau pren yava akaok sahneng.

Labaih 11 rabau mbang vắc-xin caga Ebola tui kuhria hu nao tal Ghi-nê di puac adit ini piah ka bruk klauk jru pacang meda hu peih tabiak meng harei 22/2 tal. Tui gah Y tế dunya WHO, hu 8.600 mbang jru gac hu jeng mai meng negar Mỹ. WHO hu panuac kakei 6 taneh ia châu Phi njauk tui iek dom menuac mboh yau njom Ebola hadei di tuk tamuh dom sruh jit bahrau di Ghi-nê haong Công-gô. Dalam mbang tamuh jit thun 2013-2016 di Tây Phi, virus Ebola ngak brei labaih 11.300 urang.

Takik di abih 50 urang njauk rambuac dalam sa bala radaih paoh gauk angaok jalan di gah merong Ai Cập di harei 18/2, tuk sruh radeih buýt pajeng urang ngak dok peih njauk sa sruh radeih pajeng pandap padang ngak ginuh tame meng gah likuk. Hu 4 urang metai, min urang metai meda hu rilo jang. Bala radaih paoh gauk di Ai Cập trun takik dalam dom thun tapa tuk negar ni pasiam veik jalan dhuan. Mintri Kế hoạch song patagok Kinh tế Ai Cập brei thau, urang metai kayua bala angaok jalan di negar ni trun 44% meng thun 2019 tal thun 2020./.

Urang lang: M. Phương – Hani Pha – 19/02 10:18:30