Sang ong Chamalea Hồng daok di palei Hành Rạc 1 dahlau diah  lac sa dalam dom baoh sang kathaot di xã Phước Bình. Thun 2013, hu Mặt trận, kapul nyaom xã jak ba salih janih phun pala, anek athur raong, taphia di nan daok brei mesre phun jien meng gilang pariak sarak karja, sang sa-ai hu salih 5 ha pala tangeiy tapa phun pa-aok bleit. Meng hatai kham merat yam tapa kan kandah, bac megru ilamu dom urang nao dahlau, pandar ba ilamu khoa học kỹ thuật tame bruk ngak mbang pala drak, mai meng nan sản lượng pa-aok bleit di sang sa-ai dak harei dak tagok, yaok thun paik hu labaih 6,5 tấn asal. Tui yaom pablei 42 ribau đồng sa kg, yaok thun sang sa-ai mek tame hu jaik 250 triệu đồng. Meng phun jien patak pataom hu, sa-ai Chamalea Hồng pala pablak 70 phun kruac bung kalik hijao saong blei 4 drei limo pajaih mai raong. Tal harei ini, tapon limo di sang sa-ai patagok hu 10 drei praong, limek. Ong Chamalea Hồng, xã Phước Bình, huyện Bác Ái, tỉnh Ninh Thuận khan lac: Drei patak pataom jien blei taneh dom mẫu tra, pala pa-aok bleit mboh hu yaom. Drei pala blaoh hu jeng bein yau harei ini. Drei kuhria anak tal taneh daok 1,8 mẫu drei pala kruac bung saong phun mbang baoh. 

Sang ong Pi Năng Thiêng daok di palei Hành Rạc 1, xã Phước Bình jeng khang hatai pala kruac bung kalik hijao. Akaok mereip ong Thiêng tok pala iek dom pluh phun, hadei di nan mboh hu kein laba kinh tế ba mai glaong jang rilo mbang dut haong ngak padai saong pala tangeiy nan ye thun 2013, sang ong salih 1 ha taneh tanu tambok tapa pala kruac bung kalik hijao. Ong Thiêng brei thau, kruac bung kalik hijao nan lac phun pala lagaih haong taneh riya saong langik tasik pak ini, mbuan mong iek, takik halak halin. Tui yaom pablei pak bein meng 30.000 tal 50.000 đồng/kg, 1 ha kruac bung di sang ong brei jien mek tame biak rilo, daong ngak brei patagok kinh tế baoh sang. Ong Pi Năng Thiêng daok di xã Phước Bình, huyện Bác Ái, tỉnh Ninh Thuận brei thau: “Thun ini dahlak pala jang 1 ha kruac bung tra, pala ta-eng kruac bung kalik hijao lac 1ha, kayua lac pak ini hu aia langik nduac meng angaok ceik trun nan ye hu aia pruh ka phun luac thun. Thun ini dahlak daok patagok phun kruac bung, blaoh padang ngak sang, bein phun pala hu ginup abih”. 

Meng hatai kham merat di bhap bani gam haong bruk daong ba samar drah di karja puk palei, mặt trận, kapul nyaom, tal harei ini, xã Phước Bình hu 130 ha kruac bung kalik hijao, jien mek tame tui kuhria 30 triệu đồng sa hecta yaok vụ. Langiu di nan, urang nong xã Phước Bình daok pala 741 ha patei saong durieng ba jien tame meng 3 - 3,5 triệu đồng sa ha sa bilan; oh ka ndom tal labaih 500 héc ta pa-aok bleit, mek jien tame meng 25- 30 triệu đồng sa ha yaok thun. Mai meng nan, rai diuk di mikva bhum ceik Phước Bình dak harei dak patagok…. Amuk Katơ Thị Gái, akaok Uỷ ban MTTQ xã Phước Bình, huyện Bác Ái, tỉnh Ninh Thuận brei thau: “Tui Nghị quyết di Đảng njauk salih janih phun pala meng phun katut panak harei tapa pala phun lavik  thun piah patagok kinh tế, meng nan Mặt trận jeng hu pathau khan  jak ba mikva salih janih phun pala ka nyu njauk haong taneh riya, langik tasik di puk palei. Urak ini, mặt trận daok pataom tame pathau khan ngak yau habar piah patrun kathaot khang kajap”)

Mek hu siam mekre yau nan, dom pakat Mặt trận hu peih ngak siam bruk jak ba “Salih jalan saneng, jalan ngak dalam bhap bani urang bangsa takik piah yam tagok patrun kathaot khang kajap”. Mai meng nan, rai diuk di mikva dak harei dak patagok. Tal urak ini, baoh sang kathaot saong jaik kathaot di Phước Bình trun biak rilo, jien mek tame kuhria rah tapa yaok urang hu jaik 10 triệu đồng/sa urang/sa thun. Ong Cao Anh Tuấn, Phaok akaok Ủy ban MTTQ huyện Bác Ái,  tỉnh Ninh Thuận ndom lac: "Daok patagok dom siam mekre mek hu dalam dom thun tapa, Mặt trận meda ginum biai saong yasa haong dom kapul nyaom dalam huyện, xã jao brei bruk ngak, chỉ tiêu cambaih laih ka yaok jabat nao jak ba mikva salih janih phun pala, athur raong”. 

Meng dom bruk ngak saong jalan ngak siam, caong lac tukvak anak tal bruk patrun kathaot di xã Phước Bình, jeng yau  huyện bhum ceik Bác Ái di tỉnh Ninh Thuận daok mek hu ralo siam mekre meng hatai kham merat ngak mbang saong pandar ilamu kỹ thuật tame dalam bruk ngak mbang pala drak di bhap bani, daong ngak brei patagok bruk ngak mbang kinh tế, xã hội bhum ceik saong partun kathaot khang kajap./.