Kiên Giang urak ini hu jaik 51.000 baoh sang urang bangsa Khmer, gam saong 216.850 menuac, meblah 12,5% menuac sia dalam tỉnh. Dom thun tapa, tỉnh kham merat peih ngak hu siam dom sarak di Đảng, hukum di Karja ngan saong bhap bini bangsa Khmer, abih di nyu nan lac bruk sangka patagok pato – megru, paglaong ilamu ka bhap bini.

Tui Sở Pato megru tỉnh Kiên Giang, 5 thun mai ini, dom sang bac, tal bac, labik bac, pandap pato bac, dom gru pato labik hu rilo bhap bini Khmer daok, hu buh jien tame ngak piah pabak siam jang ka bruk bac saong pato. Meng nan, chất lượng pato megru oh padeih patagok.

Dalam tỉnh hu labaih 39.700 anek saih bangsa takik, meblah 12% dom anek saih phổ thông saong 1.292 gru pato lac urang bangsa takik. Tỉnh peih ngak siam dom sarak daong bruk bac da-a,  miễn, giảm jien bac ka anek saih saong sangka tal raidiuk gru pato njauk tui quy định, piah ka dom cei gru, nai gru sahanang hatai pato pakai.

Meng hu yau nan, bruk ieu pataom anek saih bangsa Khmer meng 6 - 14 thun nao bac dak harei dak rilo, thun bac 2015 - 2016 hu labaih 96%,  100% anek saih bac tamat bloh pakat 1, 98% bac tamat pakat 2, saong labaih 90% bac tamat pakat 3. Dalam 5 thun tapa, dalam tỉnh pilih ruah cử tuyển 285 anek saih bangsa takik nao bac đại học, cao đẳng saong trung cấp chuyên nghiệp; labaih 300 anek saih hu pilih ruah nao bac dự bị đại học.

Gam saong nan, tỉnh hu 5 sang bac phổ thông bangsa gam bac gam daok di ban sit Rạch Giá, Hà Tiên saong 3 huyện Giang Thành, Châu Thành, An Biên, hu abih tih 1.420 anek saih tui bac. Sang bac Phổ thông bangsa gam bac gam daok huyện An Biên daok hu padang ngak, tui yaom jien buh tame abih tih labaih 15 tỷ đồng, hu 8 tal bac, ngan saong 200 anek saih, tui kuhria hu peih tabiak brei ka anek saih tame bac dalam thun bac 2016 - 2017.

Urak ini Kiên Giang hu 35 sang bac phổ thông pato akhar Khmer, hu 193 tal bac, 4.870 anek saih pakat 1, pakat 2 saong pakat 3. Tỉnh hu daong ka gru pato lac dom ong bhik, dom À-cha, daong bàn ghế, tapuk akhar Khmer ka dom baoh baha Khmer pato akhar Khmer dalam bilan hè.

Tỉnh pataom tame ngak pasiam dom sang bac, dom tal bac, pabak bruk bac da-a bhum bhap bini bangsa, sangka ngak dahlau dom danak dak pakhang pasiam sang bac, padang ngak sang công vụ ka gru pato, sang bac mek hu chuẩn pakat negar, sang bac mầm non; sangka patagok parilo gru pato lac urang bangsa takik hu chất lượng pabak hu bruk salih bahrau gah pato megru. Taphia nan, iek praong bruk pato pakai nhân cách, đạo đức, jalan diukrai, paglaong hatai iek praong adat hukum saong trách nhiệm công dân di anek saih, sinh viên; ngak siam dom sarak daong ka anek saih bangsa takik./.