Ong Thái Thuận Niên, sa po gilai taong ikan di xã Phước Tỉnh, huyện Long Điền tỉnh Bà Rịa-Vũng Tàu hu mbang njauk negar langiu cap khik kayua taong cap ikan suan adat hukum brei thau: Bilan 3 thun 2015 gilai taong ikan kreh tasik di ong njauk gah chức năng Malaysia cap khik gam haong 13 urang taong ikan kayua nao tame bhum tasik nagar ayut taong cap. Tui adat hukum di nagar Malaisia, langiu di bruk cap khik 2 sruh gilai yaom jaik 4 tỷ đồng, taong abih urang taong ikan njauk cap caik guk jaik 5 bilan. Ong Niên njauk ngak harak bảo lãnh taong abih urang taong ikan mai sang. Hadei di bruk nan ong Niên phá sản kayua jien ndo lahik abih, ong mong ini yau sa bài học prong dalam bruk ngak njauk tui adat hukum angaok tasik di ong jeng yau urang taong ikan di Việt Nam:  “Oh thau hu ranh giới di Việt Nam saong Malaysia, tuk gaok angin ribuk prong ye nyu theik tapa gah diah, bloh njauk gah chức năng di Malaysia cap khik daok guk abih 13 urang taong ikan. Urak ini lahik abih drap ar di drei. Njauk thau lac mbang hu 1mbang – 2 mbang min puac abih  urang cap hu lac lahik abih, oh daok hagait dalam sang”.

          Ong Nguyễn Văn Hải, urang dang akaok gilai taong ikan kreh tasik daok di phường 6, bal Vũng Tàu brei thau, gilai di drei jeng bhian nao taong mek ikan di labik giáp ranh Việt Nam saong Indonesia, ini lac labik giáp ranh nan ye jeng mboh hoang mang. Hadei di tuk hu mbaok tame dom van pathau khan saong hu brei thau vị trí, tọa độ meng jabat peih ngak adat hukum di Việt Nam, ong Hải meng thau hu labik halei lac đặc quyền kinh tế di drei, urang taong ikan Việt Nam hu quyền taong cap. Yau nan min, ông Hải mboh lac meyah hu mbaok di Jabat chức năng Việt Nam pak dom labik nan, mikva mboh an tâm jang: “Caong khin Cảnh sát tasik Việt Nam tabiak nan piah khik biên giới ka urang taong ikan ngak mbang, saong piah thau tọa độ, jalan nao piah ka negar langiu oh mek kareik. Biak huac kayua oh thau labik halei lac di Việt Nam atau di negar langiu, rilo mbang oh hu cảnh sát tasik Việt Nam ye urang negar langiu jeng tapa gah drei taong mek ikan”.

           Tui ralo urang taong ikan,  bruk taong mek di tasik atah di Bà Rịa – Vũng Tàu, urak ini dom labik taong ikan di drei kaya ikan dak harei dak takik nao, dalam tuk nan, dom labik taong ikan giáp ranh kaya ikan hu biak ralo. Kayua dom po gilai, urang dang akaok gilai saong urang taong ikan kurang thau ka ranh giới địa lý, biên giới angaok tasik di dom negar dalam bhum, kurang thau ka adat hukum dom negar nan ye oh thau lac drei lih tapa tasik negar ayut taong mek. Hadei di dom mbang ngak suan saong njauk negar ayut taong phat dom urang nan njauk bac megru hu ralo ilamu saong kham merat ngak njauk tui adat hukum  .

Thượng tá Đinh Văn Điền, Phaok chủ nhiệm Chính trị Bộ Tư lệnh Vùng cảnh sát tasik 3 brei thau, njauk pato pakai ka urang taong ikan thau lac bhum tasik di drei ye hu quyền taong mek, ngak njauk tui adat hukum di Việt Nam, juai saneng lac labik halei hu ikan ye drei tame taong di labik nan. Kadha ini oh njauk haong adat hukum di Việt Nam jeng yau dunya.

Urak ini, langiu di bruk patagok pathau khan ka urang taong ikan juai lih tame bhum tasik negar langiu taong mek ikan, dom jabat chức năng saong dom puk palei hu gilai taong mek ikan kreh tasik di Bà Rịa – Vũng Tàu pandar dom jalan ngak yau: oh brei adat ngak gilai bahrau ka urang ngak suan adat, oh brei adat tabiak tasik ka dom sruh gilai njauk dom negar langiu cap khik saong palao mai sang atau brei patrun phun jien mesre ngak bahrau gilai ka dom urang taong ikan ngak suan adat hukum…

Tukvak anak tal, taphia di bruk khik caga chủ quyền, mbaok aia angaok tasik, dom gah peih ngak adat hukum angaok tasik di Việt Nam njauk patui veik patgaok bruk pasang iek, pacang cakak bruk ngak suan adat hukum di urang taong ikan, patagok jalan taong phat ngan haong thuyền trưởng, po glai cố tình ba gilai taong ikan tapa bhum tasik negar langiu taong cap suan adat hukum piah tapa nan, dom urang karei mboh huac, oh ngak suan./.