Dalam tuk ini, di tỉnh Bến Tre, bruk pakacah gauk salam uan nyaom roya đảng bộ dom pakat, yam tal nyaom roya pakat negar mbang ka XIII di Đảng daok chreih chrai tagok di taong abih gah dalam raidiuk. Sa-ai  Phạm Minh Tân, Bí thư Chi đoàn palei Quý Khương, xã Quới Điền, huyện Thạnh Phú, lac sa dalam dom kreih camin hadah di bruk Đồng Khởi padang mbang ngui saong patagok doanh nghiệp di tỉnh Bến Tre khan lac: Chi đoàn di sa-ai daok ngak rilo bruk haong mikva dalam palei, pamaong tal dom harei bilan 8 sajarah di bangsa.

75 thun dahlau, meng jayah di bruk Tổng khởi nghĩa di ban ine Hà Nội harei 19-8-1945, harei 20-8-1945, Xứ ủy Nam Kỳ peih nyaom biai di Chợ Đệm, brei thau ka bruk Tổng khởi nghĩa di Nam Bộ. Dom kapul lin daong taneh ia saong Dam dara ba akaok nao dahlau di dom puk palei daok caga tabiak mesruh. Harei  24-8, Mặt trận Việt Minh tỉnh Bến Tre tabiak mbaok di pasak tỉnh, piah gam duah thau hatai sahneng di kol khamang, gam brei menuac sia thau ka cách mạng. Jala pandiak harei 25-8, ja pan akaok gah lin “bảo an” di tỉnh nao huyện Mỏ Cày piah pataom mek phao ndao. Yau nan lac tukvak lagaih mai tal paje! Tỉnh ủy samar tabiak lệnh brok tagok meblah mek karja. Kapul cách mạng gam haong bol bhap rahra yau ia talah ar, meng to, thong, gai kreim samar tabiak meblah mek labik di kol lin bảo an, pacap kol nyu yar tangin taduan lah; blaoh drei nao meblah mek dom labik ngak bruk, tòa án, bưu điện, gilang pariak, sang mac điện, bót cảnh sát…

Prein khang di cách mạng ngak brei kol khamang oh megei hu hagait. Tỉnh trưởng Phan Văn Chỉ yar tangin taduan lah. Tuk nan lac mon 5 biar harei 25-8. Hala dok cách mạng par grauk dom jalan, bhap bini bui sambai uan jayah. Buk brok tagok di tỉnh lỵ lac sap pháo lệnh ka abih labik dalam tỉnh. Tok dalam melam 25 haong mesup 26, kol Prang jaleih, kol Japon yar tangin taduan lah. Karja di bhap bini hu padang tagok meng tỉnh tal xã.

Patagok ilamu Cách mạng Bilan 8, Đảng bộ haong bhap bini tỉnh Bến Tre tuk halei jeng jum pataom, sa hatung hatian haong gauk, yam tapa oh thau hadom rambah rambup, glaih glar, metai lahik, rik daong praong tame jayah di bangsa dalam 2 mbang mesruh taong Prang haong taong Mỹ daong taneh ia, peih bruk salih bahrau, dak padang saong patagok palei negar. Dom thun jaik di ini, tỉnh thau pambak tame rilo prein khang pataom tame padang ngak hạ tầng, abih di nyu lac jalan mbak piah nao mai hu samar dom tỉnh dalam bhum, duh siam ka bruk cakrok patagok kinh tế - xã hội. Mbaok meta meng ban sit, ban praong tal palei pala salih bahrau drah samar. 10 thun tapa, prein meriak gauk pakat tỉnh (PCI) di Bến Tre tuk halei jeng daok dalam kapul ba kaok, thun 2019 dang dhi 7 dalam taneh ia.

Tal urak ini, tỉnh ngak hu jaik abih dom bruk ba tabiak dalam vaktu 2015 - 2020, dalam nan hu dom bruk, ngak hu rilo jang tanut ba tabiak. Jien mek tame kuhria tui akaok menuac dalam vaktu ini, lac jaik 45 triệu đồng sa urang sa thun. Bruk padang Đảng, hệ thống chính trị, patagok bruk ngak mbang, quốc phòng - an ninh hu rilo salih bahrau biak siam, raidiuk di bhap bini dak harei dak tagok. Bến Tre urak ini hu 49 dalam 158 xã mek hu chuẩn palei pala bahrau, baoh sang kathaot daok 4,76%.

Amuk Hồ Thị Hoàng Yến, Trưởng Ban Tổ chức Tỉnh ủy Bến Tre brei thau, bruk Cách mạng Bilan 8 hu Đảng bộ tỉnh patagok cambaih jang dalam bruk ba akaok nao dahlau di urang jakar, urang đảng, abih di nyu lac urang dang akaok. Meng thun 2016, Tỉnh ủy brei bruk urang jakar pakat ủy tỉnh, urang pan akaok dom sở, mban, ngành, kapul nyaom; dom huyện ủy, thành ủy brei bruk urang jakar pan akaok pakat huyện iek gah bhum sit, iek gah xã saong tui iek tapak yaok puk, palei; Đảng ủy xã, phường, ban sit brei bruk urang jakar tui iek tapak tổ nhân dân tự quản, baoh sang bhap bini, tui jalan ngak lac: tỉnh tui iek tal xã, huyện tui iek tal palei, khu phố, xã tui iek tal yaok baoh sang.

Bruk nan hu urang jakar paglaong bruk ngak di drei, peih ngak catang; rik daong haong puk palei tacei pato peih ngak hu siam sarak nyaom roya đảng bộ dom pakat, daong langyah rilo bruk kan kandah, tavak tavaiy, abih di nyu lac dom kadha bahrau tamuh tabiak pak di puk palei. Meng nan, rilo bruk cách mạng, patagok kinh tế, padang ngak palei pala bahrau, padang đô thị văn minh, Đồng Khởi bahrau, Đồng Khởi padang mbang ngui, padang chuỗi giá trị bruk ngak nông… pambak praong dalam, hu rilo urang jakar, urang đảng haong bhap bini njauk hatai, pachreih tui.

Hu mbang mai veik huyện Chợ Lách, kol dahlak mboh tatuak drei kayua 1 bhum ngak nong meng kan mai, kan kathaot di tỉnh Bến Tre dahlau daih urak ini hu salih bahrau biak rilo. Abih 10 xã di huyện jeng mek hu chuẩn palei pala bahrau. Jien mek tame kuhria tui akaok menuac hu labaih 46 triệu đồng yaok urang sa thun. Labik ini hu rilo bruk ngak nong cakrok, pandar ilamu - kỹ thuật bahrau ba mai kein laba glaong. Pagap yau bruk ngak di Hợp tác xã Mai Vàng kayua urang đảng  Lê Tấn Đạt, Bí thư Chi đoàn ấp Phú Hội, xã Vĩnh Thành dang akaok. Thau bruk ngak, sa-ai jak ba urang đoàn, dam dara tame kapul pambuak bruk, daong phun jien oh kuhria laba piah urang dalam kapul blei phun pajaih, klah rabha ilamu iek glang mai kanyik,... Atau bruk cakrok du lịch sinh thái palei ngak di urang ngak nong Nguyễn Công Thành daok di palei Sơn Châu, xã Sơn Định. Yaok thun, ong Thành pablei tabiak darak pasar labaih 700 rabau phun ca-cao. Nao ravang iek labik du lịch sinh thái praong jaik 20 công taneh bak phun hijao di ong Thành, blaoh menyum ia ép ca-cao atau menyum hasit alak ca-cao kayua ong Thành ngak tabiak, thei jeng meyaom, jeng takre. Meng bein phun cảnh di ong Nguyễn Văn Công daok di xã Khánh Trung B, yaok thun jeng duah laba hu yaok ratuh triệu đồng meng pablei phun cảnh. Dom phun cảnh ngak jeng 12 anek sak, sang lục giác, bát giác, klaok bingu, hồ lô,... di ong gam gam hu mbaok di rilo harei pataom praong dalam saong lingiu taneh ia. Dom bhum palei cách mạng di Đồng Khởi – Bến Tre dak harei dak kaya meda tagok./.

Urang lang: M.Phương  19/8/2020