Blei khẩu trang saoh ka mikva urang bangsa takik 

Anak bruk caong khin pandar khẩu trang pacang caga jit ruak Covid-19, rilo kapul nyaom, jabat di tỉnh Trà Vinh hu jak ba brei saoh jaik 20 ribau khẩu trang y tế ka anek saih, ka urang ruak, gauk gar urang ruak… piah paglaong akaok saneng, thau cambaih jang ka bruk pacang khik pren yava bol bhap rahra. Langiu di nan, dom kapul nyaom daok brei menuac nao tal labik piah ba brei, tacei jalan pacang caga jit ruak kayua Covid-19; peih ngak dom jalan tui panuac  kakei di Mentri Y tế yau rao tangin meng japol, aia hu cồn.

Ong Lâm Sa Rinh daok di xã Phước Hảo, huyện Châu Thành brei thau, anak bruk jit ruak Covid-19 dak harei dak khang, njauk ngak siam dom jalan pacang caga jit. Kadha ini oh lac tok pacang khik pren yava ka rup drei, manuac urang dalam sang drei bo daok rik daong tame bruk pacang khik pren yava ka bol bhap rahra. Kayua YAU nan ye, ong tuk halei jeng kakei rup drei saong baoh sang di drei cuk khẩu trang di dom labik hu rilo manuac yau darak pasar, tuk nao baha, sang bac. “Bruk cuk khẩu trang dalam bilan jit yau nan biak siam piah pacang khik pren yava ka rup drei saong manuac sia dalam sang drei. Kayua ruak ini njaom mbak tapa jalan suak yava, nan ye tuk nao tal sang njauk rao tangin ka nyu hacih. Dahlak jeng kakei anek kamuan dalam sang nao tal labik rilo menuac njauk cuk khẩu trang”.

Sang bac Trung học phổ thông Bangsa gam bac gam daok Huỳnh Cương, tỉnh Sóc Trăng meng harei akaok mereip hu ba tabiak jalan ngak pacang caga jit covid-19, jeng yau kuhria caga dom jalan ngak. Sang bac peih bruk puh ramik mblang bein sang bac, tal bac saong dom duk ndih. Langiu di nan daok  pandar mac dut iek thân nhiệt saong aia rao tangin ginup ka urang jakar, gru pato, urang ngak saong dom anek saih dalam sang bac. Taphia di nan, sang bac daok tacei pato anek saih peih ngak siam bruk vệ sinh cá nhân, peih pathram ka urang jakar, gru pato, urang ngak dalam sang bac jalan pacang caga jit Covid-19. Adei Lê Hà Anh Thi, anek saih Sang bac Trung học phổ thông Gam bac gam daok Huỳnh Cương brei thau: Pacang caga jit Covid -19 akaok mereip adei njauk khik  vệ sinh chung, blaoh vệ sinh cá nhân. Khaol dahlak  bhian rao tangin meng japon atau meng aia hacih. Daok duk ndih ye khaol dahlak  jeng bhian puh ramik, rao uak sang saong tuk halei jeng khik ka duk laneng lanoi.

Bahrau ini, urang pal akaok tỉnh Sóc Trăng hu ngak bruk haong MBan tacei pato bruk ngak agama, bangsa tỉnh saong dom halau janeng dom agama ka bruk peih ngak jalan pacang caga jit ruak dalam dom bruk ngak lễ, hội hu rilo manuac urang di urang bangsa takik, di agama. Ong Lâm Văn Mẫn, Phaok Bí thư Thường trực Tỉnh ủy, Akaok Hội đồng bhap bani tỉnh Sóc Trăng pandar dom gah chức năng, abih di nyu lac gah ilamo – padhih saong rivang ma-in pambuak haong dom jabat pambuak pagam peih ngak dom bruk uan raok Chol Chnam Thmay thun 2020 ka nyu siam laghaih. Dom puk palei tacei pato bhap bani peih ngak ginup abih dom adat hukum ngan haong urang meng negar langiu mai Việt Nam; ngak sit jang, takik menuac jang saong takik tukvak jang dom lễ hội di bhap bani. Urang pal akaok tỉnh caong khin dom halau janeng agama patui veik gam haong dom gah dom pakat pambuak gauk peih ngak siam bruk pacang khik, iek glang pren yava bhap bani, dalam nan hu urang tui dom agama. Lingiu di nan njauk caik hatai tal bruk khan brei ka dom urang tui agama thau ka bruk nguy hiểm di jit ruak Covid-19, min oh ngak prong bruk, piah pacang cakak saong paglaong akaok saneng eng drei pacang khik pren yava ka drei.

Thượng tọa Lý Minh Đức, Phaok Akaok Ban trị sự Giáo hội Phật giáo Việt Nam tỉnh Sóc Trăng brei thau, dom baha brei trun takik, brei padeih bruk ngak lễ hội prong, rilo manuac, kham merat pacang caga jit Covid-19: Khaol dahlak pathau khan di dom baha saong dalam bol bhap rah ra, abih di nyu lac phật tử ka bruk pacang caga jit, jak ba mikva peih ngak adat cambat ka nyu siam laghaih, oh pataom rilo manuac piah plaih njaom mbak prong. Dalam baoh sang njauk bhian rao tangin hacih sa-at, rao tangin meng japon piah pacang caga jit.

Mikva bangsa Khmer Nam bộ hu jaik 1,3 triệu urang, daok rilo di dom tỉnh gah Tây Nam bộ. Dalam dom harei ini, jaik abih dom tỉnh dalam bhum jeng hu jalan ngak saong bhian peih bruk pathau khan ka jit ruak Covid-19 dalam bhum urang bangsa takik piah paglaong jang akaok saneng pacang caga di manuac sia./.

Urang lang: Jasi-25/3