Thun 2014 -2015, ada tasik hu ba tabiak raong iek di dom kaoh di pulao Trường Sa 300 drei. Taphon ada raong iek daok praong siam saong daok baoh.

Di bhum taneran kraong Cuu Long, tukvak jaik di ini, ada tasik hu raong iek saong tuk camereip mboh hu kein laba, lagaih saong bhum lingik pandiak, ia mbak di Kiên Giang, Tiền Giang, Bạc Liêu. Di Cà Mau, jeng hu raong iek mboh hu siam 2 ribau 800 drei ada tasik saong daok kuhria raong rilo jang. Ong Nguyen Van Tranh, phó akok Sở Ngak nong saong patagok palei pala Cà Mau mboh lac, janih ada ini praong siam di bhum ia lợ saong ba jien tame tani tanat ka urang raong nyu:

“Cà Mau urak ini bahrau raong iek. Daok kuhria raong tagok 6 ribau drei. Urak ini hu 2.800 drei daok raong iek. Meyah mboh ada ini raong lagaih ye jak ba urang raong, caga ginup pajaih ada piah pabak ka dom palei raong praong.”

Ada tasik nyu baoh meng tuk raong hu 21 adit, praong trak 2,7 kg sa drei, brei baoh meng 240 tal 250 baoh dalam sa thun. Yau nan, ada tasik mebaoh yaom lac takik jang dut saong dom pajaih ada raong mek baoh, meng 280 -285 baoh dalam sa thun, min nyu rilo jang ada raong piah mbang ralo. Baoh trak meng 80 tal 85 gam sa baoh, jaik sumu baoh ada raong piah mbang ralo saong praong jang dut saong baoh ada raong piah mek baoh,  meng 63 tal 65 gam sa baoh.

Ong Nguyen Hữu Tỉnh, Pho akaok Phân viện Chăn nuôi Nam bộ, Viện Raong glang pakat negar brei thau: Ada tasik hu yaom kinh tế glaong, meda brei mbang pandap hu di langiu rilo dinh dưỡng; gam pacang hu ruak, lagaih saong ia taba, ia mbak saong ai meteh mbak meteh taba.

Băng: Brei baoh biak rilo. Ralo nyu bingi. Ada drah praong, mbuan pablei. Meda raong hu di ia tasik yau lingiu Trường Sa, raong di dom kaoh pualo praong labik tasik. Bruk njauk biai nan lac, ada raong hu di ia mbak, ia taba, angaok thu ada jeng praong siam meyah raong di ia taba tui rilo jalan raong yau ye raong dalam var ro, raong dalam dom labik bein mbang baoh, glai ia mbak…

Ong Nguyễn Văn Trọng, Phó akok Cục raong glang, Mentri Ngak nong saong patagok palei pala kakei lac, njauk caga siam ka gah raong glang piah lagaih haong tuk langik tasik oh siam meng urak ini. Dalam nan, gam saong dom janih raong karei ye ada tasik meda raong praong di bhum taneran kraong Cuu Long, abih di nyu nan lac dom palei bhum tasik; dom labik hu ia mbak njom tame. Dalam nan, brei samar jao pajaih ada tasik ka 8 tỉnh taphia tasik di bhum ini:

 “Ada tasik daok raong meng pajaih tamo di dua labik. Gah barak di Pasak roh duah ada Đại Xuyên. Gah meraong raong di Pasak roh duah cak rok manuk ada VIGOVA. Ini lac dua labik pabak pajaih. Min, urak ini di bhum taneran kraong Cuu Long oh ka hu labik halei pabak pajaih, nan ye brei mek pajaih ada meng pasak di ban raya HCM. Anak tal meda padang pasak pajaih di Sóc Trăng piah pambak praong tapon ada, piah pabak rilo ka bhap bini dalam bhum jeng ye ka Campuchia”

Meng bruk raong hu kein laba di dom tỉnh dalam bhum brei mboh lac, raong ada tasik oh lac ba jien tame rilo, tani tanat ka mikva  bo nan daok lac cakrok patagok siam dom hagait daok hu di bhum taneh ini. Langiu di nan, ini lac pajaih ada mbuan raong, lagaih saong labik lingik pandiak, ia njom mbak, tuk bo anak tal, langik tasik yau nan dak harei dak rilo jang di bhum taneran kraong Cuu Long./.